Secunnu Matteu 26
26
1E successi, ca doppu ca Gesù finiu tutti sti discursi, dissi a li soi discipuli:
2Sapiti, ca doppu dui jorna è Pasqua, e ca lu Figghiu di l’ omu sarrà cunsignatu pri essiri crucifissu.
3Allura si riuneru li capi di li sacerdoti, e l’ anziani di lu populu ntra l’ atriu di lu principi di li sacerdoti, chi si chiamava Caifassu:
4E tinniru cunsigghiu pri catturari cu ngannu a Gesù, e farlu muriri.
5Ma dicevanu: No di festa, acciocchì nun avissi a succediri tumultu ntra lu populu.
6Ed essennu Gesù a Betania in casa di Simuni lu libbrusu,
7Si cci avvicinau na fimmina tinennu un vasu d’ alabastru cu nguentu prizziusu, e lu spargiu supra la so testa, mentri era a tavula.
8Vidennu chistu i discipuli, s’ indignaru, dicennu: E pirchì stu sfragu?
9Giacchì s’ avria pututu chistu vinniri caru, e darisi a li poviri.
10Ma Gesù sapennulu, cci dissi: Pirchì siddiati a sta fimmina? Giacchì ha fattu un’ opera bona pri mia.
11Pirchì avriti sempri li puvireddi cu vuautri: ma a mia nun m’ avriti sempri.
12Giacchì mittennu idda stu nguentu supra lu me corpu, lu fici comu pri sepellirimi.
13In virità vi dicu, ca in qualunqui parti di lu munnu sarrà pridicatu stu vancelu, si dirrà puru chiddu, chi idda avrà fattu pri so memoria.
14Allura jiu unu di li dudici, ca si chiamava Giuda Iscarioti, a truvari li capi di li sacerdoti:
15E cci dissi: Chi mi vuliti dari, ca iu vi lu cunsignu ntra li manu? Ed iddi cci proposiru trenta muniti d’ argentu.
16E d’ allura in poi circava l’ occasioni di tradirlu.
17Ma lu primu jornu di l’ azzimi li discipuli jeru unni Gesù, dicennucci: Unni voi, ca t’ apparicchiassimu pri fari la Pasqua?
18E Gesù rispusi: Jiti a la cità unni un tali, e diciticci: Lu Maistru dici: Lu me tempu s’ avvicina, farrò la Pasqua in casa tua cu li mei discipuli.
19E li discipuli ficiru secunnu cci aveva ordinatu Gesù, e prepararu la Pasqua.
20Ed arrivata la sira, era assittatu a tavula cu li soi dudici discipuli.
21E mentri iddi manciavanu, cci dissi: In virità vi dicu, ca unu di vuautri mi tradirrà.
22Ed iddi afflitti summamenti, accuminzaru a diri ad unu ad unu: Sugnu forsi iu, o Signuri?
23Ed iddu rispusi, e dissi: Cui metti cu mia la manu ntra lu piattu, chistu mi tradirrà.
24Lu Figghiu di l’ omu certu si nn’ avi a jiri, comu è scrittu pri iddu: guai però a chidd’ omu, da cui lu Figghiu di l’ omu sarrà tradutu: sarria statu megghiu pri dd’ omu, chi nun fussi mai natu.
25E Giuda, ca lu tradiu rispunnennu, dissi: Forsi sugnu iu, Maistru? Cci dissi: Tu lu dicisti.
26E mentri iddi cenavanu, Gesù pigghiau lu pani, lu binidiciu, e lu rumpiu, e lu detti a li soi discipuli, e dissi: Pigghiati, e manciati: chistu è lu me corpu.
27E pigghiannu lu calici, rinniu grazii: e cci lu detti, dicennu: Viviti di chistu tutti.
28Giacchì chistu è lu sangu miu di lu novu tistamentu, lu quali sarrà spargiutu pri genti assai in rimissioni di li piccati.
29Ora iu vi dicu, ca nun vivirrò da ora ’n poi di stu fruttu di la viti, sinu a ddu jornu, ca lu vivirrò novu cu vuautri ntra lu regnu di lu Patri miu.
30E cantatu l’ innu, jeru a lu munti di l’ Olivitu.
31Allura cci dici Gesù: Tutti vuautri patirriti scannalu pri causa mia, ntra sta notti. Giacchì è scrittu: Nsirtirrò lu pasturi, e si spirdirrannu li pecuri di la greggi.
32Ma doppu chi risuscitirrò, vinirrò avanti di vuautri in Galilia.
33Ma Petru rispunnennu, cci dissi: E si tutti avrannu scannalu pri tia, iu certu nun sarrò scannaliatu.
34Gesù cci dissi: Ti dicu in virità, ca sta notti, prima ca lu gaddu cantassi, mi nighirrai tri voti.
35Petru cci dissi: Ancurchì iu duvissi muriri cu tia, nun ti nighirrò. E lu stissu dissiru tutti li discipuli.
36Allura Gesù jiu cu iddi ntra un locu chiamatu Getsemani, e dissi a li soi discipuli: Assittativi ccà, mentri iu vaju ddà a fari orazioni.
37E pigghiannusi cu iddu Petru, e li dui figghi di Zebedeu, accuminzau ad angustiarisi e ad esseri malinconicu.
38Allura cci dissi: La me anima è afflitta nsinu a la morti: ristativi ccà, e vigghiati cu mia.
39E avanzannusi tanticchia, si jittau facci pri terra, prigannu, e dicennu: Patri miu, si è possibili, si livassi d’ avanti a mia stu calici; ma però no comu vogghiu iu, ma comu voi tu.
40E jiu unni li soi discipuli, e li truvau durmennu, e dici a Petru: Accussì nun putistivu vigghiari cu mia un’ ura?
