Luka 6
6
na kiyaumalran kana katalaulepan na wari
(Matay 12.1-8; Maruko 2.23-28)
1ulra a saya na katalaulepan na wari, makalrang kana emi na 'uma i Yēsu; tu temakesi hemitri za pidaya kana emi, lreselresaw za lima zi mekan. 2ulra papida na Palisay na trau mena'u lra, marengay: <<kemuda zi kemakuda mu kana 'azi ta kemakuda nu katalaulepan na wari awa?>>
3temuvang i Yēsu: <<i Davidē zi nantu pakarunan nu kazu za savavelawan lra mu kemakuda lra za eman ziyamaw, 'azi mu miip ziyamaw? 4kemakawang musavak kana ruma' na Viruwa i itras i intaw, melak kana ipatavang kana Viruwa i itras na pang mekan, zi veray ziya paekan kanantu pakarunan; ini na pang, nu amelri na rahan, nu i eman lra na mekan mu maw na pamelri kana kuret.>>
5kemazu zi marengay i Yēsu: <<Alrak na trau maw a Luzu kana katalaulepan na wari.>>
paka'inava kana mikuwalengan za marum na lima
(Matay 12.9-14; Maruko 3.1-6)
6a pakazuma za saya kana katalaulepan na wari mu, i Yēsu mukuwa i waazukan ruma' panadama kana trau. i kazu ulra sasa a trau, marum lra tu lima na tarawalran. 7ulra papida na sinsi kana Sēsiyo zi na Palisay na trau maranger miya' kanantu pamelriyan ni Yēsu, za karuwayan kokso kantaw, mawna kemani zi kazu i trapingiran tremakatrakaw mena'una'u, menana'u kani Yēsu kana katalaulepan na wari za paka'iyanava za kuwalengan nay. 8malrazam i Yēsu kanantu kiniyaanger nazu, zi marengay kanizu na kuwaleng za marum tu lima na trau: <<karahan, alamu katikezir i ngawayan!>> zi marahan matikezir izu na trau. 9zi kema marengay kanazu i Yēsu: <<kiyumalra ku kanmu, kireeman kana katalaulepan na wari, nanta kuret mu kemuda kemuret? kemakuda za 'inava na lremak zi za kuwatreng na lremak? venavaaw zi za kemuwatreng za uwavaawan?>> 10mena'u i paliyuliyus kana ulra ziyan na trau i intaw, kemazu zi marengay kanizu na trau#6.10 <<marengay kanizu na trau>> ulra pakazuma na awatranan lulun vinavalray za <<'ilremes kanizu na trau marengay>>.: <<lrayatru papatezelr na lima!>> a melrayatr za lima izu na trau mu, na lima mareveliyas 'inava lra.
11pasalaw 'ilremes nazu, marepazayazayar za kuwadakudayan kima'etrev kani Yēsu.
i Yēsu palimi' za papulu' zi zazuwa na sito
(Matay 10.1-4; Maruko 3.13-19)
12ulra a saya wari, mukuwa i zenan kiyanuna i Yēsu, kazu i kazu sa'esungan kiyanun kana Viruwa i itras. 13a 'idenan lra mu, venina i intaw kana temakesi pazuwa i ngawayan kantaw, kemay kanazu i savakan palimi' za papulu' zi zazuwa za trau, a sito kema kanazu. 14nazu mu maw i Simon (tu pungadanay ziya kani Pētēro ni Yēsu) zi i waditaw i Antēlē, i Yakob zi i Yohanē, i Filip zi i Batolomay, 15i Matay zi i Tomas, alrak ni Alefē i Yakob zi izu na 'uringetr na sevang i Simon. 16alrak ni Yakob i Yoda zi i likuzan lra mutu meniwan kani Yēsu na trau i Iskaliotē i Yoda.
