Marka 7
7
Alianzang haa Cawkhyaunyak
(Matthai 15.1–9)
1Pharisee laa avoang tala cawkhyauytih haa Jerusalem kuːh komluu awlaa Jesuh cengnga ym dynneiluu, 2yn hnguva hngulawnglyk tih haa potpattei kawva, acimcyang kawtih kut tyng buh ym ei khyang ym hnguh.
3Pharisee laa Judah khyang haa tomti cee shyaakai thumcian bawva, ym kut potpattei kawva buh eiuu joaw. 4Tukjyh nyak duːn kuːh ym luu bua hnguva, kut potpattei kawva#7.4 Tukjyh nyak duːn kuːh ym luu bua hnguva, kut potpattei kawva; sikawvyngcee tukjyh nyak kuːh ym lue pynnyng ym potpattei. ei joaw. Pynnyngcee ycya thumcian haa panuu khy ym lyklyam, ihaamaatijyngcee kho bawt thum, am bawt thum, team bawt thum laa ipnyak gyam haa a si.#7.4 Acya kutjokcaw haa ynpynnyng ipnyak thum haa; tinyak myi jo.
5Yn khainnyng pharisee laa tala cawkhyautih haa naa Jesuh eyng, “Ibawthawnnyng ny hngulawnglyk haa naa lianzang tyak hnguːt thumcian lyk kawva acimcyang kaw tih kut tyng ym ei maa?,” tilaa ym hngi.
6Jesuh naa, “Isaiah hngawpawe naa ni bawva jok hnguːt, nyangmi piangngei khyang:
“ ‘Ni khyang hanaa ym mong pyttyng keei ym kyh, ynbawlakhy,
ym lungbawng cee keei dy paanei.
7Ym cawkhyau khyang cee;
khyang nyng kuːh asi
keei khuːhbia cee aluaih.’
8“Nuatpaw hnguishin cee dyyi zawla khyangzaw thumcian jyang nym lyklyam,” y tiinyak.
9Pynnyng thaathyieh y hyau, “Nym pumhngaw thumcian nym lyklyam nynny tawka Nuatpaw hnguishin ym dyyi! 10Mosee tuanphawng nyng, ‘Ny nuu laa ny paw kyhkhiat byih,’ pynnyng ‘Ukhy si seh nuu laa paw jyanponaw tih cee byt lawh ey,’ tilaa a myi. 11Ynbawlakhy nyangmi naa khyang pahuat naa ym nuu sikawvyngcee paw thawnlaa khy siseh phuihlawi nyn nyakky khyang utzaw haa cee Korban asi, Korban tinyak cee Nuatpawaw kuːh a si, tilaa hyau. 12Yn pynnyng ym nuu laa paw vyng ikhy caai lawh jo tijyng nym cawkhyau. 13Ynkhainnyng nym thumcian khianyng Nuatpaw khyaukhaw nym dyieu luu lawh. Pynnyngcee yn bawva panuukung nym caai,” tiijyng y hyau.
Khyang Bu syak tih Ieih
(Matthai 15.10–20)
14Pynnyng Jesuh naa khyangpuː paanei theila yn haa eyng hyau, “Tomti naa, keei hyau ngei cawla myn jawcu jovei. 15Pumthua kuːh luutih naa khyang dukka voang theila khyang buːsyak nyn tih ikhy myi jo. Ynbawlakhy khyang dukkuːh lyt luu tih naa jyang buːsyak nyn,” y tinyak. 16#7.16 Acya kutjokcaw haa akhyndik 16: ngeisyam, pynnyng, hngaw nym tawvei jyngcee! ym bawng (to 4.23).
