Ekihsatahs 26
26
Kihci'anami'epakwaanekamik Ke'ishihcikaatek
1Miitahsh o'o keishihtooyan kihci anami'e pakwaanekamik.#26.1 Kihci anami'e pakwaanekamik: Mii 'imaa kaatashi anami'aank, kaakii mekwaashkawaatc Kishemanitoo opimaatisiima'. Mii 'imaa kaaishi'ayaatc ekii ani niikaaniihtamawaatc pikwatahkamik kaakii ani ishaanitc. Kii aapacihcikaate piinihsh ahpii Swaalaman (Solomon) kaakii oshihtootc kihci anami'ewikamik i'imaa Ceroosalamink (Jerusalem). Mitaahso pepahkaaniikinoon maawac wewaanishihshikin kekinikawinikaatek piisweyiikinoon kaaosaawashkwekahkin, kaamahkate miskwekahkin, kaye tahsh kaamiskwekahkin awiya tahsh kaawaawiinkesitc emasiniihta'iketc emasiniihta'waatc cerapii' (cherub). 2Kahkina hsa kipiika'ikanan peshikwan tainikohkwekanoon. Mitaahshiniiwi tipa'ikan (14) ciahkwekahkin, niishotipa'ikan (2) ci‑inikohkwateyiikahk. 3Naanwek itahsh ishiikinoon peshikwayek ishi ohkokwaatan. Miitahsh peshikwan ketootaman ini kotak naanan ishiikinoon. 4Kaaosaawashkwaak ishiikin itahsh kika aapacihtoon cioshihtooyan kaawiimpapiikakootekin eshi kishipiikahk i'i peshik kipiika'ikan. Miitahsh peshikwan ketootaman i'i kotak kipiika'ikan. 5Naanimitana (50) kaawiimpapiikakootekin kika oshihtoonan i'imaa nihtam kipiika'ikanink. Miihsh kaye kotak naanimitana kaawiimpapiikakootekin cioshihtooyan cishi'ayaakin i'imaa kotak kipiika'ikanink. 6Miihsh keshi oshihtooyan naanimitana kihciwaahkwa'ikanan ci‑iitawi waakaakin ciosaawi shooniyaa waapihkahkin, miihsh ini keaapacihtooyan ciniisho akwaahkwa'aman kipiika'ikanan cipeshikwekahk.
7Miihsh kaye cioshihtooyan keaapatahk ciakwaniika'ikaatek kihci anami'e pakwaanekamik. Mitaahshipeshikwayek (11) ishiikinoon wenci oshihcikaatekin maanatihkopiiwayink ihsa kika aapacihtoonan. 8Ishihtoon peshikwan ci‑inikohkwekahkin. Mitaahshinaano tipa'ikan (15) ciahkwekahk, niishotipa'ikan (2) cianikohkwateyiikahk. 9Ini tahsh naanan ishiikinoon peshikwayek tashi maamawikwaatewan. Ini tahsh kotak ninkotwaahso peshikwayek tashi maamawikwaatewan. I'i tahsh ninkotwaahsowekin (6) tanapwekinikaate inahke keinaahsamahkitek i'i kihci anami'e pakwaanekamik. 10Kika oshihtoonan itahsh naanimitana (50) kaawiimpapiikakootekin i'imaa eshi kishipiikahk i'i ishkwaac kipiika'ikan, kaye tahsh naanimitana i'imaa kotak kipiika'ikanink. 11Miihsh keshi oshihtooyan naanimitana kihciwaahkwa'ikanan ci‑iitawi waakaakin ciosaawaapihkahkin, miihsh ini keaapacihtooyan ciniisho akwaahkwa'aman kipiika'ikanan cipeshikwekahk aakaweka'ikan. 12I'i tahsh eshkohsek weti tashi pahkiciikakoote eshi otaanaawank i'i pakwaanekamik. 13I'i tahsh wiin aapihta tipa'ikan kaaishkohsek tapahkiciikakoote wawaahpime'aya'ii keonci kipiikihsink i'i pakwaanekamik.
14Keyaapi tahsh niishin kika oshihtoonan akwaniika'ikanan. Peshik taonci oshihcikaate ayaapewi maanahcaanihshiwayaanink cimiskwatihtenik, i'i tahsh kotak wenishihshink pashkwekin ciaapatahk. Miiwan itahsh o'o keaapatahk akwaciink ciakwaniika'ikaatek.
