Luka 3
3
na semasuwap i Yohanē tu ipalenak na vati
(Matay 3.1-12; Maruko 1.1-8; Yohanē 1.19-28)
1na Hongti i Roma i Tibēriya a kazu ziyan za pukapulu' zi lruwatra 'ami mu, i Pontiyo Pilato mutu sotok i Yodaya, i Hērodē mutu yawan i Galili, tu wadiyan i Filip mutu yawan i Ituriya zi Tērakonitē, i Lusaniya mutu yawan i Abilēne, 2mutu tinuma'izang na rahan i Anas zi i Kayafa. a azu, nantu ngay na Viruwa i itras meredek kana kazu i alalas na alrak ni Zakaliya i Yohanē. 3i Yohanē tu paketrepay makawang lra kana pinidare'an i Yorudan na zinanuman, palenak marengay: <<uwasalr pakavekal i inmu, kisuwap, na Viruwa i itras lalapus kananmu pinamelriyan.>> 4kamawan kana valray na patralritralri i Isaya tu vinavalrayan:
i alalas ulra a trau 'emuy'uy marengay:
muramawan kani Luzu penadang kanantu dadalan,
temulre'ay papatezelr nantu kakawangan na dalan.
5na sayasaya na verelruwan sasuvuken patemuy;
na ma'izang na makiteng na zenazenan kirayasen.
na patralikuliku na dalan papatezelren;
na zemerukurukun na dalan huwasehusaw pakirayasen.
6na tratrautrau ziyan nana'u kanantu ivavaaw na Viruwa i itras.
7ma'etratre'etr na trau, mupana zuwa kiyasuwap kani Yohanē. i Yohanē marengay kanazu: <<i inmu nanni na mipadawak na unan! tu sayvang na Viruwa i itras uri raredek lra, kararuwa mi penusar kirevulri kema mu ziyamaw? 8pimanayu na paelrangan puwasay za muasalr pakavekal mu lra. amanan mianger za naniyam temuwamuwan i Aburaham zi kararuwa mi penusar kirevulri kana sayvang ikakuwa mianger. marengaya ku kanmu, na Viruwa i itras maruwa melak kananni na varasa' muramawan kani Aburaham demaway za temamuwan! 9iretra' lra na surip kana kawi i rakaz, na 'azi mivavuwa' kana 'inava na kawi mu aeteken peniya, 'a'atelren kana apuy i savakan.>>
10kiyumalr na zinekalranan kantaw: <<nu kemazu mu, kemakudaya mi awa?>>
11temuvang i Yohanē: <<na mipakesavak za zuwaya mu, vaveray za saya kana iniyan; na miakanen mu, kemaniya.>>
12ulra papida na kisasata kemazu zazuwa kisuwap; kiyumalr kani Yohanē nazu: <<sinsi, kemakudaya mi za eman?>>
13marengay i intaw kanazu: <<amanan palavat kana kuret melak kana sata.>>
14ulra papida na hitay kemazu zuwa kiyumalr kantaw: <<i iniyam mu? kemakudaya mi za eman?>>
marengay i intaw kanazu: <<i'a'araw melak za paisu, i'uwali'ulid; pakumawa kananmu inuvalesan.>>
15na zinekalranan kiyalriman i anger mengangara, kemiangeanger mapiya, i Yohanē kamaw i Kiristo. 16mawna kemani zi marengay i Yohanē kanazu: <<ku suwapay mu za zanum; mawmu, ulra a sasa maramikezang kaninku uri zazuwa, arusay nu paruveli ku kanantu melapus kuse mu 'azi kirepa'uwa. tu i suwapay mu kana Vangesar Lu'em zi na apuy. 17nantu lima melak kana tripe', trematrapu kemirungetr kana emi, melrasez kana emi pusavak i 'alili; na 'etra mu, tu i vavatri'aw kana 'azi ma'a'evut na apuy.>>
18i Yohanē palenak za fukuing kana zinekalranan, manay kana marekamelrimelri na kudayan papuanger kanazu. 19mawmu i Yohanē maselru kana yawan i Hērodē, 'alrana tu pi'azinaw nantu 'azin ni waditaw i Hērodēya, zi kemakuda ziya sazu na kuwatreng na lremak. 20i likuzan mu kemakuda lra marapakirev a saya kuwatreng na lremak i intaw, mawna tu imengaw i Yohanē i imengan.
