Marka 6
6
Nazareth Luh aa Jesuh Dyynjo
(Matthai 13.53–58; Luka 4.16–30)
1Jesuh naa yn duːn zehtaw theilaa ynih myihnyakluh aa y zetbua, ynih hngulawnglyktih haa naa khy ym lykkei. 2Jin hnguːp phawlue hnguva, sinakok ka y cawkhyau nyak phuun theila, jawetih tomti naa muːnnaw awla, “Ni khyang naa nibyang haani kuːh lawh maa? Ynih eyng nibyang thiamva unaa beimaa? Muːnnawsee tih phungan hacee ibaw y duan nyn maa? 3Myn cee saathe imm ssaw tih kaw vei? Ynih cee Marih zaw James, Josep, Judah laa Simon tih bee kaw vei? Y nau haa khy mynija ym myi kaw vei?” yn haa naa khy ynih dyn joaw.
4 #
Jaw 4.44
Jesuh naa, “hngawpawe pahuat cee y luh hngawe thua, utsu laa y pumhngaw imm myihnawkawva jyng y luhngoai myi” Y tinyak.
5Kuatih haa eyng kuttyang theilaa kaangsaanyak bei thua, muːnnawsee tih ikhy ynija caai hnguːt nyn jo. 6Mawhpaw naa yn haa jum kaw khyang y muːnnyak.
Jesuh naa Hngulawnglyk Kulaihngih Tuːh
(Matthai 10.5–15; Luka 9.1–6)
Ynpynnyng Jesuh cee naam huattuː naam huat kikaa cawkhyau jo. 7Yn pynnyng Mawhpaw naa hngulawnglyk tih kulaihngih pan theilaa pahngih, pahngih aa tuːh theilaa yn haa eyng muikhaw see haa nyn nyak uːtyang y bei. 8#Luk 10.4–11 Jesuh naa “Lyaam syau nym zet hnguva tiangkhua pahuat thua ikhy zeh kawh: cokkhii, phe, kyy jooi jyng tyangkaw zeh kawh byihjyt, tilaa y siin. 9Khuphawtyap jyang tappei theila phaang khy lyaphuat tua vuei kawh byihjyt,” y tiinyak. 10Yn haa eyng y hyau, “imm pahuat nym voang hnguva yn imm pahuat teng nym zetbua cyp yn duːnnyng myibyih jyt. 11#Cee 13.51Nym luu naweva kuːh haa naa nyangmi dyn joaw, nyangmi khyaukhaw ym ngei kaw vyngcee yn duːn nyng saksi jaa thawn haijaa nyangmi khuphaw vyng kuːh humhui khokhuːt byihjyt. Yn cee ynhaa tawkka sathih beinyak a si!,” y tiinyak.
12Yn haa zet awla khyang haa jubaijeinyak tala ym susaih jok. 13Yn haa naa tusee haa shyt awla nehmawh panuukung situii jun theilaa ym kaansyak.
Baptisma Jawhan Bytnyak
(Matthai 14.1–12; Luka 9.7–9)
14 #
Mat 16.14; Mar 8.28; Luk 9.19 Syamphalyang Herod#6.14 Syamphalyang Herod: Galilee pee uptih Herod Antipas. naa, Jesuh ming lianluu khyang hnguatluu. Ycya khyang naa, “Baptisma Jawhan bytnyak kuːh thoo bua, ynkhiannyng muːnnawsee tih phungan haa duan nyn” tilaa ym hyau.
15Ycya haa naa hyau, “Yn cee Elijah y si,” ym tiinyak.
Acya hanaa khy, “Acuːk hngukuːh yn cee hngawpawe pahuat, dukkuːh hngawpaw pahuat jyng,” ym tinyak.
16Ynbawlakhy Herod naa jyak hnguva, “Keei naa luugee khuːn hnguːt khyang, Jawhan byt nyak kuːh thoobua,” tilaa y hyau. 17#Luk 3.19–20 Herod pumhngawe naa, y bee Philip pihia y nyakbua. Ynkhiannyng, Herodias naa y khyang haa tuːh theilaa Jawhan muannei syak, ynpynnyng khuun theila, phehimm dukka y tyak. 18Jawhan naa Herod eyng hyau, “Nyang naa ny nau pihia, ny pihia nyakcee tala jo” tila y hyau hnguːt khiannyng asi.
