TAPALOUYU 6
6
1Süthaisü Mapao nou Moses hi paoe, “Chuo Enou veo hisü daivah soulai touyu nenou ngaolai. Enou puhye sü panou avei maitaoye puhvei vedei hinou tamo louzü shilaiyu vah khesü soupeilai.”
Ramai nou Moses ye Kulouyu
2Ramai nou Moses hisü paoe, “E hai Mapao nasüe. 3Enou Abraham hi, Isaak hi ae Jakob hi Khoukhoulai Ramai soua ve azhu ngaopeie, ana Enou puletao hisü sheeyu avei zhih Mapao tea kuyu nanou ve ngaopei moe.#6.3 the lord: Zhukhaio 3.14. 4Puletao nou shetumai ali soua hrüyu Kanaan teidei nasü puletao hi peilai tea Enou vo soukhai toue. 5Israel maitao nou Ejipt maivei khakhe hinou veashoa lea buyu Enou chouloure, alia Enou puletao hi vo soukhai touyu nasü licholoure. 6Südonou chuo Enou paowe tea Israel mai hrülai hisü paopeio, ‘E hai Mapao nasüe, Enou neletaoye Ejipt mainou souvea-a buyu hinou ae puletao vei hukhaki hinou popa peilai, alia Enou Ejipt maiye tudee peilai ae neletaoye sü khailupa peilai. 7Neletaoye panou avei mai souloulai, ae Enou neletao Ramai soulai. Enou neletaoye Ejipt maivei khakhe hinou pa lahdo soulouyu phaki, E hai neletao Ramai Mapao-e touyu sü süloulai. 8Enou Abraham, Isaak, ae Jakob hi peilai tea paokhai touyu teidei hisü neletaoye save thou peilai, alia sünasü neletao vei panou soure donou peilai. E hai Mapao nasüe.’” 9Moses nou haibüa Israel mai hi paopeie, ana Israel maitao nou puh chi sü keipei bare, daiolouzü Ejipt mainou puletaoye souvea shoyu donou puletao hai chathai tare.
10Süthaisü Mapao nou Moses hi paoe, 11“Taho Ejipt maivei veo hi Israel maiye panou puletao teidei hinou tawo tea paokhaio.”
12Ana Moses nou Mapao hi paoe, “Israel mai koutea achi keipei ba-a bukhai louge kabüa Ejipt hi veo nou achi sü keipei khailaige? E sü chi paolou süyu mai moe.”
13 Mapao nou Moses ae Aaron hi haibüa kharochi peie. “Israel mai hi ae Ejipt veo hi Enou neye panou Israel maiye Ejipt teidei hinou sapalo tea kharochi peiwe tea paopeio.”
Moses ae Aaron Kikhamai vei Sholea Ko
14Puletao vei pfümounah hi puo tsükhana zhih sü haitaoe: Jokob nahpoutu naraio Reuben hai nahpoutu adai bue - Hanokh, Pallu, Hezron ae Karmi; haitao hai Reuben kihikha maie. 15Simeon hai nahpoutu arou bue - Jemuel, Jamin, Ohad, Jachin, Zohar, ae Shaul, Kanaan pfüpai nahpoutu, haitao hai Simeon kihikha maie. 16Levi hai nahpoutu asü bue - Gershon, Kohath, ae Merari. Levi nou po 137 mailoue. 17Gershon hai nahpoutu ahai bue - Libni ae Shimei, puhai hai tyaosholea alao bue. 18Kohath hai nahpoutu adai bue - Amram, Izhar, Hebron ae Uzziel. Kohath nou po 133 mailoue. 19Merari hai nahpoutu ahai bue - Mahli ae Mushi. Mai haitao hai puletao vei pfümounah thaifüa Levi kihikha maie.
20Amram nou puh puo tupai Jochebed ye naloue, alia puhnou Aaron ae Moses ye napeie. Amram nou po 137 mailoue. 21Izhar hai nahpoutu asü bue - Korah, Nephez ae Zikri. 22Uzzial-a nahpoutu asü bue - Mishael, Elzaphan, ae Sithri.
23Aaron nou Amminadah nahpai, ae Nahshon tupai Elisheba ye naloue. Honapai nou Nadab, Abihu, Eleazar, ae Ithamar ye napeie. 24Korah hai-a nahpoutu asü bue - Assir, Elkanah, ae Abiasaph. Haitao hai Korah kihikha maie. 25Aaron nahpoutu Eleazar nou Putiel nah naotupai aliye naloue, ae honapai nou puhye Phinehas napeie. Mai haitao hai Levi khü hinou hrüveyu pfümounah maitaoe.
26 Mapao nou Aaron ae Moses hi “Israel maiye me me souloua Ejipt hinou sapalo” tea paopeie. 27Veo Pharaoh hi tave Israel maiye panou lahdo soua tapalo tea paopeiyu hai-a Aaron ae Moses puhai noue.
Mapao nou Moses ae Aaron hi Kharochi Peiyu
28 Mapao nou Moses ye Ejipt teidei hinou chayu phaki, 29Puhnou Moses hi haibüa paoe, “E hai Mapao nasüe, Enou ne hi paoyu teitei sü Ejipt maivei veo hisü paopeio.” 30Ana Moses nou Mapao hi paoe, “Nenou süwe, süolouzü Esü chi paolou süyu mai moe, südonou Pharaoh veo nou kabüa achi sü keipei khailai?”
Právě zvoleno:
TAPALOUYU 6: POUMBSI
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.