1 Ko 8
8
Li tzekemq mayejanb'il chiruheb' li yal k'oxlanb'il yos
1Anaqwan too'aatinaq chirix li k'aru mayejanb'il chiruheb' li yal k'oxlanb'il yos.#8,1 Li xtib'eleb' li mayejanb'il xul wan naq na'ela'ank; jo'kan naq natiwmank sa' rochoch li yal k'oxlanb'il yos (8,10) malaj nak'ayimank sa' k'ayiil (10,25). Ma naru junaq aj paab'anel xtiwb'al a'an? San Pablo naxye naq laj paab'anel a'an ach'ab'anb'il naq wank (cf. Ro 14-15), ab'anan ink'a' naru xluktesinkil xch'ooleb' li toj q'uneb' sa' li paab'ank. Yaal ajwi' naq “wank qak'a'uxl chiqajunilo”. Ab'an rik'in li xnimal nawok naq'etq'eto'k li winq; ka'ajwi' li rahok nakab'lank re li komonil. 2Wi wank junaq nak'oxlank re naq wank xna'leb' chirix junaq k'a'aq re ru, a'an toj maji' xtikib' xnawb'al jo' chanru tento xnawb'al. 3Ab'anan li narahok re li Yos, a'an nawno ru xb'aan li Yos.
4Chirix xtzekankil li k'aru mayejanb'il chiruheb' li jalanil yos, laa'o naqanaw naq li jalanil yos maak'a' na'ok wi' sa' ruuchich'och', ut li Yos jun ajwi' chirib'il. 5Us ta wan neke'yehok naq naab'al chi yos wank sa' choxa ut sa' ruuchich'och' (“yos” ut “qaawa'” neke'xye reheb'), 6ab'an chiqu laa'o jun ajwi' chi Yos wank, a' li Yuwa'b'ej, li nachalk wi' chixjunil li k'a'aq re ru; cho'q re a'an naq yo'yooko. Jo'kan ajwi' chiqu laa'o wank jun ajwi' chi Qaawa', a' li Jesukriist: sa' xk'ab'a' a'an wank chixjunil, ut laa'o yo'yooko sa' xk'ab'a' a'an.
7Ab'anan moko chixjunileb' ta xe'tawok ru li na'leb' a'in. Xb'aan naq wankeb' sa' eeyanq k'aynaqeb' chalen chaq najter chi xpaab'ankil li yal k'oxlanb'il yos, ut anaqwan naq neke'tzekank, a'an mayej chiruheb' li yos naq neke'xk'oxla. Ut xb'aan naq toj q'uneb' li xch'ool, neke'reek'a naq yookeb' chi xmuxb'al li xpaab'aaleb'. 8Ch'olch'o naq maawa' li tzekemq toonach'oq wi' rik'in li Yos. Moko kach'inaq ta qawankil rik'in naq ink'a' tootzekanq, chi moko nimaq qawankil rik'in naq tootzekanq.
9Ab'anan chek'ehaq reetal: meeluktesi xch'ooleb' li toj q'uneb' sa' li paab'ank xb'aan naq neketzeka a'in. 10Wi junaq aj paab'anel toj q'un xch'ool taa'iloq aawe li wank aana'leb', yookat chi hilank sa' meex sa' rochochil li yal k'oxlanb'il yos, ma ink'a' tab'i' taa'eek'asiiq xch'ool chi xtzekankil li k'aru mayejanb'il chiruheb' li yal k'oxlanb'il yos? 11Ut yal sa' xk'ab'a' laana'leb' taasachq li q'un xch'ool, a' li qas qiitz'in li kikamk wi' li Kriist! 12Nekexmaakob'k chiruheb' leeras eeriitz'in li ink'a' kaweb' sa' li paab'ank, nekeluktesi xch'ooleb' ut chi jo'kan yookex chi maakob'k chiru li Kriist. 13Jo'kan utan, wi li tzekemq taaluktesinq xch'ool li was wiitz'in, maajoq'e tintzekanq tib' chiruheb', re naq ink'a' tinluktesi xch'ool li was wiitz'in.
S'ha seleccionat:
1 Ko 8: QQC
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Q'eqchi DC Bible © Bible Society in Guatemala, 2005.