19Ynkhainnyng Herodias naa Jawhan lungnaw theila tuu hluː laakhy tukky lawh hnguːt jo, 20Ibawthonnyngmaa tijyngcee Herod naa Jawhan cee cim theila puːnpok tih tinyak khyang hnguat khiannyng, kyhkhiat theilaa, y zongupiat. Herod naa Jawhan khyau jyak hnguva, lungtynn pyangkuː laakhy lungjynyak kyng y ngeisoi.
21Apyihnyakkyng Herod naa y myihhnguːp pyng, Galilee pee kuːh liantih haa laa y pee kuːh khyanglian haa eyng, muːbuh cawhpyi y caai. 22Herodias zawehngu#6.22 Herodias zawehngu; acya kuːtjok cawvyng Herodias naa zawehngu, tijyng myi. cee phawluu theilaa y lyaamluu hnguva, Herod laa y khiin haa y lungjy syak. Herod Syamphalyang naa, “Ny lyvei ikhy si seh keei jyng hyau, nyang nyng yn ky beijy,” tilaa saksi jyng y hyau. 23Atha khy, “Ny hngihei tomti, ky teengpee kuːh voakhuat ky beijy,” tila y hyau.
24Yn hngucee hngutawzawe zet theilaa y nuu vyng hngijei, “I ky hngihei lawh eyymaa?”
Y nue naa “Baptisma Jawhan luugee,” tiilaa y hyau.
25Hngutawzawe cee syamphalyang cengnga saisi voang theilaa, “Baptisma Jawhan luugee myn biaa eyng ajyanga ny bei luu vy ky luː” y tinyak.
26Syamphalyang y lung poaijei jo, ibawthonnyngmaa tijyngcee ynih khiin haa hngoaimaw va juannei khiannyng, yn hngutawzawe hngihei khyang cah nyn jo. 27Ynkhiannyng Syamphalyang naa saisi kung Jawhan luugee lawvei haijaa zongtih khyang pahuat y tuːh. Yn khyang zet theilaa thawngimm dukka voangngei theilaa Jawhan luugee khuːnei, 28ynih luugee biaa eyng luu theila hngutawzaw eyng bei. Hngutawzaw naa cee y nuu vyng beijei. 29Yn sityang jyak hnguva, Jawhan hngulawnglyk haa luu theiawla y jawk cee zu vaa ym khuːhei.
Jesuh naa Khyang Thongpahngaw Y Cawh
(Matthai 14.13–21; Luka 9.10–17; Jawhen 6.1–14)
30Y ceepaw haa Jesuh cenga dynei luubua theila ym cawkhuːt khyang laa caihuːt khyang tomti ym saih bua. 31Ynpynnyng, ibawthonnyngmaa tijyngcee Khyang panuu luu zet khiannyng yn haa cee eijy cuːn khy taw joaw. Yn haa eyng y hyau, “keei dy luu vyt hiiv nawva duːmmei hai mawpaw,” y tiinyak. 32Ynkhainnyng yn haa lawng ngyng dyangngei theila a hiiv naw duːn naa ym zet.
33Ynbawlakhy khyang panuu naa yn haa zet khyang ym hnguh hnguva, Jesuh laa y hngulawnglyk haa tijyng ym hnguat khiannyng naampung tomti kuːh khyang haa luu theiawla mawva ym phawvei pyn. 34#Mat 9.36 Jesuh lawng huan naa kuːh kawm theila, khyang puː y hnguh hnguva, ni khyang hacee paanaw hai myi tih kaw hluzawe haa bawvaa thon khainnyng maannei nyak tawivei theilaa, yn haa vyng panuu kung y cawkhyau. 35Khuumuː luu hnguva y hngulawnglyk hanaa y cenga zet theila, “ni duːn cee doaiduːk asi,” “khuu khy amuː luu hngyh. 36Yn khyang haa, naam thua zet awlaa ym eiawk khy hleijei haija hluːh,” ym tinyak.