i panadam ni Yēsu zi na paka'inava za kuwalengan
(Matay 4.23-25)
17i Yēsu zi na sito salrangan panuwanun kana zenan; i intaw zi na kazuwan na temakesi mukasa matikezir kana trekipan, na ma'etre'etr na zinekalranan kemay i Yodaya kana dare' peniya, i Yērusalem zi na kazekalran makangaydiran i lrevek i Taēr, i Siton pakazuma muwazuk mukuwa i kazu. 18maranger kinger kantaw venavati, zi kiyalriman kantaw paka'inava kanantu kuwalengan nazu. nazu na pinalrar mu kamazu zuwa lra, pawnung kipaka'inava. 19maranger demikes mapapiya kantaw, 'alrana ulra a kezang kemay kantaw i zazek mupana, paka'inava lra kanazu.
na semangalan zi na nana i anger
(Matay 5.1-12)
20i Yēsu marepiles tremepa kanantu temakesi, marengay kanazu:
<<na kalramalraman na trau kemudakuda kana mika'inavayan a;
nintaw mu zinekalranan kana kanatal na Viruwa i itras!
21na savavelawan na trau harem mu kemudakuda kana mika'inavayan a;
kavetreker mu lra!
na trematrangis na trau harem mu kemudakuda kana mika'inavayan a;
uri kasemangal mu liked!
22<<muramawan tu nirekudayan kana Alrak na trau, ulra a trau kawiles kanmu, 'ematelr kanmu, semiri kanmu, kamawanaw kana pimamelri kuwatreng i inmu, zi mika'inavayan mu ulra! 23kinaaziyu ziyan tu temuwamuwan nazu kemani temara kana patralritralri. kanizu na wari, kasemangal mu, 'alrana kani i itras ulra merevaw a pakasahar za muramawan kanmu zi kazu inepetr.
24mawmu, inmu na miyaeman na trau harem mu uwaelep lra za kuwatrengan,
'alrana maruwa lra nanmu kina'inavayan semangalan!
25na vetratrekeran na trau harem mu uwaelep lra za kuwatrengan,
'alrana kasavelaw mu!
na semangal liked na trau harem mu uwaelep lra za kuwatrengan,
'alrana kanana mu i anger zi tratrangis mu!
26<<nu putraitras kanmu na trau ziyan mu, ulra nanmu kakuwatrengan lra, 'alrana tu temuwamuwan nazu mu kemazu marengay za maresan kana mavetra' na patralritralri.>>
venavati za lraman kana 'alra
(Matay 5.38-48; Matay 7.12)
27<<mawmu, inmu na kinger kananku ngay mu, marengaya ku kanmu, kalramanu nanmu 'alra, ka'inavayu na awiles kanmu; 28'aperezu na penunang kanmu na trau, kiyanuni na semiri kanmu na trau. 29ulra a trau semelretra' kanannu mudingan i sannin mu, arusay i sannin paselretra'an kantaw mu! ulra a trau melak kanannu kavang na pakatras mu, arusay na pakesavak paelaku kantaw mu! 30i eman nu kazu tu kiniyaami kannu mu, zi verayi i intaw; ulra a trau melak kanannu eman mu, amanan na mukuwa kiveraya. 31nu maranger mu kemuda kitara za trau mu, kemazuwa mu temara kanazu.