15Kika oshihtoonan kaye kepatahkitekin pakwaanekamikwaahtikoon akesha (acacia) tinowaahtik ciaapaci'atc keaapatahkin kihci pakwaanekamikonk. 16Mitaahshinaanomisit (15) ta‑ahkwaawan, niishtanashiniishwaahsominintc (27) cianikohkwateyaakin. 17I'imaa tahsh pakwaanekamikwaahtikonk niishin naapihsakoon taniiweyaahkosaka'ikaatewan peshikwan ciahkwahkwahkin. Kahkina hsa ono tino pakwaanekamikwaahtikoon peshikwan taishihcikaatewan. 18Niishtana pakwaanekamikwaahtikoon ta‑aapatanoon ishi shaawanonk inahke. 19Niimitana taoshihcikaatewan kewaapaapihko shooniyaa waapihkowankin keshi patahkitekin pakwaanekamikwaahtikoon. Neniishin itahsh ta‑aapatanoon keshi patahkitek peshik pakwaanekamikwaahtik keonci kihciwihsinkin ini kaaniishinkin niiweyaahkosaka'ikanan. 20Niishtana tahsh oshihtoon pakwaanekamikwaahtikoon keaapatahkin ishi kiiwetinonk inahke kihci pakwaanekamikonk. 21Niimitana taoshihcikaatewan kewaapaapihko shooniyaa waapihkowankin keshi patahkitekin pakwaanekamikwaahtikoon. Neniishin itahsh ta‑aapatanoon keshi patahkitek peshik pakwaanekamikwaahtik. 22Ninkotwaahso pakwaanekamikwaahtikoon kika oshihtoonan keaapatahkin eshi otaanaawank pakwaanekamik ninkaapii'anonk inahke. 23Niishin itahsh kika oshihtoonan pakwaanekamikwaahtikoon keaapatahkin eshi kakiihkeyaak. 24Ono tahsh niishin pakwaanekamikwaahtikoon ta‑aayiici ahsicihsinoon eshi kakiihkeyaak. Weti tapashiihsh tashi aayiicihcikaatewan cisakihsinkin, weti kaye wakicaya'ii. Miitahsh o'o nahke keishihcikaatekin pakwaanekamikwaahtikoon keneniishohsikin eshi kakiihkeyaak i'i pakwaanekamik. 25Inashke tahsh ishi maamaw nihshwaahso (8) pakwaanekamikwaahtikoon ta‑aapatanoon, mitaahshinikotwaahso (16) kewaapaapihko shooniyaa waapihkowankin keshi patahkitekin pakwaanekamikwaahtikoon. Neniishin iitok ta‑aapatanoon keshi patahkitek peshik pakwaanekamikwaahtik.
26Mitaahshinaanan (15) itahsh kika oshi'aak ashawaahkwakoocikanak akesha (acacia) tinowaahtik ciaapacihtooyan. Miiwak itahsh oko keaapatisiwaatc kaashi naananinkin (5) pakwaanekamikwaahtikoon ishi napaneyiik i'i pakwaanekamik. 27Naanan kaye keaashawaahkwakoocinowaatc keaapatisiwaatc eshi naananinkin (5) pakwaanekamikwaahtikoon kotak ishi nahpaacinahke, naanan kaye keaapatisiwaatc ishi ninkaapii'anonk inahke, eshi otaanaawank i'i pakwaanekamik. 28A'awe tahsh keaashawaahkwakoocink, eshi aapihtawaya'ii pakwaanekamikwaahtikoon i'imaa keshi misiwe aashawaahkwakoocink. 29Osaawi shooniyaa waapihk tahsh tamisiwehshin pakwaanekamikwaahtikonk, ciakohkatooyan kaawawiimpaakahkin osaawi shooniyaa waapihkonk keonci kihciwihshinowaatc kaa‑aashawaahkwakoocinowaatc. Miiwak itahsh iki kaye keosaawi shooniyaawahkantawintwaa.
30Mayaa tahsh iko kika ishihtoon kihci anami'e pakwaanekamik kaakii ishi kihkino'amawinaan weti kihci waciink.
31Kika oshihtoon itahsh kaye kipiika'ikan ciaapacihtooyan wenishihshik ishiikin cikinikawinikaatek piihsweyiikinoon weshaawashkwekahk, mehkate miskwekahk, meskwekahk kaye. Awiya tahsh kaawaawiinkesitc emasinihta'iketc emasinihta'waatc Cerapii'. 32Miitahsh keshi kiihciwakootooyan kipiika'ikan i'imaa wesaawi shooniyaa waapihkowankin kihciwaahkwa'ikanink kaashi kihciwihsinkin niiwin akesha tinowaahtikonk wenci oshihcikaniwiwaatc ahswaahkwa'ikanak ciwiwahkwehshink osaawi shooniyaa waapihk. Niiwin kaawaapaapihko shooniyaa waapihkowankin eshi aapatahkin keshi patahkisowaatc iki ahswaahkwa'ikanak. 33#Heb 6.19; 9.3-5. I'imaa tahsh ishi kakiihciwakootoon i'i kipiika'ikan kihciwaahkwa'ikanink. Awaahsinahke kipiika'ikanink itahsh kika ishi'ahtoon ahshotamaakemahkahk. I'i kipiika'ikan ihsa ta‑aapatan pahkaan cionci ayaamakahk kaashi kohtaanentaakwahk piintik, i'i kaye maawac iko kaashi kohtaanentaakwahk. 34Miitahsh keshi kipa'aman ahshotamaakemahkahk akwanaapowe'ikan ciaapacihtooyan kaashi poonencikaatekin macitootamowinan i'imaa maawac kaashi kohtaanentaakwahk. 35I'imaa tahsh awahsinahke kipiika'ikanink tashi ahte atoohpowinaahk ishi kiiwetinonk inahke, i'i tahsh wiin waahsahkonencikanaahk ishi shaawanonk inahke tashi patahkite.
36Kika oshihtoon itahsh ishkwaantemiwi kipiika'ikan keonci piintikenk kihci pakwaanekamikonk. Kika aapacihtoon maawac wenishihshik ishiikin kekinawihsink weshaawashkwekahk, mehkate miskwekahk, meskwekahk kaye piihsweyiikin ciwaweshinaakwahk, cimasinikwaatek kaye. 37Kika oshi'aak itahsh naanan ahswaahkwa'ikanak akesha tinowaahtikonk cionci oshihcikaniwiwaatc ciwiwahkwehshink osaawi shooniyaa waapihk cikikihsinkin wesaawi shooniyaa waapihkowankin kihciwaahkwa'ikanan keshi akootek o'o kihci kipiika'ikan. Naanan kaye kika oshihtoonan wesaawaapihkahkin keshi patahkisowaatc ahswaahkwa'ikanak.
Právě zvoleno:
Ekihsatahs 26: OJBR
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ojibwe Shorter Bible (Roman Script) © 2008 Canadian Bible Society