Ekihsatahs 27
27
Kaashipakitinaahsonk Ehtashintek
1Oshihtoon itahsh keshi pakitinaahsonk akesha tinowaahtik (acacia) ciaapaci'atc. Cikahkahkeyaak kika ishihtoon. Niishwaahsomisit aapihta ta‑ahkwaa, niishwaahsomisit aapihta ci‑inikohkwateyaak. Niiwimisit aapihta ciahpiihtaak. 2Eshi naniiwikiihkeyaak itahsh kika ishihtoon kekoonan cisasaakahkitekin. Kahkina hsa cimisiweyaahkoohcikaatek, kaye cimisiwehshink osaawaapihk (bronze). 3Kika oshihtoonan itahsh kaye onaakanehsan keshi pinaashehsekin kishkwaahkishen, ihspetensak kaye, onaakanan kaye keshi ahtek sihswepiiki wepinikan, wiiyaahsi ciihta'iponan, ishkotewi onaakanan kaye. Kahkina tahsh ono osaawaapihkonk taonci oshihcikaatewan. 4Osaawaapihkonk onci oshihtoon keonci pinaawankihsek, kaye kaatahso kiihkeyaak ciakohkekin kaawaawiimpaakahkin. 5I'i tahsh kaaonci pinaawankihsek ishi ahtoon i'imaa kaashi kaahcitaak kaashi pakitinaahsonk aapihta cishi akohsink kaa‑ahpiihtaak. 6Akesha tinowaahtikonk itahsh onci oshihtoon pimiwicikanaahkoon, misiwe osaawaapihk ciakohshink. 7I'imaa tahsh kaashi waawiimpaakahkin tashi piintaahkosinoon ekootekin ishi ayohpime kaashi pakitinaahsonk. 8Ciwiimpaak itahsh kika ishihtoon, napakihsakook ciaapaci'atwaa. Mayaa hsa tahsh iko kika ishihtoon kaakii ishi kihkino'amawinaan weti kihci waciink.
Kaawaahkaapiinciwiimpihcikaatek
9Kika ishihtoon itahsh ciwaahkaa piinci wiimpihcikaatek keshi patahkitek kihci anami'e pakwaanekamik. Kika aapacihtoon itahsh maawac wenishihshik ishiikin keaapatahk oshihtooyan kewaahkaa kipiikakootek. Ishi shaawanonk itahsh inahke kipiikakoocikan naanimitana (50) tahso tipa'ikan ta‑ahkwaa. 10Osaawaapihkonk cionci oshihcikaatekin keishi patahkisowaatc eshi niishitanawiwaatc osaawaapihkowi ahswaahkwa'ikanak keshi akootek kipiikakoocikan. Piiwaapihkoon weyaapaapihko shooniyaa waapihkahkin ta‑aashawaahkwakootewan, keshi ayakootekin kihciwaahkwa'ikanan. 11Miitahsh peshikwan keishihtooyan kiiwetinonk inahke kaashi waahkaa piinci wiimpihcikaatek. 12Ishi ninkaapii'anonk itahsh inahke i'i waahkaa piinci wiimpihcikan kika patahkinaak mitaahso ahswaahkwa'ikanak kaye keshi patahkisowaatc niishtanashinaanan (25) tahso tipa'ikan ciahkwaak. Miitahsh i'imaa keshi akootooyan kipiikakoocikan. 13Weti tahsh inahke wenci moohka'ank kiisihs, eshi ishkwaantemiwank waahkaa piinci wiimpihcikan niishtanashinaanan (25) tahsotipa'ikan ta‑ahkwaa. 14-15Ishi iitawaya'ii eshi ishkwaantemiwank ihsa nihsin tapatahkisowak ahswaahkwa'ikanak kaye keshi patahkisowaatc. Niishwaahso aapihta tipa'ikan ciahkwekahkin yiitawi ishkwaantenk ciakootekin. 16I'imaa kaaonci piintikenk kika akootoom kipiika'ikan mitaahso tipa'ikan ciahkwekahk keonci oshihcikaatek wenishihshink ishiikin weshaawashkwaak, mehkatemiswaak, meskwekahk cipiihsweyiikahk wiinke cimamasinikwaatek. Keniiwiwaatc itahsh petahkisowaatc ahswaahkwa'ikanak kaye keshi patahkisowaatc, mii 'imaa keshi akootooyan. 17Waapaapihko shooniyaa waapihkowankin piiwaapihkoon ihsa takape aashawaahkwakootewan i'imaa waahkaa piinci wiimpihcikanink eshi patahkisowaatc ahswaahkwa'ikanak misiwe waahkaa kipiikipicikanink. Kihciwaahkwa'ikanan kaye imaa ciakootekin weyaapaapihko shooniyaa waapihkowankin, ciosaawaapihkahkin kaye eshi patahkisowaatc ahswaahkwa'ikanak. 18I'ihsa waahkaa kipiikipicikan naanimitana tahso tipa'ikan ta‑ahkwaa, niishtanashinaanan tahso tipa'ikan ci‑inikohkwateyaak, niishotipa'ikan aapihta ciahpiihtaak. Kipiika'ikan itahsh taonci oshihcikaate maawac iko wenishihshik ishiikin, ini kaye kaaonci patahkisowaatc osaawaapihkonk cionci oshihcikaatekin. 19Kahkina tahsh aapacihcikanan keaapatahkin i'imaa kihci anami'e pakwaanekamikonk aaniin iko enahkamikahk osaawaapihkonk taonci oshihcikaatewan, ini kaye pakwaanekamikowi kihciwahkwa'ikanan keshi kihciwahpitek.
Keshinaanaakacihcikaatek Waahsahkonencikan
20Kanoosh itahsh kahkina Isriyalak (Israel) cipiitamawihkwaa maawac wenishihshininik aalip tino pimite keaapatahk waahsahkonencikanink entahsonaakosh cisahka'ikaatek. 21Eran (Aaron) itahsh, okosihsa' kaye oka onahtoonaawaa i'i waahsahkonencikan i'imaa entanentaakosiwak pakwaanekamikonk ishi akwaciink inahke kihci kipiika'ikanink enaahsamihsininik ahshotamaakemahkahk. I'i tahsh waahsahkonencikan tasahka'ikaate onaakohshik, piinihsh cikishepaawakahk ciwaahsahkonek. O'ohsa tahsh onahshowewin kaa'ininaan mooshak iko Isriyalak nehpic iko taishihcikewak, ini kaye keni opiiwesiimiwaatc.
Právě zvoleno:
Ekihsatahs 27: OJBR
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ojibwe Shorter Bible (Roman Script) © 2008 Canadian Bible Society