32<<nu pakarasa mu lraman kanazu na lraman kanmu na trau mu, ulra eman mu kinakuda a 'inavayan ziyamaw? arusay na mipinamelriyan na trau mu kamazu lraman kana lraman kanazu na trau! 33nu pakarasa mu ka'inavayaw nazu na 'eminava kanmu na trau mu, ulra a eman mu kinakuda a 'inavayan ziyamaw? arusay na mipinamelriyan na trau kemazu kemani kemakuda! 34anu mawmau pavulas mu za paisu kana mikezang pareveliyas na trau mu, ulra ziya a eman mu kinakuda a 'inavayan ziyamaw? arusay na mipinamelriyan na trau kemazu pavavulas za paisu kana mipinamelriyan na trau, mawmu pareveliyasen maresan kana kinivulas! 35'azi, kalramanu na 'alra, ka'inavayu temara nazu; pavulas za paisu kana trau, amanan mianger kipareveliyas. nu kemazu mu, uri kiyaveray mu za merevaw na pakasahar, pawnung uri utu alrak kana maraitraitras na Viruwa i itras, 'alrana i intaw kemazu mulraman temara kanazu na malalup kanantu 'inavayan za trau 'azi parevelaliyas zi na pimamelri kuwatreng na trau. 36milramana mu, kamawan kananmu Temama i itras milramanan.>>
iparevativati kemuret za trau
(Matay 7.1-5)
37<<iparevativati kemuret za trau, zi 'azi taw mu sayvangi na Viruwa i itras; ikakuret za pinamelriyan za trau, zi 'azi kakuret kananmu pinamelriyan na Viruwa i itras; melapusa mu za trau, zi lalapusay mu na Viruwa i itras. 38veray kana trau, zi vaveray kanmu na Viruwa i itras, pawnung vavitawaw za ma'izang, trikatrukaw zi zekezekaw, rukezangu kananmu kinaruwayan murung, patemuyay 'emilra veray kanmu. mimanay mu za eman vakesiyu venakesiyu mu, na Viruwa i itras kemazu pimanay kana mararesan na vakesiyu venakesiyu veray kanmu.>>
39i Yēsu kemazu marengay kanazu za saya a paruwalruwan, marengay: <<na mavutri' 'azi maruwa kemezeng kana mavutri' tu dalan; nu kemani mu, na zazuwa uwatani kana kerutr i savakan. 40na temakesi 'azi itraitras kana sinsi, mawmu nu meretra' lra kanantu tinakesiyan mu kamawan kana sinsi.
41<<kemuda zi mawmau mena'u u tu rimekan na kawi i matra kanannu wadadiyan, mawmu 'azi milingaw kanannu matra na ma'izang na puwalrepus awa? 42ulra ma'izang a puwalrepus kanannu matra i inu, kuwadakuda marengay kana wadadiyan: <wadadiyan, kuwa puelakaw nannu rimekan na kawi kanannu matra> ziyamaw? inu na kitu'inavanava na trau, piyanguwayanu puelak na puwalrepus kanannu matra, zi maruwaya mena'u patulre'ay za kemuda puelak kanantu rimekan na kawi i matra kana wadadiyan.>>
na kawi zi na vuwa'
(Matay 7.16-20; 12.33-35)
43<<na 'inava na kawi 'azi mivavuwa' za kuwatreng, na kuwatreng na kawi 'azi mivavuwa' za 'inava; 44nu 'inava zi nu kuwatreng na kawi mu malrazam ta mena'u kemay kanantu vuwa'. 'azi mu kaazu kana su'asu'ar malrutr za tepur, kemazu 'azi kaazu kana su'asu'ar i savakan malrutr za budo. 45na 'inava na trau kemay kanantu anger i savakan na inepetr na 'inavayan mupana a 'inava; na kuwatreng na trau kemay kanantu anger i savakan na inepetr na kuwatrengan mupana a kuwatreng. na trau nu matemuy za eman i anger, zi marengay za eman na udung.>>
zuwaya na pukaarekezan
(Matay 7.24-27)
46<<kemuda zi kema mu venina kaninku: <Luzu a, Luzu a> mawmu 'azi mu miyaturus kananku ipatalru kanmu na ngay awa? 47marengaya ku kanmu, izu na zuwa i ngawayan kaninku, na kinger kananku ngay zi mukuwa miturusa mu, maw na kamawan za kemuda na trau awa? 48kamawan kana parahan za ruma' na trau, kemerutr pakesavak za dare', parahanaw kana danapan i itras kanantu puarekezan. na ngalun semelretrap kanizu na ruma' mu, mawmu na ruma' 'azi mahuwahu, 'alrana salaw 'inava na pinarahan. 49mawmu, izu na kinger kananku ngay zi 'azi mukuwa miturusa mu, maw na kamawan kana trau parahan za ruma' kana iniyan za puarekezan na dare' i itras, nu selretrap na zanum i verelruwan mu, na ruma' payas mureve', mukuwatreng lra salaw pakirev!>>
Právě zvoleno:
Luka 6: TPN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society in Taiwan, 2023
