Luka 4
4
kilralrimaw i Yēsu
(Matay 1.1-11; Maruko 1.12-13)
1i Yēsu muruma' kemay i Yorudan na zinanuman, tu redekay na Vangesar Lu'em. na Vangesar Lu'em tu pilralrangaw i intaw mukuwa i alalas, 2kazu i kazu za makapetelr wariyan tu kasawariyan, kilralrimaw kana akuma. kanazu na wari mu, 'azi mekan za emaeman i intaw, melavat lra kana wari mu, zi savelaw lra i intaw.
3marengay na akuma kantaw: <<nu maw u nintu Alrak na Viruwa i itras mu, seratri i ini na varasa' muvalisa mutu pang!>>
4temuvang i Yēsu: <<marengay na Sēsiyo: <tu iyavaaw na trau mu 'azi mawmau kuretalrima kana aekanen.> >>
5na akuma tu pilralrangaw ziya i intaw mukuwa kana atras na kinazuwan, payas pana'u kantaw kani punapunan kana kanatanatal, marengay kantaw: 6-7<<anu semungal u kaninku mu, kanini na kezang peniya zi na piniemanan vaveray ku kannu; 'alrana ini peniya iveray lra kaninku, nu muwai ku veray kani eman mu verayanay kani eman.>>
8marengay i Yēsu: <<marengay na Sēsiyo: <sungal kani Luzu -- nannu Viruwa i itras, pakamawmau semungal kantaw!> >>
9na akuma masalr ziya tu pilralrangaw i Yēsu mukuwa i Yērusalem, tu patikeziraw i vangesar ruma' kana maraitraitras, marengay kantaw: <<nu maw u nantu Alrak kana Viruwa i itras mu, unekun mulusu kemay i kani a; 10'alranu marengay na Sēsiyo: <na Viruwa i itras patalru kanantu tēnsi iya'elaw kannu>; 11marengay ziyan: <tu i 'elrupaw u za lima nazu, 'aziya tremengal kana varasa' nannu kuy zi mavuli'.> >>
12temuvang i Yēsu: <<marengay na Sēsiyo: <ilralrimaw kani Luzu -- nannu Viruwa i itras.> >>
13na akuma kipiyayaw a marekamelrimelri na lralrimaw mu, muwaday za dika kani Yēsu.
i Yēsu kemirakaz palenak za vati i Galili
(Matay 4.12-17; Maruko 1.14-15)
14i Yēsu muruma' mukuwa i Galili; na kezang na Vangesar Lu'em kurekasa kantaw. nantu ngadan mupalenak i kazu kana pinidare'an. 15kazu kana kurisaesayan na waazukan ruma' panadam kana trau, na tratrautrau ziyan mu pulihu puitras kantaw.
i Yēsu kikarasak i Nazalē
(Matay 13.53-58; Maruko 6.1-6)
16i Yēsu zuwa i Nazalē -- kanantu kina'izangan na kinazuwan. kazu kana katalaulepan na wari, maw kemazu mukuwa kana waazukan ruma' i Yodaya. matikezir i intaw miip kana Sēsiyo, 17ulra a trau veray kantaw za valray ni Isaya na patralritralri. venakar kana valray i intaw, atrevung za saya vinavalrayan za:
18tu redekay ku na Lu'em ni Luzu,
'alrana palimi' lra kaninku i intaw,
papalenakaw ku za 'inava na vati kana kalramalraman na trau.
pakarun i intaw kaninku venavati pakalrazam:
na kihuliyo mu, kivakevak;
na mavutri' mu, nana'u;
na tinaraeman kidepel mu, kivuwar;
19pawnung venavati pakalrazam kani Luzu za vavaaw kanantu zinekalranan na lramanan na 'ami.
