Luka 5
5
i Yēsu demaulr kana temakesi
(Matay 4.18-22; Maruko 1.16-20)
1ulra paresan, i Yēsu matikezir i Gēnēsarēt kana danaw i ngaydiran, kazuwa na trau ma'etre'etr zuwa, maranger kinger kantaw za venavati kanantu vati na Viruwa i itras. 2mena'u za zuwaya tamina maziyazi kana danaw i ngaydiran, na kivavulraw muwaday kana tamina, penauwa kazu i kaitrasan semavesav kana tavukulr. 3i Yēsu muitras kanizu na tamina ni Simon, patalru kani Simon pa'iwas pakakawang kana tamina. kemayan i Yēsu, kemay kana tamina i itras panadam kana zinekalranan.
4a piya marengay mu, marengay kani Simon i intaw: <<'iwasu na tamina mukuwa kana asavak na zanum, zi inu zi nannu lralrang tavukulr kana vulraw.>>
5marengay i Simon: <<sinsi, maulep mi sa'esungan, 'azi mi karasarasa za emaeman; mawmu nu kema u marengay mu, temavukulra ku mu!>> 6kemazu zi temavukulr nazu, karasa za sazu za vulraw, pulavus mupiris na tavukulr lra. 7temuwapuwap nazu, pena'iz kana zuma na tamina na lralrang zuwa puwalranga. zuwa nazu, patemuyay mavak za vulraw kana zuwaya na tamina, pulavulavus mutenep na tamina. 8mena'u i Simon Pētēro kanini na nirekudayan mu, zi malrituzu i ngawayan kani Yēsu, marengay: <<Luzu a, 'alrazi uwaday kaninku a, maw ku na mipinamelriyan na trau!>>
9i intaw zi tu lralrang pasalaw maherareher za temavukulr kana sazu za vulraw. 10tu lralrang na alrak ni Zēbēdē i Yakob zi i Yohanē mararesan salaw maherareher. i Yēsu marengay kani Simon: <<ikakaud, kemay harem, aelak u za trau lra.>>
11tu pudalrepaw na tamina i ngaydiran kana danaw nazu, zi meretra' kana eman ziya, kurelrang lra kani Yēsu.
i Yēsu paka'inava kana malripay na trau
(Matay 8.1-4; Maruko 1.40-45)
12ulra paresan, i Yēsu kazu a saya za kazekalran, kazu ulra a sasa kuwaleng za malripay peniya i zazek na trau. a mena'u kani Yēsu i intaw, zi mihelrupu kantaw i ngawayan, kiyami kantaw marengay: <<Luzu a, nu muwai u mu, maruwa u pakakirungetr kaninku!>>
13i Yēsu pupana za lima demikes kantaw, marengay: <<muwai ku, mukirungetr u lra!>> tu lripay i zazek payas malremes lra. 14i Yēsu patalru kantaw marengay: <<amanan marengay kana trau kanini na lremak, parepayas uwa kirepana'u kana rahan, pakinsayan kantaw i inu; zi iturusi nantu kuret ni Mosē semunan patavang, uwasay kana trau mapiya za tatena' u lra mukirungetr.>>
15kemazu zi, tu ngadan ni Yēsu marekamu'ivat lra. mulepun na trau muwaazuk, kiyanger za venavati i intaw, zi maranger ziya kipaka'inava kanantu kuwalengan nazu. 16mawmu i Yēsu musaninin mudawilr mukuwa kiyanuna.
