Khiav Dim 4
4
Vajtswv Pub Hwjchim Rau Mauxes Ua Txujci Tseemceeb
1Mauxes teb tus TSWV hais tias, “Tiamsis yog tias cov Yixalayees tsis ntseeg kuv thiab tsis mloog tej lus uas kuv hais ne, kuv yuav ua licas? Yog lawv hais tias, ‘Tus TSWV yeej tsis tau los tshwm rau koj pom’ no ne?”
2Tus TSWV thiaj nug Mauxes hais tias, “Koj tuav dabtsi ntawm koj txhais tes?”
Mauxes teb tias, “Kuv tuav ib tug pas nrig.”
3Tus TSWV hais tias, “Koj muab nws pov rau hauv av seb.” Thaum Mauxes muab tus pas nrig povrhees rau hauv av, uaciav tus pas ntawd txawm hloov kiag ua ib tug nab, Mauxes thiaj khiav. 4Ces tus TSWV hais rau Mauxes tias, “Koj ciali cev tes mus tuav nkaus nws tus kotw nqa hlo.” Mauxes thiaj cev loo tes tuav nkaus nab tus kotw, ces tus nab txawm hloov hlo rov ua tus pas nrig li qub. 5Tus TSWV hais rau Mauxes tias, “Koj ua li no qhia rau cov Yixalayees kom lawv paub tias tus TSWV, uas yog lawv cov yawgkoob tus Vajtswv, uas yog Anplahas, Ixaj, thiab Yakhauj tus Vajtswv tau los tshwm rau koj pom lawm.”
6Tus TSWV hais ntxiv rau Mauxes tias, “Muab koj txhais tes ntxig rau hauv koj plab tshos.” Mauxes ua rawsli ntawd; thiab thaum nws thau nws txhais tes tawm los, uaciav nws txhais tes ciali mob ruas ua cos dawbpaug li daus. 7Tus TSWV hais tias, “Rov muab koj txhais tes ntxig rau hauv koj plab tshos.” Mauxes txawm ua rawsli ntawd; thaum nws thau nws txhais tes tawm los, uaciav nws txhais tes rov zoo du lug ib yam li nws tej nqaijtawv lawm.
8Tus TSWV hais tias, “Yog lawv tsis ntseeg koj lossis tsis kam ntseeg thawj yam txujci uas koj ua, los lawv yeej yuavtsum ntseeg zaj no xwb. 9Thaum lawv pom ob yam txujci no tag, yog lawv tseem tsis ntseeg koj thiab tsis kam mloog koj tej lus, koj ciali mus hais ib cov dej hauv tus Dej Nais los hliv rau saum nruabnqhuab. Cov dej ntawd yuav hloov ua ntshav.”
10Tiamsis Mauxes hais rau Vajtswv tias, “Tus TSWV, thov Koj tsis txhob txib kuv mus. Kuv yeej ibtxwm hais tsis tau lus npliag, tsis hais yav tas los lossis nimno uas Koj nrog kuv tham. Kuv yeej ibtxwm hais tsis tau lus zoo, pheej hais qeeb-qeeb thiab hais tsis npliag.”
11Tus TSWV hais rau Mauxes tias, “Leejtwg muab qhovncauj rau neeg? Leejtwg ua rau neeg lagntseg lossis ruam? Leejtwg ua rau neeg pomkev lossis digmuag? Tsis yog Kuv, uas yog tus TSWV lov? 12Koj ciali mus! Kuv yuav pab koj hais, thiab yuav qhia tias koj yuav hais licas.”
13Tiamsis Mauxes teb tias, “Thov lau tus TSWV, thov Koj txib lwmtus mus.”
14Thaum ntawd tus TSWV npautaws heev rau Mauxes, Nws thiaj hais tias, “Koj tus tijlaug Aloos uas yog xeem Levis ne? Kuv paub tias nws hais tau lus zoo. Tamsim no nws tabtom tuaj cuag koj, thiab thaum nws pom koj nws yuav zoosiab heev. 15Koj ciali nrog nws tham thiab cevlus rau hauv nws lub qhovncauj. Kuv yuav pab neb ob leeg hais, thiab yuav qhia hais tias neb yuav ua dabtsi. 16Aloos yuav yog tus uas sawv koj cev hais koj lus rau cov pejxeem. Ces koj yuav zoo ib yam li Vajtswv, es qhia seb nws yuav hais dabtsi lawm xwb. 17Nqa tus pas nrig no nrog koj mus, koj thiaj yuav tau tus pas no siv ua txujci tseemceeb.”