20tu lulunaw na valray ni Yēsu, tu pareveliyasaw veray kana puwalrang i waazukan ruma', zi kemayan. tremeketrek mena'u kantaw i waazukan ruma' na trau mapiya, 21zi marengay i intaw kanazu: <<harem kana wari, nanmu kiningeran ini na vati kana Sēsiyo mu mula'esi lra.>>
22na trau mapiya pasalaw malrazam kantaw, kanantu nirengay izu na puanger na ngay mu salaw mare'alav. marengay nazu: <<ini na trau mu amelri nantu alrak ni Yosēf ziyamaw?>>
23marengay i Yēsu kanazu: <<iniyan za kalralrivakan, i inmu pakalrangan kanini na saya na piningangay marengay kaninku: <ising a, paka'inavayu nu zazek i inu a!> kakuwa mu ziyan marenagay kaninku za: <naniyam kiningeran nu ikakuda na lremak i Kabēnum, zi kuwazuyu kemakuda pupana kanannu zekalr!> >> 24marengay ziya i Yēsu: <<penatezelra ku marengay kanmu, na patralritralri kazu kanantu zekalr a kinaaziyu ziyan 'azi kikasemangal kiyatrevung za trau. 25kingeri a, kazu kana ziday na patralritralri i Ēliya, i Iseraēl tatena' ulra kazuwan a inavangulr. a azu, patrutru teluwa zi parekazuwa 'ami 'amenin 'azi 'emudalr, pakirev a savelawan kakaiyaiyan ziya. 26mawmu i Ēliya 'azi pinakarun mukuwa kirepana'uwa kanazu kani emaeman, mawmu mawmau mukuwa i Siton kana pinidare'an i Sarēvad za sasa a inavangulr i kazu. 27kazu kanantu ziday ni Ēlisiya na patralritralri, i Iseraēl ulra kazuwan na mikuwalengan za malripay, mawmu pakazuma kana Siliya na trau i Nayman, iniyan za sasa a trau kikirungetr.>>
28a kinger lra kanini na ngay, na trau i waazukan ruma' mapiya matemuy za 'ilremesan. 29marahan mapiya, kemezeng kantaw pupatraran kana kazekalran, murung kantaw mukuwa kana tengalr i itras (pinarahan i zenan i itras tu kazekalran nazu), semukun putani kantaw.
30mawmu i Yēsu 'azi araeman kemakawang i savakan kana mulepun na trau mupatraran.
na kipalrar a sasa na trau
(Maruko 1.21-28)
31i Yēsu mukuwa i Galili kana kazekalran i Kabēnum. katalaulepan na wari, kazu i kazu panadam za trau i intaw. 32na kinger kanantu ipanadam na trau ziya mu salaw maherareher, 'alrana salaw mikezang tu ngay. 33kana waazukan ruma' i savak, ulra a sasa kipalrar na trau, kematamuni 'emuy'uy: 34<<ay! na Nazalē i Yēsu, kemuda zi meraringiz u kaniyam? zuwa u tremepuwa kaniyam ziyamaw? malrazam ku za i eman u; maw u na kinavangesar kana Viruwa i itras!>>
35maselru i Yēsu kanizu na palrar marengay: <<apapeng, kadika upana kemay kanantu zazek kanini na trau!>> na palrar temapelra' kanizu na trau i ngawayan kana trau, zi mupatraran kemay kanantu zazek, 'azi venuli' kantaw za pakiwalawalay.
36pasalaw maherareher mapiya, mazayazayar marengay: <<a eman pauwayan i ini awa? ini na trau maruwaruwa mitrepa za kezang zi mikezang demikes kana palrar, zi mupana lra na palrar!>> 37kemazu mu tu ngadan ni Yēsu mupalenak lra iyaiyan i kazu kana pinidare'an.
i Yēsu paka'inava kana kazuwan na kuwaaleng na trau
(Matay 8.14-17; Maruko 1.29-34)
38i Yēsu muveruk kana waazukan ruma', mukuwa kana ruma' ni Simon. kuwaaleng i tainataw na 'azin ni Simon, zemelretr; kiyami kani Yēsu za kipuwalrangan nazu. 39i Yēsu mukuwa mena'uwa kantaw, matikezir kantaw i trapingiran, maselru kana vi'asan, zi mulusu lra na vi'asan. payas marahan i intaw, temara kanazu.
40a muwatenep na kadaw mu, kazuwan na mikuwalengan za marekamelrimelri na trau mu tu pilralrangaw za tu niruma'enan zuwa kirepana'uwa kani Yēsu; i Yēsu 'emaperez kanazu kurisaesa, paka'inava kanazu lra. 41ulra ziya a palrar kemay kana papida na trau i zazek mupana, 'emuy'uy: <<maw u Alrak kana Viruwa i itras!>>
maselru i Yēsu kanazu, 'azi muwai parengay kanazu, 'alrana malrazam nazu za maw i Kiristo i intaw.
i Yēsu palenak za vati i waazukan ruma'
(Maruko 1.35-39)
42a 'iyadenan mu, i Yēsu mupana i kazekalran mukuwa za mudawilr na kinazuwan. maaya' i iyan ziya mapiya kantaw, atrevung lra, maranger venilin kantaw, 'azi maranger puveruk kantaw. 43mawmu i Yēsu marengay kanazu: <<'azi ku ka'azi kemazu mukuwa kana zuma na kazekalran palenaka za kireeman kana Viruwa i itras kanantu pinitrepa na kezang na fukuing, 'alrana maw ku na muramawan kanini na kiyakarunan zi zuwa kipakaruna.>>
44kemazu zi, i Yēsu mukuwa i Yodaya kana kurisaesayan na waazukan ruma' palenaka za vati.
Právě zvoleno:
Luka 4: TPN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society in Taiwan, 2023
