TAPALOUYU 4
4
Ramai nou Moses ye Khupayu Khouko Peiyu
1Süthaisü Moses nou chila peie, “Ana Israel mainou Eye louche peimo louzü moa Enou paoyu achipao keipei moa ‘Mapao nou ne hi ve ngaopei moe’ tea paolouzü daitoulai?”
2Südonou Mapao nou puh hi noue, “Ne bah hi dai powe?”
Puhnou “Süüpo powe” tea chila peie.
3 Mapao nou paoe, “Nevei süüpo nasü deiphi hi laikou khaio.” Südonou Moses nou puhvei süüpo nasü deiphi hi laikou peikhaie, süüpo nasü nghou ali dapaloure, ae puhsü sühi sünou tutare. 4Süthaisü Mapao nou Moses hi paoe, “Ne bah thaikou nghou mi hinou pailo.” Moses nou puh bah thaikou mi hinou pailou khaie, nghou nasü süüpo daloua baire. 5Mapao nou paoe, “Hai nahai Israel maiye panou Mapao, puletao paipaoh Ramai, Abraham, Isaak ae Jakob Ramai nou ne hi ve zhu ngaopeie touyu sü louche loure donoue.”
6 Mapao nou Moses hi paopue, “Ne bah sü ne zhao khehi thaithou khaio.” Puh bah sü zhao khehi thaithouloua vakou popayu phaki, puh bah sü loukhaonou touyu büa vürakua kaapha toure. 7Süthaisü Ramai nou paoe, “Ne bah sü ne zhao khehi thaithoupu khaio.” Südonou puhnou puh bah sü zhao khevai thaithouloua vakou popayu phaki, puh bah hai vasou kukhe raibüa veikei loure. 8Mapao nou paoe, “Puletao nou neye louchemo louzü moa khupayu vah araina sü pobayuma, khupayu vah haina louzü puletao-a louche-a bailai. 9Puletao nou khupayu vah ahai kheinou louchemo louzü moa nenou paoyu chipao poba louzü, Nail rei hinou dzü poloua popa deithe hi lakhai peikhaio, sükulouzü dzü nasü zhe data-a bailai.”
10Ana Moses nou Mapao hi paoe, “Oh Mapaowo, Eye seita peiso, E hai chi paolousüyu mai moe alia ne kilai hi nenou chi paopeiyu thaia, Esü raolousü moe. E hai la daokhaokhaoyu ae haoshi shoyu mai ali baie.”
11 Mapao nou puh hi paoe, “Thaonou maiye mü soupeie? Thaonou la hayu ae noupeyu soupeie? Thaonou maiye panou ha ngaolouyu ae nghichayu sü soupeie? Sütaosü Mapao, Enou mowu? 12Chu nou ne tawo! Enou neye soukha peilai alia nenou daie paolai touyu khesü Enou paopeilai.”
13Ana Moses nou chila peie, “Oh Mapaowo, zhuvea nou mai kukhe aliye seita pei baio.”
14Süthaisü Mapao nou Moses hisü rarou loure ae puh hi haibüa paoe, “Levi puona, ne jürai Aaron hawu? Puh hai chi paovei shoyu Enou süwe. Zhukhaio, puh sü neye daolai tea laire, ae puhnou neye ngaolouyu phaki, puh alaosou le sasholai. 15Nenou puhye sü chalousüe ae puh hisü daie paolai touyu Enou paopeilai. Enou ne haiye dai paolai touyu ae dai soulai touyu paodou peilai. 16Puhnou neye donou maikhe mai hisü chi paopeilai, puhye donou ne hai Ramai ali büa daidai paolai touyu khesü puh hi paopeilai. 17Süüpo haina hai ne polo, haina nou poa nenou khupayu vah khesü souloulai.”
Moses nou Ejipt hi Dakhai Veyu
18Süthaisü Moses nou dakhai ve puh paoh Jethro hi paoe, “Eye panou dakhaiho Ejipt hi avei kityarai maitao kabüa busa touyu sü zhuwo.” Puh paoh Jethro-a puhnou paoyu sü “Ae, ne kaona-a tawo” tea paopeie.
19Moses nou Midia nuh hinou buyu phaki, Mapao nou puh hi paoe, “Ejipt hisü dakhai tawo, daiolouzü neye southalai tea phouyu mai hrülai sü thaita khaire.” 20Südonou Moses nou puh chapfü ae nahmaitao sü saloua rheisüh phao hisü panou buloure, ae Ejipt hisü tare donou tashu tare, alia Ramai nou puhye süüpo polo tea paoyu nasü poloua tare.
21 Mapao nou Moses hisü paopue, “Chuo ne sü Ejipt hi dakhai ve laire, südonou ne hi Enou khouko peikhai touyu khupayu teitei sü Pharaoh veo hi soungao peio, ana Enou puh le sü soukhousho peiwulai, sübüa puhnou nevei maitaoye sü panou talai moe. 22Süthaisü nenou Pharaoh hi paolai, Mapao nou haibüa paoe, ‘Israel mai hai anahpoutu naraio nasüe.’ 23Enou ne hi paowe, ‘Anahpoutu sü panou tawo, alia taho panou Eye thowo,’ ana nenou puhye panou tabare, südonou chuo Enou ne nahpoutu naraio sü southalai.”
24Teitheli khei, puletao nou Ejipt hi taloure veidu hinou fühao soua buyu buh ali hinou Mapao nou Moses ye southalai tea vere. 25Süthaisü Ziporah nou heivei shoyu chuh ali poloua puh nahpoutu hee sü vadewure, alia sünanou poloua Moses phi pokou deiloua paoe, “Chechevu zünou ne hai zhe nou chaachou soukhai touyu avei khapou nasüe.” 26Honapai nou paoe, “Ne hai zhe nou poa chaachou soua hee bikhai touyu avei khapoue” tea paoyu donou Mapao nou puhye southa moa phapeire.
27Süthaisü Mapao nou Aaron hi paoe, “Moses ye taho radeiki hinou sülo.” Südonou puhnou taho Moses ye sheeyu deichi hinou daoloure, alia puhye mü nou mupeie. 28Moses hi Mapao nou paoyu chipao ae puhye Ejipt hi seitayu daivanoue touyu teitei sü Aaron hi paongaoe, alia khupayu vah khesü soungao peio tea Mapao nou puh hi kharochi peikhai touyu hai-a soungaoe. 29Süthaisü Moses ae Aaron nou Ejipt hi velou loure alia Israel hi tsümai hrülaiye kuve jüloure. 30Mapao nou Moses hi paopeiyu teitei sü Aaron nou puletao hisü paongao peie, alia Moses nou puletao nghoujü hinou khupayu vah khesü soungao peie. 31Mai khemai nou süsü louche loure, alia Mapao nou Israel maiye zhuvea peia puletao hi ve loure ae puletao nou veahoyu khesü ngaoloure touyu sülou khaie, puletao nou pei pfüa nakou Puhye tho-e.
Právě zvoleno:
TAPALOUYU 4: POUMBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.