काम 26
26
अगरीपा क सामै पोलुस की पेसी
1अगरीपा पोलुसऊँ बोल्यो, “तनै तेरा खुद क बचाव म बोलबा की छुट ह।” जणा पोलुस आपको हात उठायो अर आपका बचाव म बोलबो चालू कर्यो,
2“म्हराज अगरीपा! ओ मेरो सोभाग ह क यहूदि मेर प जोक्यु दोस लगायो ह आकै बचाव म मनै खुदनै थारै सामै बोलबा को मोको मिल्यो ह। 3खास कर जदकी थे यहूदि रिती-रिवाजानै अर बाकी जिरैनै चोखी ढाळ जाणो हो। इ ताँई म थारूँ माँग करूं हूँ क थे थ्यावस क सागै मेरी सुणज्यो।
4“सगळा यहूदि जाणी हीं क टाबरपुणाऊँई म, कंय्यांसिक जीतो आयो हूँ। अर अ जाणी हीं क म मेरी पूरी जिंदगी पेली तो मेरा यहूदि मिनखा क मांयनै अर जणा पाछै यरूसलेम म कंय्यांसिक बिताई। 5#काम 23:6; फलि 3:5बे मनै सदाऊँ जाणता आया हीं अर बे इ बात की गुवाई दे सकीं हीं क म म्हारा धरम का कट्टर पंथ फरिसी क गेल जीतो आयो हूँ। 6अर इब बि करार की आस की बजेऊँ जखी परमेसर आपणा बडकाऊँ कर्यो हो म अठै खड़्यो हूँ। 7आ बाई आस ह जिनै पाबा ताँई आपणा मिनखा का बारां कूणबा दिन-रात परमेसर की भगती करी। अर इ आस की बजेऊँई अ यहूदि मेर प दोस लगावीं हीं, म्हराज! 8परमेसर मरेड़ानै जीवावै ह आ बात थारै अठै बिस्वास जोगी क्युं कोनी समजी जावै?
9 #
काम 8:3; 22:4,5 “म बी सोच्यो हो, जोक्यु मेरूँ हो सकै बो म नासरत का ईसु नाम क खिलाप करूं। 10अर म यरूसलेम म अंय्यांई कर्यो हो। अर परधान याजकाऊँ अधिकार लेर परमेसर का मिनखानै जेळ म गेर्यो हो अर जद बानै मार गेर्यो जातो हो जणा म बी बाकै खिलाप मेरी हामी देतो हो। 11अर बोळीबर म अरदास करबाळी झघा म बानै पिट्यो अर बापै ईसु की बुराई करबा ताँई जोर देतो हो। म बापै झाळा भर'र अत्तो बिकराळ होगो हो क म दिसावर नगर्या म बी जार बानै दिनघाल्या करतो हो।
पोलुस क मुंडा बिको हियो बदलबा की बात
(काम 9:1–19; 22:6–16)
12“अर इ लोर म जद म परधान याजकाऊँ अधिकार कागद मंडवार दमिसक जार्यो हो। 13तो म्हराज गेला म मनै धोळै दोपारा घणो जोरको च्यानणो जखो आसमानऊँ आर्यो हो मेरै अर मेरै सागै जाबाळा क च्यारूमेर चमकतो दिख्यो। अर बो अत्तो जोरको हो की सूरज को च्यानणो बिकै आगै क्युंई कोनी हो। 14अर म्हें सगळा धरती प पड़गा, अर इबरानी भासा म, म अंय्यां की एक उवाज सुणी ‘साऊल ओ साऊल! तू मनै क्युं दिनघालै ह? आरी क मुंडा प लात मार तू क्याले खुदनै दिनघालै ह।’ 15जणा म बुज्यो ‘परबु थे कूण हो?’ अर परबु बोल्या, ‘म ईसु हूँ जिनै तू दिनघालै ह। 16पण इब तू उठर खुदका पगा प खड़्यो हो। म तनै मेरो दास बणाबा ताँई दरसाव दिओ हूँ। अर जोक्यु तू आज देख्यो ह अर जखी म तनै आगै दिखास्युं बिनै लोगानै बतातो रेह। 