Rô-ma 12
12
Baak buôi kne
(12:1 – 15:13)
Kmlơt rêh mhei knông Yaang Krist
1Bei nei ơi oh bi, đươm baak gmaak Brah Ưn ri, hei dan jjuh oh bi piyơ chhak jan bơn lơh pai thwaai rêh, sêch jrah u klanh chưt Brah Ưn, nei laa baak tư wơơl dơrnip#12:1 Asn: wêêng brlơng. oh bi ri. 2Khơơm kơơt tênh kmlơt rêh au, dôh phrui kươt pơrgơl đươm baak gơl mhei gơrninh bơn ri, jah chưrleek êch laa rnđêch klanh room, prơơi chưt u sơp grơp Brah Ưn ri.
3Đươm chkhôm brêêng smlaang ja ươn hei, hei mor n'hai jôm bnih knông oh bi, khơơm gênh prêh ir teq u chhak nơơm, dôh phrui gênh leq chưt, tênh baak gưt jhai chưt jơrnơ baah Brah Ưn ja ươn di mbu muôi. 4Rkhơt bei knông di chhak jan, bơl bơn geh ơk jơng ti, u pal jơng ti 'bưn geh pôl mlơm kaar lơh; 5nei kot bei nei, bơl bơn paich ơk bnih, dôh dơơn laa mlơm chhak knông Yaang Krist; jôm bơl bơn kot lah jơng ti ta pôl.#I Kô 12:12. 6Bơl bơn geh pal smlaang jhai nday, tênh brêêng smlaang Brah ươn: Bnih kươt smlaang jhai mor grnưt noor, phrui mor tênh chưt jơrnơ; 7bnih kươt smlaang jhai jraih kaar, phrui jraih kaar; bnih kươt smlaang jhai kne, phrui kne; 8bnih kươt smlaang jhai trôih trôl, phrui trôih trôl; bnih kươt smlaang jhai ta toon, phrui ta toon rhông rhơi; bnih kươt smlaang jhai liêu troong, phrui sang rmeh liêu troong; bnih kươt smlaang jhai lơh kaar klanh, phrui broh s'bai baah lơh.#I Kô 12:4-11.
Rêh knông srlanh
9Baak srlanh phrui ngan nguôn. Phrui jrơơk jrơơm ntil ap, ta tưt n'hai ntil klanh. 10Phrui ta srlanh mbeet mbei bei oh bi; phrui leq chưt ta đing pôl. 11Phrui sang rmeh, khơơm a jrook; phrui geh chưt kmlơt ngech rmeh; phrui jraih kaar Brah. 12Phrui broh s'bai knông kơndưng, pơrkhom knông r'baak, jap chưt baah r'bon dan. 13Phrui ta toon ntil rn'êch aan bơl koon sơih; phrui leq chưt wơơt blap. 14Phrui chak smlaang aan bơl nhôp kơt oh bi; phrui chak smlaang, khơơm pơđaai sa.#Mat 5:44; Lu 6:28. 15Phrui broh n'hai bu broh, nhim n'hai bu nhim. 16Phrui rêh ta tưt tơrnang nơơm; khơơm geh gơrninh nhjơơl, dôh teq nơơm n'hai pal bnih rêh dêh#12:16 teq nơơm n'hai pal bnih rêh dêh: Paich laa joq dơơn knông pal kaar rêh dêh.. Khơơm aan êêng nơơm laa bnih jhai rpech. 17Khơơm pơih đơơk kah đơơk aan 'bơơn; phrui chmlam lơh ntil klanh di mat jôm bnih. 18Mơq awap kươt, phrui leq kmlang rêh ta tưt n'hai jôm bnih. 19Ơi oh bi êch srlanh, koon ti nơơm khơơm ta taang 'bơơn, dôh phrui drôm aan baak hao nuih Brah Ưn ri; đươm geh baak Brah lah: “Baak ta taang pơơn teq u Hei, Hei a kươi kah rmal.” 20Dôh, “mơq pal kmang oh bi plah nh'hit, phrui aan bu sa; mơq plah nh'hiêr, phrui aan bu ôn; đươm lơh bei nei êêng ơơn bei oh bi dơih ôinh rnga lơ bôôk bu.” 21Khơơm teq ntil đơơk jn'ah nơơm, dôh phrui pơih ntil klanh jn'ah ntil đơơk.
Právě zvoleno:
Rô-ma 12: SBL2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024 Bible Society Vietnam. All rights reserved.