Secunnu Matteu 25
25
1Allura lu regnu di li celi s’ assimigghirrà a deci virgini, ca pigghiannu li soi lucerni nisceru ncontra a la spusu ed a la spusa.
2Ma cincu d’ iddi eranu sciocchi, e cincu giudiziusi:
3E li cincu sciocchi, avennu pigghiati li lucerni, nun si pigghiaru cu iddi l’ ogghiu:
4Li giudiziusi però si pigghiaru cu li lucerni li ciaschi cu l’ ogghiu.
5E lu spusu essennu in ritardu, a tutti cci vinni lu sonnu e s’ addurmisceru.
6Però a menzannotti si ntisi na vuci: Eccu ca veni lu spusu, itici a lu ncontru.
7Allura si suseru tutti ddi virgini, e aggiustaru li soi lucerni.
8Li sciocchi però dissiru a li giudiziusi: Datinni di lu vostru ogghiu: giacchì li nostri lucerni s’ astutanu.
9Li giudiziusi rispusiru, e dissiru: Siccomu nun abbastirria nè a nuatri, nè a vuautri, iti cchiuttostu unni si vinni, ed accattativillu.
10Ma mentri si lu javanu ad accattari, vinni lu spusu: e chiddi, ca eranu pronti, traseru cu iddu a lu zitaggiu, e la porta fu chiusa.
11A l’ ultimu vinniru puru l’ autri virgini, dicennu: Signuri, Signuri, aprinni.
12Ma iddu rispusi e dissi: In virità vi dicu, iu nun vi canusciu.
13Perciò stati vigilanti, ca nun sapiti nè lu jornu, nè l’ ura.
14Giacchì comu un omu jennu a longu viaggiu, chiamau li soi servi, e cci detti in manu li soi beni.
15E detti ad unu cincu talenti, a nautru però dui, ed a nautru unu, e ad ognunu secunnu la so abilità, e subitu partiu.
16E chiddu, chi avia avutu li cincu talenti, li jiu a niguziari, e nni guadagnau nautri cincu.
17Di la stissa manera chiddu, chi nn’ avia ricivutu dui, nni guadagnau nautri dui.
18Ma chiddu, chi nn’ avia ricivutu unu, si nni jiu, fici un fossu ’n terra, ed ammucciau li dinari di lu so patruni.
19E doppu tantu tempu turnau lu patruni di ddi servi, e cci dumannau li cunti.
20E vinennu chiddu, chi avia ricivutu li cincu talenti, cci nni presentau nautri cincu, dicennu: Signuri, mi cunsignasti cincu talenti, ed eccunni nautri cincu, ca aju guadagnatu.
21Lu so patruni cci dissi: Bravu, servu bonu e fidili, giacchì fusti fidili pri lu pocu, ti ncarichirrò di l’ assai: veni a godiri cu lu to patruni.
22Vinni poi chiddu, chi avia ricivutu dui talenti, e dissi: Signuri, mi cunsignasti dui talenti, eccunni nautri dui, ca aju guadagnatu.
23Lu so patruni dissi: Bravu, servu bonu e fidili, giacchì fusti fidili pri lu pocu, ti ncarichirrò di l’ assai: veni a godiri cu lu to patruni.
24Ed essennu vinutu chiddu, chi avia ricivutu un talentu, dissi: Signuri, sacciu, ca sì un omu duru, ca meti, unni nun hai siminatu, ed arricogghi, unni nun hai jittatu nenti:
25E mi scantavi, e jivi ad ammucciari lu to talentu sutta terra. Eccu ccà cc’ è la robba tua.
26Ma lu patruni cci rispusi, e dissi: Servu tintu, e lagnusu, sapivi, ca metu, unni nun aju siminatu, ed arricogghiu, unni nun aju jittatu:
27Duvivi dunca dari li mei dinari a li mircanti, e vinennu avria ricivutu certu lu miu cu li frutti.
28Livaticci perciò lu talentu, e datilu a chiddu, chi avi li deci talenti.
29Giacchì a chiddu, chi avi cci sarrà datu, e si truvirrà ntra l’ abbunnanza: ma a chiddu, chi nun avi, cci sarrà livatu puru chiddu, chi pò aviri.
30E lu servu inutili jettatilu ntra li tenebri di fora: ddà cci sarrà chiantu, e scrusciu di denti.
31Quannu poi vinirrà lu Figghiu di l’ omu ntra la sua maistà, e tutti l’ ancili cu iddu, allura sidirrà supra lu tronu di la so gloria:
32E s’ arricugghirrannu avanti ad iddu tutti li genti, e li spartirrà l’ uni di l’ autri, comu lu pasturi sparti li pecuri di li crapetti:
33E mittirrà li pecuri a la so dritta, e li crapetti a la manca.
34Allura lu re dirrà a chiddi, chi sunnu a la so dritta: Viniti, biniditti da me Patri, pigghiati possessu di lu regnu preparatu pri vuautri di la criazioni di lu munnu.
35Giacchì appi fami, e mi dastivu a manciari: appi siti, e mi dastivu a viviri: era furasteri, e m’ accugghistivu:
36Era nudu, e mi cummigghiastivu: malatu, e mi visitastivu: era carzaratu, e mi vinistivu a vidiri.
37Allura cci rispunnirrannu li giusti, dicennu: Signuri, quannu mai ti vittimu affamatu, e ti dettimu a manciari: assitatu, e ti dettimu a viviri?
38Quannu ti vittimu furasteri, e ti dettimu ricettu: o nudu, e ti cummigghiammu?
39O quannu ti vittimu malatu, o carzaratu, e ti vinnimu a visitari?
40E lu re rispunnennu, cci dirrà: In virità vi dicu, quannu avriti fattu qualchi cosa pri lu cchiù minimu di sti mei fratelli, lu facistivu a mia.
41Allura dirrà puru a chiddi, chi sarrannu a la manca: Alluntanativi di mia, mmaliditti, ntra lu focu eternu, ca è preparatu pri lu diavulu, e pri li soi ancili.
42Giacchì appi fami, e nun mi dastivu a manciari: appi siti, e nun mi dastivu a viviri:
43Era furasteri, e nun m’ accugghistivu: nudu, e nun mi cummigghiastivu: malatu, e carzaratu, e nun mi visitastivu.
44Allura rispunnirrannu puru chisti, dicennu: Signuri, quannu mai ti vittimu affamatu, o assitatu, o furasteri, o nudu, o malatu, o carzaratu, e non t’ avemu ajutatu?
45Allura cci rispunnirrà, dicennu: In virità vi dicu: Ogni vota, ca nun l’ aviti fattu ad unu di li cchiù minimi di chisti, mancu l’ aviti fattu a mia.
46E chisti irrannu ntra li peni eterni: li giusti però ntra la vita eterna.
Právě zvoleno:
Secunnu Matteu 25: SCN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
First published in 1860 and 1861.
