Rô-ma 13
13
Teq u kan ttih
1Jôm bnih phrui chôh bơl kan ttih; đươm 'bưn geh ch'bap kmheng ơơn baah 'bưn lôh a Brah Ưn; pal nhi kan ttih nar au geh kot đươm Brah Ưn chong. 2Nei mơ 'bơơn ta wal nhi kan ttih laa ta wal kơơi rmaanh Brah Ưn ri ja ldơk; u pal bnih lơh bei nei a kươi nhôq pơih baak pơrkat aan nơơm. 3Đươm nhi kan bôôk 'bưn geh jah aan bnih klanh n'hông, baah jah aan bnih đơơk đaak n'hông. Day êch rlach phrui n'hông nhi kan ttih 'bưn? Phrui lơh ntil klanh room, u ay a kươi kươt tkôm; 4đươm bu laa dêch Brah Ưn ri jah lơh preh thlay aan ay. Dôh mơq ay lơh ntil đơơk đaak nei phrui ring n'hông, đươm bu cheng pêh 'bưn geh laa arơi laang; bu laa dêch Brah Ưn ri jah lơh baak phaat teq u bnih lơh ntil đơơk đaak. 5Nei mơ phrui chôh nhi kan ttih, 'bưn dơơn đươm n'hông dol phaat dôh kot đươm chưt nuih nha. 6Kot đươm rơ kheet nei baah oh bi ndơơp wal suai, đươm nhi kan ttih laa dêch Brah Ưn ri jah lơh kaar au.#Mat 22:21; Mak 12:17; Lu 20:25. 7Phrui kah aan jôm bnih ntil nơơm knđi: ndơơp wal suai aan bnih bơn phrui ndơơp; ndơơp rơq deh aan bnih bơn phrui ndơơp; n'hông bnih bơn dip n'hông; đing bnih dip đing.
Baak srlanh lơh sơp ch'bap
8Khơơm knđi 'bơơn ntil ơơn, dơơn knđi di baak ta srlanh; đươm 'bơơn srlanh bnih a gêêng nơơm laa ja lơh sơp ch'bap. 9Đươm pal baak ch'bap: “'Bei khơơm lơh dôih ta tưr, khơơm lưm bnih, khơơm ttung chôr, m'oh n'haan,” u paich baak ch'bap ơơn nday, kot krop knông ndroong au: “'Bei phrui srlanh bnih a gêêng bei nơơm.” 10Baak srlanh 'bưn lơh khuich bnih a gêêng; bei nei, srlanh laa lơh sơp ch'bap.
Phrui kah rngeh
11Phrui lơh bei nei, đươm oh bi gưt nơơm plah rêh knông klap êch. Ja tơt bêl oh bi phrui kah, đươm nar au baak đoh kwaai ja dơơh n'hai bơl bơn huôih khal bơl bơn mhei jơ. 12Jru mang hôm, nar dơơh tơt; bei nei bơl bơn phrui ploh teq pal kaar mang jơ ngôw baah dook ao dơrnal book aang. 13Phrui rêh di ndroong dip klanh bei han lwah aang nar, khơơm nhêt bnhưl u ha triênh, kiat mrơơ u r'ơơng, root baak u ta kiêr. 14Dôh phrui dook pơih Brah laa Brah Jê-sus Krist, khơơm wơng ndroong lơh tơ kah pal sơ ôp pêêk pai.
Právě zvoleno:
Rô-ma 13: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.