HOSIA 11
11
Wɩa cho Iziral tɩŋŋaa wɩaa
1LA TƖƖNA sɩ, “Iziral fa sɩ ŋaa bii-bie, mɩ chou nɛ,
a yɩrʋ a kaa lɩɩ Ijipiti tinteeŋ lɛ.
2Ama dɩ mɩ yɩrʋ magɛ ŋɩɩ kala ma,
ʋ yie fa kagɛ mɩ lɛ a mʋ dɩ-bolii.
Ʋ yie kpaarɛ vene-la ba sɩɩ yɩrɛ Baal
a nyɩgɛ kʋsʋɔrʋsʋŋ pɩpɩ tɔŋŋɔɔ.
3Mɩ nɛ Nɩɩ-la fa sɩ dagɛ Efirem ʋ vɛŋ.
Mɩ nɛ kɛŋ ʋ nɩsɩŋ lɛ,
ama ʋ bɩ jɩŋ arɩ
mɩ nɛ Nɩɩ-la sɩ beŋ ʋ nyuŋ.
4Mɩ nɛ kɛnʋ vɛŋ arɩ nuhuobiine chaachiliŋ
a kɛnʋ arɩ chonuŋ.
Mɩ nɛ lɩɩsʋ hɛɛŋ lɛ,
aŋ tɩtɩa chɔgɩlɛ a dɩɛsʋ.
5Ʋ sɩ vɩa dɩ ʋ mɩɩra kɔ mɩ teeŋ,
ŋɩɩ-na, ʋ jaŋ mɩɩra mʋ Ijipiti tinteeŋ,
Asiiria kuoro jaŋ benu.
6Laalɩŋ jaŋ gɩrɛ dɩ tokobiee lɩlɩgɩsɛ ʋ tabalaa lɛ,
a bori ʋ boi-baalaa daadoloo,
a cheyu dɩ wʋbɔmɔ-la ʋ sɩ bɩɩna dɛrɛ.
7Mɩ nɩaa kɛŋ ba tʋɔŋ dɩ ba mɩɩrɛ mɩ harɩŋ nɛ.
Dɩ ba nɛ paala sʋla yɩrɛ mɩ-na Wɩa sɩ kɩɩ kʋŋkala ma,
mɩ bɩ jaŋ pɛ ba lɛ.
8Efirem, ɛɛ nɛ mɩ jaŋ ŋaa a joŋuŋ ta?
Iziral, ɛɛ nɛ mɩ jaŋ ŋaa a joŋuŋ pa?
Ɛɛ nɛ mɩ jaŋ ŋaa a dɔgʋsʋŋ
a nagɛ mɩ sɩ ŋaa ŋɩɩ taŋ-la ba sɩɩ yɩrɛ Adɩma lɛ?
Ɛɛ nɛ mɩ jaŋ ŋaa a cheyiŋ a nagɛ mɩ sɩ chei taŋ-la ba sɩɩ yɩrɛ Zeboyim ŋɩɩ?
Mɩ tʋɔbɩɩnaa kpaa bʋlɩa nɛ,
mɩ tʋɔŋ ka wɩɩ ŋ lɛ nɛ.
9Mɩ bɩra bɩ jaŋ faasa na baanɩŋ,
mɩ bɩra bɩ jaŋ chei Efirem.
Mɩ nɛ Wɩa, mɩ bɩ nuhuobiiŋ ŋaa,
mɩ bɩ disiniŋ kɛnɛ, mɩ hɛ ma tʋɔŋ nɛ.
Mɩ bɩ jaŋ kɛŋ baanɩŋ a kɔ ma lɛ.
10Mɩ nɩaa jaŋ to mɩ-na ba TƖƖNA harɩŋ,
mɩ jaŋ huosi a nagɛ naachigiŋ.
Dɩ mɩ nɩɩ huosi,
mɩ nɩaa jaŋ lɩɩ wɩɩpɔsʋŋ dɩɩrɩŋ kɔ a chichel.
11Ba jaŋ nagɛ diibii-laalɩŋ
a lɩɩ Ijipiti tinteeŋ,
a lɩɩ Asiiria tinteeŋ a nagɛ kokosuŋ.
Mɩ jaŋ bɩra holliba ba dɩɩsɩŋ lɛ.
La TƖƖNA nɛ bʋla.”
Iziral tɩŋŋaa ŋaa wʋbɔŋŋɔɔ
12Wʋnyɩɛrɩŋ nɛ Efirem kaa tɔ mɩ hɛ
ka Iziral dɩa nɩaa ma nyɩnyɩsɛmɛ.
Juda nɩaa ma haa to vʋɩyaa nɛ,
a vɩa Wɩa sɩ bɩ disiniŋ kɛnɛ.
Právě zvoleno:
HOSIA 11: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014