IINDUMISO 126
126
Ukucel' ibuyambo
Iculo labahambi.
1Ekusibuyiseleni *kukaNdikhoyo eZiyon,
ngokuya sasiphuma ekuthinjweni,
kwasuka kwaba ngathi liphupha.
2Safumana sagigitheka yintsini,
kwayintswahla yemincili novuyo.
Zade zatsho nezizwe zathi:
“Ngenene uNdikhoyo ubenzele izinto ezinkulu.”
3UNdikhoyo usincede kakhulu, ngoko ke siyavuya.
4Khawusibuyisele inkqubela, Ndikhoyo,
njengamanzi empompoz' entlango.
5Abo bahlwayela behlininika besezinyembezini
banga bangavuna bebobotheka yimincili.
6Abo baphuma bahambe bezibambe ngeenkophe,
bepheth' imbewu, besiya kuhlwayela,
bobuya bedanduluka, bememelela ngemincili.
Kaloku bobuya besikaza, bethwel' isivuno.
Dewis Presennol:
IINDUMISO 126: XHO96
Uwcholeuo
Copi
Cymharu
Rhanna
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Bible Society of South Africa 1996. Used with permission. All rights reserved.