Khiav Dim 3
3
Vajtswv Hu Mauxes
1Muaj ib hnub Mauxes tabtom zov nws yawmtxiv Yethoos, uas yog tus povthawj hlob nyob hauv tebchaws Midias, cov yaj thiab cov tshis; nws coj pab tsiaj ntawd hla tiaj suabpuam mus txog tim lub Roob Xinais uas yog lub roob dawbhuv. 2Nyob rau qhov ntawd, tus TSWV tus timtswv tau los tshwm ua ib tug nplaimtaws rau Mauxes pom nyob hauv ib tsob ntoo. Mauxes pom nplaimtaws cig liabploog hauv tsob ntoo tuaj, tiamsis tsob ntoo tsis kubhnyiab li. #Teshl 7:30-34 3Nws xav hauv siab tias, “Uacas txawv ualuaj! Vim licas tsob ntoo ho tsis kubhnyiab? Kuv sim txav mus kom ze zog thiab saib seb.”
4Thaum tus TSWV pom tias Mauxes txav los ze lawm, Nws thiaj hu Mauxes hauv tsob ntoo ntawd tuaj hais tias, “Mauxes! Mauxes!”
Mauxes teb tias, “Kuv nyob ntawm no.”
5Vajtswv hais tias, “Tsis txhob txav los ze ntxiv lawm! Ciali hle koj nkawm khau, rauqhov koj tabtom sawv ntawm thaj chaw uas dawbhuv. 6Kuv yog koj cov yawgkoob tus Vajtswv, yog Anplahas, Ixaj, thiab Yakhauj tus Vajtswv.” Yogli ntawd, Mauxes thiaj muab tes los pos nws ntsejmuag cia rauqhov nws tsis muaj cuabkav yuav ntsia tau Vajtswv.
7Tus TSWV thiaj hais tias, “Kuv pom Kuv haivneeg uas nyob hauv tebchaws Iziv raug kev tsimtxom licas lawm, Kuv hnov lawv tej suab quaj qw thov kev pab kom lawv dim ntawm txoj kev uas lawv raug yuam ua qhev. Kuv paub tagnrho lawv tej kev txomnyem lawm, 8yogli ntawd, Kuv thiaj nqis los pab lawv kom dim ntawm cov neeg Iziv thiab yuav coj lawv tawm hauv tebchaws Iziv mus nyob rau lub tebchaws uas zoo ua noj ua haus thiab av dav heev; lub tebchaws uas muaj kua mis thiab zib ntab ntws nto, uas nimno cov neeg Kana-as, cov Hitis, cov Amaules, cov Pelixes, cov Hivis thiab cov Yenpus nyob. 9Kuv twb hnov Kuv haivneeg lub suab quaj, thiab Kuv pom tias cov neeg Iziv caijtsuj lawv licas lawm. 10Zaumno Kuv yuav txib koj mus cuag Falaus, kom koj thiaj yuav mus tso tau Kuv haivneeg tawm tau hauv nws lub tebchaws los.”
11Tiamsis Mauxes hais rau Vajtswv tias, “Kuv yog leejtwg, es yuav mus cuag tau Falaus, thiab coj cov Yixalayees tawm hauv tebchaws Iziv mus?”
12Vajtswv teb tias, “Kuv yuav nrognraim koj, thiab thaum koj coj cov Yixalayees tawm hauv tebchaws Iziv los, nej yuav pehawm Kuv saum lub roob no. Qhov ntawd yuav ua lub cim qhia rau koj paub tias Kuv yog tus txib koj mus.”