i Yēsu paka'inava kana mutuwalre'ap na trau
(Matay 9.1-8; Maruko 2.1-2)
17kazu a saya wari, penauwa za pananadam kana trau i Yēsu, ulra a papida kemay i Galili na zekazekalr zi i Yodaya, Yērusalem zuwa na Palisay na trau zi na sinsi kana kuret kemazu kemayan i trapingiran. kezang ni Luzu kurekasa kani Yēsu, pamaruwaya kantaw paka'inava kana kuwaaleng na trau. 18ulra papida a trau 'emalu za sasa a i'ezeng kana lre'ap na mutuwalre'ap na trau, maranger pusavak kantaw kana ruma', meretra' i ngawayan kani Yēsu. 19mawmu, 'alrana kakazuwanan na trau, 'azi paka'alu pusavak kantaw nazu, zi 'aluwaw puitras kana sa'uv i itras, kiyutravay na kawara, pakurelranganay na trau zi na lre'ap pulusu, tra'anay i paduk kana trau kani Yēsu i ngawayan. 20mena'u i Yēsu kanantu pakutatena'an nazu, zi marengay kanizu na mutuwalre'ap kuwaaleng na trau: <<ali, mulapus lra nannu pinamelriyan.>>
21na sinsi kana Sēsiyo zi na Palisay na trau mazayazayar marengay: <<i eman ini na trau? maruwaruwa marengay kemani na kapalavatan kemamatras na ngay! nu amelri na Viruwa i itras mu, i eman na mikezang melapus za pinamelriyan ziyamaw?>>
22i Yēsu malrazam mena'u kanantu niranganger nazu, zi marengay kanazu: <<kemuda zi kemani mu mianger awa? 23marengay kana kuwaaleng na trau <mulapus lra nu pinamelriyan> kalre'ayan? zi za marengay za <karahan kakawang> kalre'ayan nay? 24puwasay ku kanmu, Alrak na trau kazu i punapunan mikezang melapus za pinamelriyan.>> kemazu zi i intaw kema marengay kanizu na mikuwalengan mutuwalre'ap na trau: <<patalru ku kannu, karahan, elaku nannu lre'ap, uruma' lra!>>
25izu na trau payas marahan i ngawayan kana trau, melak kanantu kini'ezeng na lre'ap muruma', semenay puitras kana Viruwa i itras. 26salaw maherareheran mapiya, kemaira kemakaud semenay puitras kana Viruwa i itras marengay: <<harem kana wari mena'u mi za amelri puanger malrazam lra kana lremak!>>
i Yēsu demaulr kani Lēvi
(Matay 9.9-13; Maruko 2.13-17)
27pakalikuzan kanini na lremak mu, i Yēsu mupatraran, mena'u za sasa a kisasata na trau mingadan kani Lēvi, kemayan kana pusasatayan i itras. marengay i Yēsu kantaw: <<alamu kurelrang kaninku!>> 28zi marahan i Lēvi, meretra' kana eman ziyan, kurelrang lra kani Yēsu.
29i Lēvi kazu kanantu ruma' i intaw muramawan kani Yēsu penadang za salaw ma'izang a semasaharan; kazuwan na kisasata zi zuma na trau zuwa kurelrang kanini na semasaharan. 30ulra papida na Palisay na trau zi na muravakan kanazu na sinsi kana Sēsiyo 'ilremes zi marengay kanantu temakesi ni Yēsu: <<kemuda zi kurelrang mu kana kisasata zi na kuwaatrengan na trau mukasa mekan tremkel ziyamaw?>>
31marengay i Yēsu kanazu: <<na dalikedikan na trau 'azi kiyana'u kana ising, na mikuwalengan na trau kiyana'u kana ising. 32nanku iyazuwa tu pauwayan mu amelri demadaulr kana 'inava na trau, a mawna demadaulr kana kuwatrengan na trau muwasalr pakavekal.>>
na kiyaumalran kana 'a'iwayan
(Matay 9.14-17; Maruko 2.18-22)
33ulra a trau marengay kani Yēsu: <<tu temakesi ni Yohanē marayas 'emiway kiyanun, tu temakesi na Palisay na trau mu kemazu maresan, mawmau nannu temakesi na mekan zi trematrekel.>>
34marengay i Yēsu: <<na pinakaetim na ma'inayan nu kazu ziya kana semasaharan mu, karuwa u pa'iway kana zuwa semasaharana na trau ziyamaw? 'azi karuwa! 35mawmu uri raredek lra na wari, na pinakaetim na ma'inayan tu i aurungaw muveruk kemay kanazu i savakan, nu azu mu, 'a'iway lra nazu.>>
36marengay ziya i Yēsu za saya a paruwalruwan: <<iniyan za trau za penapiris kana vekal na kavang, zi na ipiris na inuwan trapanganay kana maluman na kavang; nu kemani mu, na vekal na kavang mupiris lra, izu na piniris na vekal na inuwan mu 'azi marepauwa kanizu na maluman. 37zi iniyan za trau melak kana vekal na kutra mavak kana maluman na kalritr na luvuk; nu kemani mu, na vekal na kutra papalretruk kana maluman na kalritr na luvuk, muipang na kutra, zi na kalritr na luvuk kakuwaatreng lra. 38na vekal na kutra 'azika'azi iavak kana vekal na kalritr na luvuk. 39iniyan za trau nu tremekel lra kana mi'ami na kutra i likuzan mu, zi maranger ziya tremekel kana vekal na kutra, nu marengay ziya i intaw mu 'inava na mi'ami na kutra kema.>>
Právě zvoleno:
Luka 5: TPN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society in Taiwan, 2023