Mauxes Rovqab Mus Rau Tebchaws Iziv
18Ces Mauxes txawm rovqab mus cuag nws yawmtxiv Yethoos, thiab hais rau Yethoos tias, “Thov cia kuv rovqab mus saib kuv cov kwvtij uas nyob rau tebchaws Iziv, seb lawv puas tseem muaj sia nyob.” Yethoos pomzoo thiab hais tias “Mus zoo koj.”
19Thaum Mauxes tseem nyob hauv tebchaws Midias, tus TSWV hais rau nws tias, “Koj ciali rovqab mus rau tebchaws Iziv, rauqhov cov neeg uas xav muab koj tua povtseg twb tuag tag lawm.” 20Yogli ntawd, Mauxes thiaj muab nws tus pojniam thiab ob tug tub caij neesluav thiab lawv rov mus rau tebchaws Iziv lawm, Mauxes nqa rawv nws tus pas nrig uas Vajtswv kom nws nqa nrog nws mus.
21Tus TSWV rov hais rau Mauxes tias, “Thaum koj mus txog tebchaws Iziv, koj yuavtsum ua txhua yam txujci tseemceeb uas Kuv twb muab hwjchim rau koj lawm rau Falaus saib. Tiamsis Kuv yuav ua kom Falaus muaj lub siab tawv, mas nws yuav tsis kam tso cov neeg ntawd mus. 22Thaum ntawd koj yuavtsum qhia rau nws hais tias Kuv, uas yog tus TSWV, hais li no, ‘Cov Yixalayees yog Kuv tus tub hlob. 23Kuv twb hais rau koj lawm hais tias kom ciali tso kev rau Kuv tus tub mus, kom nws thiaj tau pehawm Kuv, tiamsis koj tsis kam tso li. Zaumno Kuv yuav muab koj tus tub hlob tua.’ ” #Khiav 12:29
24Thaum lawv taug kev mus rau tebchaws Iziv, lawv mus txog rau ib lub chaw pw, tus TSWV tau los ntsib Mauxes thiab npajsiab yuav muab Mauxes tua povtseg. 25Ces Xipaulas uas yog Mauxes tus pojniam, thiaj muab tau ib daim txhais zeb ntse-ntse los hlais nws tus tub daim tawv nqaij chaw mos, thiab muab mus npuab Mauxes kotaw,#4:25: kotaw: Qhov no ibtxhia xav tias tsuas yog ua pajlug hais txog “kotaw” xwb, qhov tseeb yog hais txog tus noov ntag. thiab hais tias, “Koj yog tus nraugvauv ntshav rau kuv tiag-tiag li.” 26Ces tus TSWV thiaj tseg Mauxes txojsia. Qhov uas nws hais tias, “Koj yog tus nraugvauv ntshav,” yog hais txog qhov uas ua kevcai txiav tawv.
27Tomqab ntawd, tus TSWV hais rau Aloos tias, “Koj ciali mus ntsib Mauxes tom tiaj suabpuam.” Yogli ntawd, Aloos thiaj mus ntsib Mauxes rau saum lub roob dawbhuv, thiab thaum nws ntsib Mauxes, nws thiaj puag nkaus Mauxes nwj. 28Ces Mauxes qhia Aloos txog txhua yam uas tus TSWV tau hais rau Mauxes kom nws rov los rau tebchaws Iziv; thiab nws tseem qhia tej txujci uas tus TSWV tau xaaj kom nws ua huv tibsi rau Aloos.
29Mauxes thiab Aloos nkawd thiaj uake mus rau tebchaws Iziv, thiab hu tagnrho cov Yixalayees tej thawjcoj tuaj txoos uake. 30Aloos qhia txhua yam uas tus TSWV hais rau Mauxes rau cov Yixalayees mloog, thiab Mauxes ua txhua yam txujci tseemceeb uas tus TSWV qhia rau nws lawm, rau cov Yixalayees saib. 31Lawv kuj ntseeg, thiab thaum lawv hnov tias, tus TSWV tau los saib lawv thiab pom lawv tej kev txomnyem uas raug luag tsimtxom ntawd lawm, lawv thiaj qhau cev hlo pehawm tus TSWV.
Právě zvoleno:
Khiav Dim 4: MWW2022
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022 United Bible Societies. All rights reserved.