17Khyang puː y zehtyak pynnyng imm dukka voang, y hngulawnglyk haa naa Jesuh eyng khyaucypnyak khyang ym hngi. 18Jesuh naa, “Nym awhei? Pumthua kuːh naa khyang duːkka voang theilaa ikhy buːsyak kawkhyang jawcu jocawvei? tilaa y hngii. 19Ibawthonnyngmaa tijyngcee, pum myng kuːh lyt theilaa hngynnu dukka voang tih cee lungbawng dukka voang jo,” y tiinyak. (Ynkhainnyng Jesuh naa eiawk tomti haa acimcaih tilaa y hyau.)
20Yn pynnyng, “khyang dukkuːh lyt luu tih naa jyang khyang buːsyak. 21Khyang lungbawng duk kuːh naa jyang, seetih khindang, mumaaeinyak, shyak tuk nyak, 22khyang pihia byyeunyak, luːjyaunyak, saksinyak, myangsingnyak, hnguhngyamnyak, zawplapnyak, sahliphangnyak, camcahnyak, lyngsanyak, 23myn haa tomti cee khyang dukkuːh lyt luu theila khyang buːsyak tih a si,” y tiinyak.
Hngutawnuu Jummeinyak
(Matthai 15.21–28)
24Pynnyng Jesuh cee yn duːn nyng kuːh thoo theilaa Tyre luh kika lyammaa y zet. Imm pahuat dukka voang theilaa, ynnijaa y myih khyang uvyngkhy hnguat syak hluː jo; ynbawlakhy byy nyn jo. 25Muikhaw see bynnei khyamlawh tih hngutawzaw pahuat cee yn sityang jyak laa jyak luu theila ynih khuzoo va khukdya luu hlyi. 26Yn hngutaw cee Siria pee Fonisia myitih Greek khyang juː cya y si. Y zawhngu dukkuːh tusee shyt piatmawh tilaa Jesuh eyng y khawhei. 27Jesuh naa, “Acuːk nyakka dikzawe haa naa ym luː hawh ei hngyam mawseh. Dikzawe eiawk lovei theilaa uii jyng cawh thum myi jo,” Y tinyak.
28“Mawhpaw vo asi, ynbawlakhy uii tiinyak cee dikzawe buhpyi dyang kuːh abuːtih ei thum amyi,” y tiinyak bua.
29Yn hnguva Jesuh naa yn nyng, “Yn khyaukhaw khiannyng, imma zet; ny zawhngu dukkuːh tusee lytbua pyn,” y tinyak.
30Hngutawe nue cee imma zetbua theilaa, y zawehngu dukkuːh tusee lytbua theilaa ipnyak gyam huannaa ngoaei khyang y hnguh.
Jesuh naa Hngawpyangtih laa khyauawhtih kaansyak
31Pynnyng Jesuh cee Tyre luh kuːh thoo theila Sidon pee lyammaa y zet, Dekapolis pee kikaa dukka voang theila, Galilee pee tuiili jaa y phawluu. 32Yn duːn naa hngawpyang tih laa khyauawh tih khyang pahuat ycya khyang haa naa Jesuh cenga ym luu, yn khyang huannaa kut tyang piatty ym khawhei. 33Khyangpuː dukkuːh, Jesuh naa yn khyang loo theila y hngawku vyng y kutjung y thuan. Ynpynnyng y shyatui loo theila yn khyang lei jyng y beh. 34Ynpynnyng huankhu lyaam to theila, khyau puːpuː hyau, “Ephphatha!” yn cee, “lyang seh!” y ti hyau.
35Yn khyang cee y hngaw lyang bua theila, y lei khy hyangbua, ynpynnyng poaijaa y khyau nyn hlyi. 36Jesuh naa ni u vyngkhy saih kaw haiawva hnguishin. Ynbawlakhy yn sityang ym saith jawk giah. 37Jawetih khyang haa naa ym muːnnyak, “Yn Mawhpawe caai hnguːt tomti ym muːnnyak, hngawpyangtih jyak syak nyn bua theila awhtih haa khy khyau nyn syak,” ym tii.
S'ha seleccionat:
Marka 7: NTHTB25
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 by the Word for the World International