Ekihsatahs 28
28
Anami'ekikishkikanan Ehtashintekin
1Antom kiicihkiwensi Eran (Aaron), okosihsa' kaye Netaap (Nadab), Apaaihoo (Abihu), Eli'esar (Eleazar), Ihtamaar (Ithamar). Pahkaanentaako' kaatahshinitc Isriyala', wiinawaa cianohkiihtawiwaatc. 2Kika oshihtamawaa hsa kihci anami'ewikimaa kikishkikanan cionishihshininikin, keonci kihci inentaakonaakositc kaye keonci kihtencikaniwitc. 3Antom kahkina ininiwak kaanakaci oshihtoowaatc kekoon kaakiih tootawakwaa cikakiihtaawentamowaatc. Miiwak itahsh iki keoshihtamawaawaatc okikishkikanini Eranoon. Miihsh Eran keshi pakitinintisotc cianami'ewanohkiihtawitc. 4Kanoosh cioshihtoowaatc kekikishkaminitc ohkaahkikaniniink, wakiic ohkaahkikani naapishkikan, ohkaahkikani naapishkikan, kaye misiwe kashkiikiiwin, kaye tahsh papakiiwayaan ciminwaasinaatek, titipiikinikaniwi aanohkwaan, kihkinciciihpison kaye. Miiwan itahsh ono keoshihtoowaatc anami'e kikishkikanan kekikishkank kiicihkiwensi Eran, i'i kaye okosihsa' cianami'ewanohkiihtawiwaatc. 5Miiwan itahsh ono keaapacihtoowaatc kashkikwaacikaneyaapiin weshaawahshkosinitc, mehkatemiskosinitc, meskosinitc kaye. Osaawi shooniyaa waapihk tino kashkikwaacikaneyaapiin, kaye wenishihshininik ishiikin.
6Miiwan itahsh ono keaapacihtoowaatc oshihtoowaatc ohkaahkikani naapishkikan, kashkikwaacikaneyaapiin wenshaawahshkosinitc, mehkatemiskosinitc, meskosinitc kaye. Osaawi shooniyaa waapihk tino kashkikwaacikaneyaapiin, kaye wenishihshininik ishiikin mensinaatenik keishi maaciiwaatc ininiwak nekacikwaahsowaatc. 7Niishin anihkamaanehpisonan cisakihsinkin eshi kakiihkeyaak ohkaahkikani naapishkikan. 8Kihcihpison peshikwan ci‑ishihcikaatek, cishi peshikohcikaatek i'i ohkaahkikani naapishkikan ciaapatahkin ono. 9Niishin itahsh otaahpin Aanikihs (Onyx) tinowahsiniik keshi mansinaapihka'amowaatc owiinsowinini Cekap (Jacob) mitaahshiniishin okosihsa'. 10Enishi'ayaahpi tipishkaminitc ci‑inahtenikin owiinsowinini. Ninkotwaahso wiinsowinan i'imaa peshik ahsiniink, ini tahsh kotak ninkotwaahso wiinsowinan i'imaa kotak ahsiniink. 11Kika aapaci'aa inini nekaciitc cimansinaapihka'ank i'imaa ahsiniink eshinihkaasonitc Cekap okosihsa'. Osaawi shooniyaa waapihkonk onci oshihtoon keonci kihciwihshinowaatc iki ahsiniik. 12I'imaa tahsh eshi anihkamaanihkantek ohkaahkikani naapishkikan kika ishi akohkaanaak keonci maamihkawinotawintwaa Isriyalak. Miihsh i'i nahke Eran keshi pimiwitootc eshinihkaasonitc otinimaakanink. Miitahsh niin kaaTipencikeyaan mooshak keshi maamihkawiyaan nimpimaatisiimak. 13Niishin kika oshihtoonan osaawi shooniyaa waapihkonk keonci kihciwihshinowaatc iki ahsiniik. 14Niishin kaye osaawi shooniyaa waapihkowahsiniiyaapiin taapishkoo shinootaakanink eshi titipiiyaapiikinikaatekin i'imaa ishi kihciwihsitoon kaashi kihciwihshinowaatc iki ahsiniik.