kisuwap i Yēsu
(Matay 3.13-17; Maruko 1.9-11)
21na zinekalranan kisuwap mapiya, zi i Yēsu zuwa kisuwap. a kiyaanun mu, mutruwalr na lingatr, 22na Vangesar Lu'em mizazek mulusu kanantu zazek, kamawan za tutur. ulra a lrengaw kemay i itras mulusu, marengay: <<ninku kinalraman na Alrak i inu, misaharan ku kannu.>>
trungulran ni Yēsu
(Matay 1.1-17)
23i Yēsu a kemirakaz palenak kana fukuing mu, karuwa za makatelun tu 'ami. kazu kanantu iyana'u za trau mu, nintaw alrak ni Yosēf, i Yosēf mu nintaw alrak ni Hēli. 24i Hēli mu nintaw alrak ni Matat, i Matat mu alrak ni Lēvi, i Lēvi mu alrak ni Mēliki, i Mēliki mu alrak ni Yana, i Yana mu alrak ni Yosēf, 25i Yosēf mu alrak ni Matatēya, i Matatēya mu alrak ni Amos, i Amos mu alrak ni Nahum, i Nahum mu alrak ni Ēsli, i Ēsli mu alrak ni Nakay, 26i Nakay mu alrak ni Mahat, i Mahat mu alrak ni Matatēya, i Matatēya mu alrak ni Simēn, i Simēn mu alrak ni Yosēk, i Yosēk mu alrak ni Yoda, 27i Yoda mu alrak ni Yoanan. i Yoanan mu alrak ni Rēsa, i Rēsa mu alrak ni Zērubabēl, i Zērubabēl mu alrak ni Salatiēl, i Salatiēl mu alrak ni Nēri. 28i Nēri mu alrak ni Mēliki, i Mēliki mu alrak ni Adi, i Adi mu alrak ni Kosam, i Kosam mu alrak ni Ēlumadam, i Ēlumadam mu alrak ni Ēre, 29i Ēre mu alrak ni Yosuwa. i Yosuwa mu alrak ni Ēliēzēr, i Ēliēzēr mu alrak ni Yorim, i Yorim mu alrak ni Matat, i Matat mu alrak ni Lēvi. 30i Lēvi mu alrak ni Simēon, i Simēon mu alrak ni Yoda, i Yoda mu alrak ni Yosēf, i Yosēf mu alrak ni Yonam, i Yonam mu alrak ni Ēliyakim. 31i Ēliyakim mu alrak ni Mēliya, i Mēliya mu alrak ni Mēna, i Mēna mu alrak ni Matada, i Matada mu alrak ni Natan, i Natan mu alrak ni Davidē. 32i Davidē mu alrak ni Yēsi, i Yēsi mu alrak ni Obēd, i Obēd mu alrak ni Boas, i Boas mu alrak ni Salēmon, i Salēmon mu alrak ni Nasun. 33i Nasun mu alrak ni Aminadab, i Aminadab mu alrak ni Ademin, i Ademin mu alrak ni Aruni, i Aruni mu alrak ni Hēsron, i Hēsron mu alrak ni Pēres, i Pēres mu alrak ni Yoda, 34i Yoda mu alrak ni Yakob, i Yakob mu alrak ni Isak, i Isak mu alrak ni Aburaham, i Aburaham mu alrak ni Tēra, i Tēra mu alrak ni Nahor, 35i Nahor mu alrak ni Sēruk, i Sēruk mu alrak ni Rēu, i Rēu mu alrak ni Valēk, i Valēk mu alrak ni Ēbēr, i Ēbēr mu alrak ni Sala, 36i Sala mu alrak ni Kaynan, i Kaynan mu alrak ni Aruvakusatē, i Aruvakusatē mu alrak ni Sēm, i Sēm mu alrak ni Nowa, i Nowa mu alrak ni Lamēk, 37i Lamēk mu alrak ni Mētusala, i Mētusala mu alrak ni Ēnok, i Ēnok mu alrak ni Yalēd, i Yalēd mu alrak ni Mahalalēl, i Mahalalēl mu alrak ni Kaynan, 38i Kaynan mu alrak ni Ēnos, i Ēnos mu alrak ni Sēt, i Sēt mu alrak ni Adam, i Adam mu alrak na Viruwa i itras.
Právě zvoleno:
Luka 3: TPN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© The Bible Society in Taiwan, 2023