37Mawhpawe naa, “yn khyang haa ei jy nyangmi naa beijyt,” y tinyak.
Yn hanaa, “hyaansaw#6.37 hyaansaw: phyihsa cee khutlup tihaa eyng kum pyih kawva ym bei khyang kuːtcaw (tovyt Mat 20.2). phawhngih pyttyng khyang hawh eijy hleijei theilaa kym cawh nynny ny hyau vei?” ym tinyak.
38Jesuh naa, “phee i hawh nym tawvei maa? zet cawla toveijyt” tila hyau.
Ym hnguh hnguva, yn hanaa, “phee pahngaw laa ngawethek hngih myi,” ym tinyak.
39Ynpynnyng Jesuh naa khyang tomti abawngnga khoai theila biaa huanaa ngoa syak kiah. 40Hngucee phawhuat puː hngawekip puː abawngnga ym ngoa kiah. 41Jesuh naa phe pahngaw laa ngawawthek hngih lo pynnyng, huankhu lyaam to, Nuatpawe tyaknawe theilaa phee eeh. Ynpynyng khyang puː haeyng phyaihjat haijaa hngulawnglyk haeyng y bei. Ngawethek hngih khy khyang puː tomti jyng y phyaih. 42Khyang puː tomti naa ei awla ym hngawh kiah. 43Ynpynnyng phe laa ngawethek hngih ym ei zawn khyang hngulawnglyk hanaa ym dynbua hnguva tong kulaihngih ym lawh. 44Eitih khyang tomti hacee putawe pyt tong pahngaw ym si.
Jesuh Tuii Khungnga Lyamzet
(Matthai 14.22–23; Jawhen 6.15–21)
45Yn pynnyng Jesuh naa hngulawnglyk haa cee lawng huanna koai shyak theilaa Bethsaida luh aa zetpiang haiawva ajyangnga y tuːh. Khyangpuː haa khy kaa shyak theilaa ym imm ma y tuːh bua. 46Khyang puː dy kaa pynnyng, Jesuh cee hngihminnei haija cung huanaa y koai. 47Khumuː luuhngyh hnguva, lawng cee li duːduːm myng amyi, Jesuh cee pythngaw kong huanaa y myihngut. 48Hngulawnglyk hacee khi ym khawm khianyng lawng hlyeu nyakyng ym jaai tawng hngyh khyang Jesuh naa hnguh. Ynkhianyng Jesuh cee thoaih lyammaa yn haa cengnga tuii khunga y zet. Yn haa y zehtyak#6.48 Yn haa y zehtyak; sikawvyngcee y bawngei voih. khy thawn hnguva, 49yn haa naa tuii kungnga lyamzet khyang ym hnguh hnguva, khawaw byang ti theilaa ym pang, 50ibawthonnyngmaa tijyngcee kyhseetih a yn haa naa ym hnguh.
Jesuh naa yn haa eyng saisikung y hau, “lunghlym nyak tawvei jyt, keei ky si, kyh kawh yt!” y tinyak. 51Yn pynnyng yn haa dy lawng dukka y voang theilaa khi ahuːpsyak. Hngulawnglyk haa naa ahlyija ym muːnnyak, 52ym lungbawng cang khianyng; yn haa naa phee thawnluu khyang jawcu joaw.
Gennesaret pee aa Jesuh naa Nehmawh haa Kaansyak
(Matthai 14.34–36)
53Tuiiku ym kuat pynnyng Gennesaret pee phaw hnguva, ym lawng ym khuun. 54Lawng huan kuːh ym kawmla, khyang hanaa Jesuh hnguh hnguva ym hnguat hlyi. 55Yn khianyng naam ceng kika tomti jyng zetzon jok theiawlaa, Y myih nyak ym jyaknyak duːn tyngyng nehmawh haa phawhiih dypa ym suduanluu. 56Jesuh zet nyak naam haa, luh haa, lai, tukjyh tomti jaa nehmawh haa ym thyaklu. Jesuh suisyak pei hliam lawhey tawkka ym khawhei. Yn hliam lawh tih tomti khy kaangsaanyak ym lawh bua.
S'ha seleccionat:
Marka 6: NTHTB25
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 by the Word for the World International