HOSIA 10
10
Ba jaŋ kɛŋ Iziral tɩŋŋaa mʋ yoŋ-baga a tɩŋ ba wʋbɔŋŋɔɔ wɩaa
1Iziral fa nagɛ girep tɩa sɩ jɛrɛ woruŋ nɛ,
a nɩnɛŋ woruŋ.
Ʋ nɛnɛɛ sɩ kʋ yʋgɛ woruŋ ŋɩɩ,
ʋ saa veŋ-kpaarɛ korunuŋ yʋgɛ.
Ʋ tinteeŋ sɩ kɛŋ kɩaa woruŋ ŋɩɩ,
ŋɩɩ tɩtɩa nɛ ʋ kpɩɛrɛ tabɩa-la sɩ ŋaa vesiŋ.
2Ba tʋɔbɩɩnaa ka nyɩsɛba nɛ,
lɛɛlɛ ʋ maga dɩ ba na hɛɛŋ a tɩŋ ba cheeriŋ wɩaa.
La TƖƖNA jaŋ ŋmoo ba korunu-la ta
aŋ yɛrɛ ba tabɩa-la sɩ ŋaa vesiŋ.
3Ŋɩɩ nɛ ba jaŋ bʋl, “La bɩ kuoro kɛnɛ,
bɛɛ wɩaa la bɩ La TƖƖNA zile.
Dɩ la nɛ fa paala kɛŋ kuoro ma,
wʋbɛɛ nɛ ʋ jaŋ wuo ŋaa pɩla?”
4Ba yie hɛ niiriŋ yʋgɛ,
a ŋmɩŋmɩɛsɛ pɛɩpɛɩ,
a nyɩɛ wɩaa hɛ niiŋ pɩpɩ dɔŋɔ.
Ŋɩɩ wɩaa wʋtɩtɩɩ bɩrɩmɛ wʋnyɩɛrɩŋ a tɛllɛ naaŋ,
a nagɛ saga sɩ hɛ paara baga lɛ.
5Nɩalɩŋ sɩ hɛ Samarɩa lɛ ka fá tɔŋ-la
ba sɩ bile Bɛf Avɛŋ lɛ ʋ nagɛ nɛ-bie nɛ.
Nɩalɩŋ sɩɩ to tɔŋ-la jaŋ yel ʋ wɩaa,
ŋɩɩ tɩtɩa nɛ nɩalɩŋ sɩ kpʋ pʋsʋŋ pʋpʋ ma jaŋ ŋaa,
nɩalɩŋ sɩɩ bigisi ʋ wɩaa,
bɛɛ wɩaa ba kɛnʋ laa ba teeŋ nɛ a kaa mʋ yoŋ-baga.
6Ba jaŋ kɛnʋ mʋ Asiiria
a joŋo pɩ kuoru-balɩŋ a zilu.
Efirem jaŋ dii hɩɩsɩŋ,
hɩɩsɩŋ jaŋ kɛŋ Iziral tɩŋŋaa a tɩŋ ba sɩ kɛŋ daaŋ saa tɔmʋŋ aa tou.
7Ba jaŋ kɛsɛ Samarɩa tɩŋŋaa arɩ ba kuoro viiri
a nagɛ lɩɩŋ sɩ joŋ daa-bie kaa mʋ.
8Ba jaŋ chei vesiŋ dɩ-kpaarɩa-la sɩ hɛ Bɛf Avɛŋ lɛ ba kaa ŋaa nɩbɔŋ wɩaa.
Ʋ nɛ leŋe Iziral tɩŋŋaa ŋaa wʋbɔŋŋɔɔ.
Sɔsʋŋ arɩ chɛɛŋ jaŋ lugo
tɔ ba vʋɩ-kpaarɛ korunu-la.
Ŋɩɩ nɛ ba jaŋ bʋl, “Peelee, má tɔla,
dundolluŋ, má tele tɔla.”
9La TƖƖNA sɩ, “Iziral tɩmma, bʋa-la ma sɩ hɛ Gɩbɩa lɛ,
ma ŋaa wʋbɔŋŋɔɔ nɛ,
aŋ ha ŋɩŋaa wʋbɔŋŋɔɔ.
Laalɩŋ fa bɩ kʋ kpʋ
wʋbɔŋ ŋaaraa Gɩbɩa lɛɛ?
10Bʋa-la lɛ mɩ sɩ cho, mɩ jaŋ dɔgɩsɛba,
mɩ jaŋ leŋ dɩ tinteyee nɩaa sii hɛ dɔŋɔ a kɔ ba lɛ,
a kɛsɛba a dɔgɩsɛba a tɩŋ ba sɩɩ ŋaa wʋbɔŋŋɔɔ bʋlɩa bʋlɩa.
11Efirem nagɛ na-paha ba sɩ daga nɛ,
ʋ cho mɩaa ŋmobuŋ.
Ama lɛɛlɛ mɩ jaŋ chɛ daaŋ vɔɔ mɛrɛ ʋ
baŋŋa-la sɩ zɔmɔ lɛ.
Mɩ jaŋ kiri Efirem dɩ ʋ vɩvɛŋ,
Juda maga dɩ ʋ pɛrɛ,
dɩ Jekɔb ma bugili tinteeŋ.
12Má duu kɩaa arɩ tʋɔpʋla,
a kɛŋ chono-la sɩ bɩ dɛrɛ kʋŋ kɩalɩŋ.
Má pɛrɛ ma tintee-la lɛ ma ha sɩ bɩ pɛrɛ.
Bʋa-la yie nɛ a magɛ dɩ ma chɛ mɩ-na ma TƖƖNA,
a kaa mʋ yi bʋa-la lɛ mɩ sɩ jaŋ kʋ
leŋ dɩ ma kɛŋ tʋɔpʋla woruŋ.
13Ama ma kɛŋ tʋɔhɛɛŋ nɛ duu kɩaa,
a kɛŋ tʋɔbɔmʋŋ kʋŋ kɩalɩŋ.
Ma dii wʋnyɩɛrɩ kɩaa nɛ,
bɛɛ wɩaa ma joŋ ma yɩɛlaa hɛ ma tɩtɩa doluŋ
arɩ ma laalɩyuori wajɩaba-la sɩ yʋga lɛ nɛ.
14Ŋɩɩ wɩaa laalɩŋ jaŋ sii ma nyuŋ
a chei ma dɩ-duoruŋ kala,
a nagɛ baal kʋbala ba sɩɩ yɩrɛ Salɩmaŋ fa sɩ chei taŋ-la ba sɩɩ yɩrɛ Bɛf Abɛl ŋɩɩ laalɩŋ tapʋlʋŋ.
Bʋa-la lɛ nɛ ba paa naamba arɩ ba biiriŋ vɩɩrɛ tinteeŋ kpʋ.
15Ŋɩɩ tɩtɩa nɛ jaŋ ŋaa ma Bɛtɛl nɩaa lɛ,
bɛɛ wɩaa ma nɩbɔŋ wɩaa yʋga.
Dɩ tapʋlɩɩ-la nɛ yie,
ba jaŋ chaasa kpʋ Iziral kuoro.”
Právě zvoleno:
HOSIA 10: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014