41Vigilati, e prigati, ca nun trasissivu in tentazioni. Lu spiritu veramenti è prontu, ma la carni è debuli.
42E si nni jiu pri la secunna vota, e prigau, dicennu: Patri miu, si nun pò stu calici passari senza chi mi lu vivissi, sia fatta la tua volontà.
43E turnau di novu, e li truvau durmennu: giacchì l’ occhi d’ iddi eranu aggravati.
44Ed avennuli lassatu, si nni jiu di novu, e prigau la terza vota, dicennu li stissi palori.
45Allura jiu unni li soi discipuli, e cci dissi: Durmiti ora, e ripusativi: eccu ca s’ avvicinau l’ ura, e lu Figghiu di l’ omu sarrà cunsignatu ntra li manu di li piccaturi.
46Susitivi, jamuninni: eccu ca s’ avvicina chiddu, ca mi tradirrà.
47Mentri stava parrannu, eccu Giuda unu de li dudici, e cu iddu una gran turba cu spati e vastuni mannati da li capi di li sacerdoti, e da l’ anziani di lu populu.
48E chiddu, ca lu tradiu, cci detti ad iddi lu signali, dicennu: Chiddu, ca iu vasirrò, è iddu, catturatilu.
49E a lu mumentu ncugnannusi a Gesù, dissi: Diu ti salvi, Maistru. E lu vasau.
50Gesù cci dissi: Amicu, pri chi cosa vinisti? Allura si ficiru avanti, e misiru li manu di supra a Gesù, e lu pigghiaru.
51Ed eccu unu di chiddi, ca era cu Gesù, stinnennu la manu, tirau la so spata, e firennu un servu di lu capu di li sacerdoti cci tagghiau l’ oricchia.
52Allura Gesù cci dissi: Rimetti la to spata ntra lu so locu. Giacchì tutti chiddi, chi darrannu di manu a la spata, murirrannu di spata.
53Chi ti cridi, ca nun pozzu prigari lu Patri miu, pri mannarimi ora cchiù di duduci legioni d’ ancili?
54E comu si verifichirrianu li Scritturi, ca avi a succediri accussì?
55Ntra ddu puntu dissi Gesù a li turbi: Comu si fa cu ’n assassinu niscistivu cu spati e cu vastuni pri vinirimi a pigghiari: ogni jornu mmenzu di vuautri sideva nsignannu ntra lu tempiu, e nun mi pigghiastivu.
56E tuttu chistu è successu, acciocchì si verificassiru li Scritturi di li profeti. Allura tutti li discipuli, lassannulu, si nni fujeru.
57Ma chiddi affirrannu a Gesù, lu purtaru a Caifassu lu capu di li sacerdoti, unni s’ arricugghieru li Scribi e l’ anziani.
58Petru però l’ accumpagnava a longa manu nsinu a l’ atriu di lu capu di li sacerdoti. E trasennu dintra, s’ assittava cu li ministri, pri vidiri la fini.
59Ma li capi di li sacerdoti, e tuttu lu cunsigghiu circavanu un testimoniu fausu contra Gesù, pri purtarlu a la morti:
60E nun lu truvavanu, benchì cci fussiru tanti testimonj fausi. Ma finalmenti vinniru dui testimonj fausi,
61Li quali dissiru: Iddu ha dittu: Pozzu sdirrubbari lu tempiu di Diu, e doppu tri jorna rifabbricarlu.
62Allura lu capu di li sacerdoti susennusi, cci dissi: Nun rispunni nenti a chistu, ca iddi dicinu contra di tia?
63Ma Gesù nun parrava. E lu capu di li sacerdoti cci dissi: Ti scunciuru pri parti di lu Diu vivu, ca nni dicissi, si tu sì Cristu figghiu di Diu.
64Gesù cci rispusi: Tu lu dicisti. Anzi vi dicu, ca cchiù tardu vidirriti lu Figghiu di l’ omu assittatu a la dritta di la maistà di Diu vinennu ntra li nuvuli di lu celu.
65Allura lu capu di li sacerdoti sfardau li soi vistimenti, dicennu: Bestemiau: chi bisognu avemu cchiù di testimonj? eccu ca ora sintistivu la bestemia:
66Chi vi nni pari? E chiddi rispunnennu dissiru: È reu di morti.
67Allura cci sputaru ’n facci, e cci dettiru pugna, ed autri cci dettiru timpuluni,
68Dicennu: Addimina Cristu, cui è, ca ti vastuniau?
69Petru però era assittatu fora ntra l’ atriu: e si cci ncugnau na criata, dicennu: Tu puru eri cu Gesù di Galilia.
70Ed iddu nigau avanti a tutti, dicennu: Nun sacciu chiddu, chi dici.
71E niscennu iddu di la porta, lu vitti nautra criata, e dissi a chiddi, ca eranu ddà: Chistu puru era cu Gesù Nazarenu.
72E nigau di novu cu juramentu: Iu nun l’ aju canusciutu mai.
73E doppu un pizzuddu si ncugnaru chiddi, chi cc’ eranu, e dissiru a Petru: Veramenti tu puru sì unu d’ iddi: giacchì lu to parrari lu fa a vidiri.
74Allura accuminzau a mannarisi jastimi, ed a spirgiurari, ca nun avia mai canusciutu tali omu. E subitu lu gaddu cantau.
75E Petru si rigurdau di li palori di Gesù, ca dissi: Prima ca lu gaddu cantassi, mi nighirrai tri voti. E nisciutu fora chianciu amaramenti.
Právě zvoleno:
Secunnu Matteu 26: SCN
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
First published in 1860 and 1861.