15Kika oshihtoon itahsh wakiic ohkaahkikani naapishkikan kekikishkank kihci anami'ewikimaa keonci kihkentank Kishemanitoon enentaminitc. Miitahsh peshikwan tino keaapacihcikaatekin kekoonan kaakii aapatahkin kiioshihcikaatek ohkaahkikani naapishkikan. 16Cikahkahkeyiikahk cinapwekinikaatek shaankahsominintc cishi kahkahkeyaak kika ishihtoon. 17Niiwink itahsh kika pimaapiikihsicike i'imaa ohkaahkikani naapishkikanink ahsiniik ciakohkaanatwaa. Nihtam pimaapiikihsicikanink Oroopi (Ruby), Toohpaas (Topaz), Kaarnit (Garnet) tino ahsiniik kika akohkaanaak. 18Niishink pimaapiikihsicikanink kika akohkaanaak Emaralt (Emerald), Saahpayar (Sapphire), Taaimant (Diamond) tino ahsiniink kika akohkaanaak. 19Nihsink pimaapiikihsicikanink kika akohkaanaak Torhkoyis (Turquoise), Ekit (Agate), Aamahtist (Amethyst) tino ahsiniik kika akohkaanaak. 20Niiwink pimaapiikihsicikanink kika akohkaanaak Peral (Beryl), Kaarniiliyan (Carnelian), Caaspar (Jasper) tino ahsiniik kika akohkaanaak. Oko tahsh ahsiniik osaawi shooniyaa waapihkonk tashi kihciwihshinook. 21I'imaa tahsh mitaahshiniishin ahsiniik tamasinaapihka'ikaateniwan kaakii ishinihkaasonitc Cekap okosihsa' ci‑inwaasonitc kaashi mitaahshiniishwewaanakisiwaatc Isriyalak. 22Osaawi shooniyaa waapihkonk itahsh kika onci oshihtoonan shinootaakanan cititipiiyaapiikinikaatekin keaapatahkin i'imaa wakiic ohkaahkikani naapishkikanink. 23Niishin itahsh kaawiimpaakahkin osaawi shooniyaa waapihkonk kika onci oshihtoonan cinaapihsinkin eshi kakiihkeyaak i'i wakiic ohkaahkikani naapishkikan ishpimink inahke. 24Miihsh i'imaa keshi sakahpitooyan ini niishin osaawi shooniyaa waapihkowi shinootaakanan. 25I'imaa tahsh kika ishi akwahpitoon eshi otanahkamaaniwank ohkaahkikani naapishkikanink ishi niikaanaya'ii inahke. 26Oshihtoon niishin osaawi shooniyaa waapihkonk kaawiimpaakahkin cishi naapihsitooyan eshi tapahsiikahk wakiic ohkaahkikani naapishkikan eshi kiihkeyaak i'i ohkaahkikani naapishkikan. 27Keyaapi tahsh niishin osaawi shooniyaa waapihkonk kaawiimpaakahkin oshihtoon cishi sakihsitooyan niikaanaya'ii inahke eshi otanahkamaaniwank ohkaahkikani naapishkikan ishi ahshic eshi'ayaak kihcihpison. 28Eshi wiimpaakahkin wakiic ohkaahkikani naapishkikan, i'i kaye ohkaahkikani naapishkikan ihsa tatahkopicikaatewan osaawashko shinootaakan ciaapatahk. I'i ohkaahkikani naapishkikan cisaamihsisinok kihcihpisonink, kehcinaac iko cikiicikohsehsinok.
29Ahpii tahsh Eran piintiketc kaashi kohtaanentaakwaninik piintik oka kikishkaan i'i wakiic ohkaahkikani naapishkikan eshi mansinaapihka'omitc entahswewaanakisinitc Isriyala' (Israel). Niin itahsh Tepencikeyaan mooshak ninka maamihkaw nimpimaatisiimak. 30#Num 27.21. Kika ahtoon ihsa Iyoorim (Urim) kaye Tamim (Thummim) i'imaa wakiic ohkaahkinani naapishkikanink Eran citako naapishkank ahpii piintiketc entanentaakosiwak. Mii hsa 'i ahpii kekikishkank mooshak wakiic ohkaahkikani naapishkikan keonci kihkentank enentamowak keonci minohsenitc nimpimaatisiima' Isriyala'.