17म तनै इजरायली अर गैर-यहूदिआ का मिनखाऊँ बचास्युं जाकन म तनै भेजस्युं। 18जिऊँ तू बाकी आँख्या खोलै अर बानै अँधेराऊँ च्यानणा म अर सेतान की सक्तिऊँ परमेसर कानि ल्यावै, अर मेर प बिस्वास करबाऊँ बानै पापऊँ माफी मिलसी अर जखी बापोत मेरा टाळेड़ा मिनखा ताँई ह बिमै बाको बी हिस्सो होसी।’ 19जणा म्हराज अगरीपा, म बि दरसावनै कोनी टाळ्यो जखो मेर कनै ईस्बर नगरीऊँ आयो हो। 20#काम 9:20,28,29जणा म सऊँ पेली दमिसक पाछै यरूसलेम अर पाछै यहूदिआ का सगळा देसा का रेह्बाळा अर परमेसरनै नइ ध्यारबाळा मिनखानै समजातो रिह्यो क पापऊँ तौबा करो, परमेसर कानि आओ अर हियो बदलबा जोगो काम करो। 21आ बाता की बजेऊँई जद म मनदर म हो जणा यहूदि मनै पकड़र मारबा की कोसिस करी। 22पण परमेसर की दयाऊँ म आज अठै खड़्यो हूँ अर छोटाऊँ लेर बडा ताँई सगळानै मेरी गुवाई देर्यो हूँ। अर बा बातानै छोडर ओर क्युंई कोनी खेऊँ जानै मूसा अर परमेसर की खेबाळा कह्या हा क अ बाता होबाळी ह। 23#1 कुरन्थी 15:20की मसी बोळा दुख भोगसी, मरसी अर बोई सऊँ पेली मरेड़ा म जिंदो होसी जिऊँ यहूदि अर गैर-यहूदि मिनखा म च्यानणा को हेलो पाड़ै।”
24अंय्यां बोलर जद पोलुस खुदको बचाव करर्यो हो, जणा फेतूस जोरऊँ बोल्यो, “पोलुस! तू बावळो ह, तेरी घणी बिद्या तनै बावळो करै ह।” 25जणा पोलुस जुबाब दिओ, “म्हराज फेतूस! म बावळो कोनी, पण म सची अर समजहाळी बात खेऊँ हूँ। 26म्हराज अगरीपा अ बाता म थानै बेधड़क खे सकूँ हूँ, क्युं क थे आ सगळी बाता क बारां म जाणो हो। अर अ सगळी बाता थारूँ छानी कोनी क्युं क अ बाता ओला अर कूणा म कोनी घटी। 27म्हराज अगरीपा, थे परमेसर की खेबाळा म बिस्वास करो हो के? म जाणू हूँ थे करो हो।” 28अगरीपा पोलुसऊँ बोल्यो, “तू के जाणै ह मनै थोड़ासा टेम म मसी को चेलो बणा लेसी?” 29पोलुस बोल्यो, “के थोड़ो टेम, के बोळो, पण म तो परमेसरऊँ आई अरदास करूं हूँ क थे अर जत्ता बी मनै आज अठै सुणी हीं बे जि साँकळाऊँ म बंदर्यो हूँ आनै छोडर बाकी बाता म मेरै जंय्यां का होज्यावै।”
30जणा राजा खड़्यो होगो अर बिकै सागै राजपाल, बरनिके अर जत्ता बी बठै बेठ्या हा सगळा खड़्या होगा। 31अर बठैऊँ जार आपसरी म बतळाबा लाग्या, “ओ मिनख अंय्यां को तो कोई काम कोनी कर्यो जिऊँ इनै मार्यो अर बंदि राख्यो जावै।” 32अर अगरीपा फेतूसऊँ बोल्यो, “ओ मिनख ज रोम का राजा कनै सुणाई की दरखास्त नइ करतो जणा ओ छोड्यो जा सकै हो।”
Dewis Presennol:
काम 26: एस डब्लु वी
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
(c) 2010-2017, New Life Computer Institute. All rights reserved