TAPALOUYU 5
5
Moses ae Aaron nou Ejipt Veo ye Ve Daoyu
1Süthaisü Moses ae Aaron nou Ejipt veo hi tave paoe, “Israel maivei Ramai Mapao nou haibüa paoe, ‘Avei maitaoye panou rekou taho Eye tsükhouyu nüh nüre donou puletaoye panou tawo.’ ”
2Ana Pharaoh nou paoe, “Mapao sü thaoge? Daisounou E puh chi züa Israel maiye panou talai? E Mapao sü sümoe, alia Israel maiye panou talai moe.”
3Moses ae Aaron nou chila peie, “Hebrew maivei Ramai nou Etaoye ve daore, südonou Etaoye panou teithe asü li rekou taho Etao Ramai Mapao ye posheelawo, sükumo louzü Puhnou Eh pei hi sounou seive moyuma soureih souyu hinou Etaoye southa bailai.”
4Ana Ejipt hi veo nou Moses ae Aaron hi paoe, “Ne hai daisounou maikhe maiye vah souyu hinou satalai touwe? Lah ne hai vah sü taho souta khaio. 5Ne hai vei maitao hai Etao Ejipt mai jünou pousho pare, ae chuo ne hainou puletaoye panou vah soumoa bailai tivu!”
6Süzhou teithe hinou Pharaoh nou tudee poa vah sa-a souyu maitao hi ae peikho maitao hi haibüa kharochi peie, 7“Neletao nou raichoki büa naichuh souyu maitao hisü rouvao peilai moe, puletaoye panou lah phoulo. 8Ana puletao nou raichoki naichuh soulouyu zhou sü soulai, panou khai-a soulai moe; daiolouzü puletao hai heakare. Südonou puletao nou ‘Ehye panou taho Etao Ramai Mapao ye posheelawo’ tea khore. 9Maikhe maiye sü panou vah khoupua soukhaio, sütoulouzü puletao hai zho hasholoua dayu chi khesü keiyu teile bulai moe.”
10Südonou qila maiye tukha poa vah souyu maitao ae peikho maitao nou maikhe maitao hisü paoe, “Veo nou neletaoye rouvao peipulai more tea paoe. 11Neletao lah taho rouvao sü phoulo, ana raichoki neletao nou naichuh soulouyu zhou sü soulai.” 12Südonou maikhe mai hai Ejipt teidei teitei hisü rarou poa rouvao sü phoutare. 13Tukha poa vah souyu maitao sünou zhaipou shishoa paoe, “Raichoki rouvao peiyu bütoua teithe teithe vei vah sü souche lourawo.” 14Tudee poa vah souyu Ejipt maitao nou vah khosa-a soupeiyu Israel maitao ye sü taida peie alia puletao hisü “Daisounou raichoki zhoua naichuh sü soulou moe” tea noue.
15Süthaisü khosa-a vah souyu Israel maitao nou veo hisü tave paoe, “Daisounou ne kilai Etao hi haibüa souwe? 16Ne kilai Etaoye rouvao sü peimore, ana puletao nou Etao hisü haibüa paoe, ‘Naichuh sü soukhaio!’ Ae sübüa Etaoye dapeie; ana mahyu sü nevei maitao baie.”
17Veo nou puletao hi chila peie, “Neletao hai hikei-a vah sounü moe, südonou neletao taho Mapao ye posheelalai tea ahinou khowe. 18Taho vah sü souta khaio, neletaoye rouvao peilai moe, ana raichoki soulouyu naichuh zhousü soukhaio.” 19Israel maiye khosa-a vah souyu maitao nou puletao hai vealaire touyu sü süloure, daiolouzü puletao nou raichoki teithe teithe hi naichuh soulouyu zhousü panou chua soulai tea paore.
20Puletao nou veo hinou vakou tapayu phaki, Moses ae Aaron nou puletaoye khoa bue. 21Puletao nou puhai hisü paoe, “Mapao panou ne hai pei hisü chiku peio, daiolouzü ne hai nou Etaoye veo vei nghingao hinou ae puhvei peikho maitao nghoujü hinou ngaoshi loure, alia puletao bah hisü Etaoye panou daothare donou khoche thoupeiwure.”
Moses nou Mapao hi Vamoa Paoyu
22Süthaisü Moses nou Mapao hi reidakhai veloua paoe, “Oh Mapaowo, ne daisou nou nevei maitaoye haibüa souvea peiwe? Ne daisounou Eye haihi seivewe? 23Ne zhih hinou tave Enou veoye phayu thainou, puhnou mai haitaoye souveapu tare, ana nenou mai haitaoye khailupa peimoe.”
Právě zvoleno:
TAPALOUYU 5: POUMBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.