Kotak Anami'ekikishkikanan
31I'i tahsh taonci oshihcikaate osaawashkwe piihsweyiikinonk ciaakawekihsink i'imaa ohkaahkikani naapishkikanink. 32Tapakonehcikaate naawaya'ii i'i kashkiikiiwin. Kaashi pakoneyaak itahsh tatatipiikikwaate ciwahke piikohsehsinok. 33-34Ishi waahkaaya'ii tahsh kaashi kishkiikahk ciakohkwaatekin Pamakarenet (Pomegranates) shiiwimiicim tino kihtikaanan cionci oshikwaatekin, osaawashkwe piihsweyiikinonk, mahkatemiskwe piihsweyiikinonk, miskwe piihsweyiikinonk kaye. Ishi nenahsaw tahsh ta‑akootekin osaawi shooniyaa waapihko shinawa'oocikanehsan. 35Miitahsh i'i Eran kekikishkank ahpii anohkiihtawitc. Tamatwehsininiwan tahsh shinawa'oocikanehsan ahpii piintiketc maawac eshi kohtaanentaakwaninik eshi'ayaanitc kaaTipencikenitc, kaye tahsh ani saaka'ank. Kaawiin itahsh tanipohsii.
36Kika oshihtoon itahsh osaawi shooniyaa waapihko masinihcikan o'o cishi masinaapihka'ikaatek, “Ishi pakitinikoowisi kaaTipencikenitc.” 37I'imaa tahsh enaahsamiwank i'i titipiikinikaniwi aanohkwaan kika ishi akwahpitoon osaawashko shinootaakan ciaapacihtooyan. 38Eran itahsh oka kikishkaan o'oweni oskahtikonk. Miitahsh Niin Tepencikeyaan ciminwaapantamowak misiwe eshi pakitinaahsoohtamawiwaatc Isriyalak, mihsawaa ko pemaatisiwaatc wawaniiwaatc ahpii pakitinaahsowaatc.
39Wenishihshik ishiikin itahsh kika aapacihtoon oshihtamawatc Eran opapakiiwayaan otaanohkwaan kaye. I'i tahsh kaye kihkinciciihpison tamamasinikwaate.
40Kika oshihtoonan itahsh kaye papakiiwayaanan, kihkinciciihpisonan, titipiikinikaniwi aanohkwaanan kaye kekikishkaminitc Eran okosihsa' keonci kihtentaakosinitc, keonci kihci inentaakonaakosinitc kaye. 41Miiwan itahsh ono kikishkikanan Eran, i'i kaye okosihsa' kekikishkamoonatwaa. Miihsh keshi kihtakimatwaa cisiikinamowatc aalip tino pimite ohtikwaaniwaank ci‑ishi pakitinikoowisiwaatc Niin cianami'ewikimaa wanohkiihtawiwaatc.
42Wenishihshik ishiikinonk itahsh kika oshihtamawaak kepiihtawi taahsaanotamowaatc onookaniwaank ciahkohshininitc piinihsh weti opwaamiwaank kaawiin itahsh tawanaaciihsiiwak. 43Eran itahsh, i'i kaye okosihsa' mooshak i'i oka kikishkawaawaa' ahpii ko piintikewaatc pakwaanekamikonk entanentaakosiwak, ahpii kaye naasihkamowaatc eshi pakitinaahsowintc kaye eshi kohtaanentaakwaninik piintik anohkiihtawiwaatc ciwanaaciihsikwaa keonci nipowaahpan. Mii hsa piko oweni nehpic eonahtamawintwaa Eran, i'i kaye opiiwesiima'.
Právě zvoleno:
Ekihsatahs 28: OJBR
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ojibwe Shorter Bible (Roman Script) © 2008 Canadian Bible Society