13Mauxes teb Vajtswv hais tias, “Thaum kuv mus txog ntawm cov Yixalayees thiab hais rau lawv hais tias, ‘Nej cov yawgkoob tus Vajtswv txib kuv tuaj cuag nej,’ es lawv nug kuv hais tias, ‘Tus Vajtswv ntawd lub npe hu licas?’ Thaum ntawd, kuv yuav teb lawv licas?” #Khiav 6:2-3
14Vajtswv hais tias, “KUV YOG TUS UAS KUV YOG. Koj yuavtsum qhia rau lawv hais tias: ‘Tus uas hu ua KUV YOG,#3:14: KUV YOG TUS UAS KUV YOG…KUV YOG lossis KUV YUAV YOG TUS UAS KUV YUAV YOG … KUV YUAV YOG. “KUV YOG” hais li lolus Henplais uas siv rau Yaves (Lolus "Yahweh" uas siv lus Askiv). Lolus Yehauvas tawm ntawm lolus Yaves no los. Lub npe Yaves no yuav siv lolus “tus TSWV” thoobplaws phau Vajluskub no, uas yog siv cov tsiajntawv loj xwb. yog tus txib kuv tuaj cuag nej.’ #Tshwm 1:4, 8 15Qhia rau cov Yixalayees hais tias Kuv, uas yog tus TSWV, uas yog lawv cov yawgkoob tus Vajtswv, uas yog Anplahas, Ixaj, thiab Yakhauj tus Vajtswv, yog tus txib koj mus cuag lawv. Lub npe no yog Kuv lub npe mus ibtxhis; lub npe no yog lub uas txhua tiam neeg tomntej no yuavtsum tau hu. 16Koj ciali mus thiab hu cov Yixalayees cov kevtxwj neeglaus tuaj uake thiab qhia rau lawv hais tias Kuv, uas yog tus TSWV, uas yog lawv cov yawgkoob tus Vajtswv, uas yog Anplahas, Ixaj, thiab Yakhauj tus Vajtswv, tau los tshwm rau koj pom lawm. Qhia rau lawv hais tias Kuv twb los saib lawv thiab pom tej uas cov neeg Iziv ua rau lawv lawm. 17Kuv npajsiab lawm hais tias, Kuv yuav coj lawv tawm hauv tebchaws Iziv, qhov chaw uas lawv raug luag tsimtxom, mus nyob rau lub tebchaws uas cov Kana-as, cov Hitis, cov Amaules, cov Pelixes, cov Hivis, thiab cov Yenpus nyob, uas yog lub tebchaws uas muaj kua mis thiab zib ntab ntws nto.
18“Kuv haivneeg yuav mloog tej lus uas koj hais. Ces koj yuavtsum nrog cov Yixalayees tej kevtxwj neeglaus mus cuag cov Iziv tus vajntxwv thiab hais rau nws tias, ‘Tus TSWV, uas yog cov Henplais tus Vajtswv, tau los qhia Nws tuskheej rau peb pom lawm. Zaumno thov koj tso peb mus peb hnub ke rau tom tiaj suabpuam, uas yog mus tua tsiaj fij rau tus TSWV, uas yog peb tus Vajtswv.’ 19Kuv paub tias cov Iziv tus vajntxwv yeej yuav tsis tso nej mus, yog tias nws tsis raug txhais tes uas muaj hwjchim loj kawg nkaus yuam kom nws tso. 20Tiamsis Kuv yuav siv Kuv lub hwjchim thiab rautxim rau cov Iziv los ntawm qhov uas ua tej yam txaus ntshai kawg nkaus. Ces tomqab ntawd nws yeej yuav tso nej mus xwb.
21“Kuv yuav tshoov cov neeg Iziv siab kom lawv hwm koj, kom thaum Kuv haivneeg tawm mus, lawv yuav tsis tawm mus tes dawb tes npliag. 22Txhua tus pojniam Yixalayees yuav mus cuag tej pojniam Iziv uas nrog nej nyob koom zej koom zos, thiab nrog nws nyob ua ib tse; lawv yuav mus thov tej tsoostsho, thiab saw nyiaj saw kub. Cov Yixalayees yuav muab tej ntawd rau lawv tej tub tej ntxhais coj thiab hnav, thiab yuav txeeb cov Iziv tej qhov txhia chaw huv tibsi mus.” #Khiav 12:35-36
Právě zvoleno:
Khiav Dim 3: MWW2022
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022 United Bible Societies. All rights reserved.