Lyfr y Psalmau 44
44
1Clywsom, Arglwydd Ior, â’n clustiau,
Traethodd in’ ein tadau ’n fwy,
Y rhyfeddol waith a wnaethost
Yn eu hen amseroedd hwy; —
2Gyrru allan y cenhedloedd,
Dwyn i mewn dy genedl wir;
Blinaist, am eu drwg, y bobloedd,
Plennaist hwythau yn y tir.
3Nid eu cledd mewn maes byddinog
A ddug iddynt hwy y wlad;
Nid eu braich ennillodd iddynt
Fuddugoliaeth yn y gad:
Dy ddeheulaw Di a’u pleidiodd,
Dy fraich gadarn oedd o’u tu,
A goleuni gwedd dy wyneb
Siriol ar dy genedl gu.
YR AIL RAN
4Ti, fy Nuw, yw ’m Pen a’m Brenhin,
Arch i Jacob wyrthiau ’th ras:
5Ynot Ti cilgwthiwn ymaith
Fyddin ein gelynion cas:
Yn dy Enw, llu ’n caseion
Dan ein traed a sathrwn ni;
6Nid fy mwa, nid fy nghleddyf
Byth a’m hachub, ond Tydi.
7Ti, ein Duw, oddi wrth y gelyn
A’n gwaredaist yn dy rym;
Ti a doaist â chywilydd
Wyneb ein caseion llym:
8Ynot Ti ’r ymffrostiwn beunydd,
Ti yw ’n bost, ein Duw di‐lyth;
Canwn am y fuddugoliaeth
Uchel glod i’th Enw byth.
Y DRYDEDD RAN
9Ti, er hyn, a’n bwriaist ymaith
I waradwydd a sarhâd;
Ac nid yw dy wyneb mwyach
Gyd â’n lluoedd yn y gad;
10Troist ni ’n ol oddi wrth y gelyn,
Rhoist ni ’n anrhaith, Ior, i’w cledd;
11Rhoist ni ’n ebyrth i’r cenhedloedd
Oll i’n bwytta yn eu gwledd.
12Gwerthaist, Ion, dy bobl heb elw,
Ac am ddim y prynwyd hwy;
Ac ni fynnit chwaith i’th olud
Ddim o’u pris gynnyddu ’n fwy.
13Rhoist ni ’n warthrudd i’n cym’dogion;
Rhoist ni ’n nod i’w gwawd a’u gwarth;
Rhoist ni ’n destun gwatwar‐gerddi
I’n caseion o bob parth.
14Ti a’n rhoddaist yn ddïareb
I’r cenhedloedd, ac yn sen;
Hwythau fyth, wrth son am danom,
Llaesant wefl, ysgydwant ben:
15-16F’ wyneb innau gan y dirmyg
Sy dan gwmmwl tew o wawd,
Am fod chwerwedd geiriau ’r gelyn
Yn gwarthruddo f’ enaid tlawd.
Y BEDWAREDD RAN
17Ond er dyfod hyn oll arnom,
Ior, ni ’th anghofiasom Di;
Ni thorrasom dy gyfammod,
Ffyddlon iddo fuom ni:
18Yn dy lwybrau di rhodiasom,
Heb i’n gwrthol gynnyg troi,
19Er ein curo ’n nhrigfa dreigiau,
Er i gysgod angau ’n toi.
20Os anghofio ’riôed a wnaethom
Enw mawr ein Harglwydd hael,
Neu ddyrchafu dwylaw ffeilsion
At eilunod gweigion gwael;
Anfad anffyddlondeb felly
21Oni chwilia Duw e’n llwyr?
Gwel Efe ’r dirgelion dyfnaf,
Calon dywyll dyn, fe ’i gŵyr.
Y BUMMED RAN
22Colli ’r ydym, Arglwydd, beunydd
Er dy fwyn ein bywyd cu;
Ac fel defaid y’n cyfrifir
Oll i laddfa ’r angau du:
23Deffro, deffro, pa’m y cysgi?
Deffro, Arglwydd Dduw di‐lyth;
Cyfod bellach i’n hamddiffyn
Ac na fwrw ni ymaith byth.
24Pa’m y cuddi d’wyneb rhagom?
Gwel ein gorthrwm gystudd mawr;
25Isel yn y llwch yw ’n henaid,
Glynu ’r ydym wrth y llawr:
26Cyfod, Arglwydd, inni ’n gymmorth,
Cudd ni rhag y gelyn cas;
Gwared ni er mwyn d’ ogoniant,
Ac er mwyn dy ryfedd ras.
Dewis Presennol:
Lyfr y Psalmau 44: SC1850
Uwcholeuo
Copi
Cymharu
Rhanna
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Y Psallwyr gan y Parch. Morris Williams (Nicander). Cyhoeddwyd gan H. Hughes, Llundain 1850. Cafodd y testun ei ddigideiddio gan Gymdeithas y Beibl yn 2021.