Rô-ma 14
14
Tak krôih n'hai oh bi
1Phrui chơp wơơt bnih lhơơi chưt jơrnơ, khơơm ta tau n'hai bu teq u pal gơrninh.#Kôl 2:16. 2Bnih au jơ awap sa kươt jôm ntil; nha bnih lhok lhơơi dơơn sa chhei jhư ei. 3Bnih sa khơơm 'baih bnih 'bưn sa, u bnih 'bưn sa khơơm a đam bnih sa; đươm Brah Ưn ja chơp wơơt bnih nei. 4Day laa 'bơơn baah pơrkat dêch bnih nday ri? Bu ta yoong paich a kơq, nei laa kaar nnơơm bu ri. Dôh bu a kươi ta yoong, đươm Brah geh kmheng aan bu ta yoong. 5Bnih au aan laah nar au klanh huôih nar tôw, nha bnih nday nei mơq jôm nar kot bei mlơm; jôm bnih phrui jơ jap a gơrninh nơơm. 6Bnih prap nar laa prap đươm Brah; bnih sa kot sa đươm Brah, đươm bu or Brah Ưn; bnih 'bưn sa kot 'bưn sa đươm Brah, u bu kot or Brah Ưn.
7'Bưn bnih êch knông bơl bơn đươm chhak nơơm baah rêh, kot 'bưn geh bnih êch knông bơl bơn đươm chhak nơơm baah chhưt; 8đươm mơq bơl bơn rêh, laa rêh aan Brah, u mơq bơl bơn chhưt, laa chhưt aan Brah. Nei mơ paich rêh paich chhưt, bơl bơn kot pơơn teq u Brah leq. 9Đươm bei nei baah Yaang Krist ja chhưt u rêh kươi jah lơh Brah aan leq bnih chhưt u leq bnih rêh. 10Dôh ay, a hay leet pơrkat oh bi nơơm? Nha ay, a hay leet mơq ngrơi tơơi oh bi nơơm? Đươm leq sêch bơl bơn a kươi kot dơk di mat ktôk pơrkat Brah Ưn ri.#II Kô 5:10. 11Đươm geh baak 'bian:
“Brah lah: Ngan bei Hei rêh yoot, jôm kôq tang a kươi kơltut di mat Hei,
U jôm lpiat a kươi pơt wơơl Brah Ưn.”
12Bei nei, jôm bơl bơn a kươi krơơ teq u chhak nơơm n'hai Brah Ưn.
'Bưn rook trơnih ta n'hai
13Bei nei bơl bơn khơơm ta pơrkat hôm, dôh klanh huôih leq laa rwach 'bưn dơih tmau lơh kơq jơng paich lơh kang aan oh bi nơơm. 14Knông Brah Jê-sus, hei gưt u jơ ngan laah 'bưn geh griêng ơơn êêng bu laa jrơơk jrơơm; dôh bu laa jrơơk jrơơm teq u 'bơơn mơq bu laa jrơơk jrơơm. 15Mơq đươm mlơm griêng sa baah ay lơh khuich oh bi nơơm nei ay ja 'bưn gôq rêh tênh baak srlanh hôm. Khơơm đươm di griêng sa lơh saap luôch bnih pa Yaang Krist ja chhưt gơl. 16Bei nei khơơm teq kaar klanh oh bi ri dol đam điêl. 17Đươm nggoor Brah Ưn 'bưn dip laa baak sôông sa, dôh laa baak sêch song, sroong boong, broh s'bai knông Brah Wêêng. 18Bnih êch jraih kaar Yaang Krist tênh ndroong au nei klanh chưt Brah Ưn u kươt koon bnih đing. 19Bei nei, bơl bơn phrui tênh nduul#14:19 Bei nei, bơl bơn phrui tênh nduul: Knông m'baak plơơp 'bian ti laa Mơ bơl bơn tênh nduul. ntil ơơn liêu kơơi baak ta sruôl u sun moon ta n'hai. 20Khơơm đươm di griêng sa baah lơh khuit khwait kênh kaar Brah Ưn ri. Ngan lah jôm griêng kot sêch jrah, dôh 'bơơn đươm di griêng sa baah rook aan bnih nday a kơq nei ngan laa tih 'bat.
21Klanh đat laa 'bưn sa pai, 'bưn ôn bih paich lơh ntil ơơn rook baak tih aan oh bi nơơm. 22Day geh chưt jơrnơ bei êch nei phrui prap aan nơơm bei nei di mat Brah Ưn. Smlaang aan bnih êch 'bưn pnđing êêng nơơm teq u ntil ơơn nơơm ja dơơp! 23Dôh bnih êch nha nggich nggưl baah khang sa nei dol pnđing hôm, đươm 'bưn lơh tênh chưt jơrnơ. Kaar ơơn 'bưn lôh a chưt jơrnơ kot laa dôih 'baap.
Právě zvoleno:
Rô-ma 14: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.