ရှင်လုကာ 19
19
အခန်း (၁၉)
အခွန်ကောက်တိဇက္ခဲ
1အင်မ်ပါလ်နောလ် ကိုယ်တော်ယေရှုခေါမ် ဂျေရိခေါလုဒုလ့်ကာလ်ဝင်ထေ့နား အဈာတ်။ 2အင်မ်လုအောလ် ဇက္ခဲမိန်နိုးတိ ခေါင်ပွလ်ဟှတ်အမယ်။ အင်မ်ခေါင်ခေါမ် အခွန်ကောက်အလန်တိပွလ်ဟှတ်တောလ် ထောလ်ထေ့နား ဘိုးတိပွလ်ဟှတ်တောလ်ခါ အထောလ်။ 3ဇက္ခဲနား ကိုယ်တော်ယေရှု ဟအူနောက်ခေါမ် မှူးဟိုင်အလီနားခါ အတိန်တိုးထေ့နား ကိုယ်တော်ယေရှုကာဝေါလ် ခေါင်လှီ့ပူနူးအာမ်မယ်ခန်းနောလ်မှူးလောဒ့်ယော်။ 4အင်မ်ဘော်ခန်းနောလ် ကိုယ်တော်ယေရှု မှူးလောဒ့်ဟိုင်တွက်ကာလ် အမော်ဝေါလ်ဈာလ်ထေ့နား ဆပိထိင်းဟြှလ်နောလ်အကွာ။ ဟိဘော်ဟိုင်ရိုးနောက်ဟိုဝေါလ်စေး ကိုယ်တော်ခေါမ် အင်မ်လာမ်းဘော် အဈာတ်တိုက်ခန်းနောလ်ထောလ်။
5ကိုယ်တော် အင်မ်ဓိလ်နောလ် အခိုက်လူးဟိုဝေါလ် အဟြှလ်ဓေါ့်ထေ့နား “ဇက္ခဲယား၊ အရင်ငေါလ်ကာမ်းလူး၊ တုနှိုပ် နာင်အိမ်းမာလ် ကေး ကေတည်းလောဒ့်အိုက်” တိရို အမိန့်။ 6အင်မ်ခန်းနောလ် ဇက္ခခဲခါ ထိင်းဟြှလ်နောလ်ကိ အရင်ငေါလ်ကာမ်းလူးထေ့နား ကိုယ်တော် ပျော်ဗာန် အကြိုဆိုလှာလ်။
7အင်မ်အဖြစ်ပျက်လှီ့ မှူးတိလှီ့ ခေါင်လှီ့နား “နီစေး အပြစ်ဒုစရိုက်ဆော်ပွလ်ဟှတ် အိမ်းမာလ်တည်းဟိုင် အဈာတ်” တိရို အာမ်ဝေဖန်။
8အင်မ်ပါလ်နောလ် ဇက္ခဲနား တုလ်ဗာန် ကိုယ်တော်ဝေါလ် “အရှင်ငါး၊ အရှင်ငါး ကေးပိုင်ခေါမ်လှီ့ စါက်ကယ်တိလှီ့အောလ် ဝှက်ဟှတ် ကေပက်တိုက်။ အင်မ်အပြင် ပွလ်ဟှတ်ဟှတ်စငေါလ်ကိ အပိုကေကောက်ခေါမ် ဒေါင်းဂိုဝေါလ်ကိ ဒေါင်းဂိုလှီ့ဆပလှီ ကေပက်ဘွာလ်ဝိုက်” တိရို အလျှောက်။
9ကိုယ်တော်နား ဇက္ခဲရိုး “နာင်ခါ အာဗြဟံ မျိုးဆက်ကာလ် နာထောလ်ခန်းနောလ် တုနှိုပ်ပါလ်ကထု စအယ်နား နာင်လား နာင် မိသားစုကိမ်ကိမ် ဖုလော်ရှင်နား အကယ်တင်ပါလ်။ 10ခေါင်စိုးခါ ခိတ်တိခေါင်လှီ့ ဆူလ်ထေ့နား ကယ်တင်ဟိုင် အကြွလူးယောင်” တိရို အမိန့်။
ဒေါင်းဂိုမိနာဟြာပုံဥပမာ
11ခေါင်လှီ့နား ကိုယ်တော်ယေရှုခေခေါ အာမ်ငေးလှူလှူဟိုဝေါလ် ကိုယ်တော်ယေရှုနား ပုံဥပမာပုဒ်ဟှတ် ဆက်ကယ်နားအမိန့်။ ဟိဘော်ဟိုင်ရိုး နောက်ဟိုဝေါလ်စေး ကိုယ်တော်ခေါမ် ဂျေရုဆလင်လုကာ အခိုက်လူးပါလ်ခန်းနောလ် ခေါင်လှီ့နား ဖုလော်ရှင်သာသနာတော် ချက်ချင်းအပေါ်လူးဝိုက်ဟိလ့်တိရို အာမ်ခိလ်ခန်းနောလ်ထောလ်။ 12ကိုယ်တော်နား “ဟမာလ်ရာထူးလန်တိခေါင်ပွလ်ဟှတ် အပုန်းဟို့ဘီရိုးကိ ဆောင်ဖလောင်ထောလ်ဟိုင် တင်မြှောက်ခေါမ် ခံလောဒ့်ဟိုင်တွက် ဆောင်ဖလောင်အလန်ဆုံးမယ်နောက် အလှမ်းမာလ်ကိ ဘီရိုး ဈာတ်ထေ့နား အုပ်ချုပ်ဟိုင်အလူးဘွာလ်။ 13အင်မ်ဘော် အဈာတ်လှောင်နောလ် အစေခံဟြာ ပါနယ်ထေ့နား ပွလ်ဟှတောလ် #19:13 ဒေါင်းဂိုတစ်မိနာ့= ခေါင်ပွလ်ဟှတ်နှိုပ်ဖိုးဟှတ်လုပ်အားခဓေါလ်အညီမျှ။ ဟြှားဒင်္ဂါးပြားဟှတ်။ဒေါင်းဂိုဟြာမိနာစီ(မ်)အပက်ဟိလ့်။ အင်မ်ခေါင်လှီ့အောလ် ‘နီဒေါင်းဂိုဝေါလ် ကေလူးဘွာလ်ဝေ့ ရင်းနှီးထေ့နား စီးပွားရေးဆူလ်ဘွတ်စူး’ တိရို အဆိန်ဟိလ့်။
14အင်မ်ဘော်နားခါ အဘီဟို့ဝေါလ်ကိ ခေါင်လှီ့နား အင်မ်အမှူးဓေါင်ခန်းနောလ် အနှူဝေါလ် သံတမန်အချို့ တိထေ့နေား ‘နီခေါင် ကေးမီးဘီရိုး ဆောင်ဖလောင်ငေါလ် အထောလ်ဟိုင်လီယော်င’ တိရို ဆောင်ဖလောင်အလန်ဆုံးငေါလ် အာမ်ဟောင်ဝေဆောက်။
15အင်မ်ဘော်နားခါ အင်မ်ရာထူးလန်တိနား ဆောင်ဖလောင်အဖြစ် တင်မြှောက်ခံဟိလ့်ထေ့နား အပုန်းဟို့ဘီရိုး လူးဘွာလ်ထေ့နား ဒေါင်းဂိုအပက်ဟိလ့်ခေါမ် အစေခံဟြာ အမော်ဝေါလ် အဆောင်။ အပက်ဟိလ့်ခေါမ် ဒေါင်းဂိုဝေါလ် စီးပွားရေး အီဟို့ဘောင် အာမ်တိုးတက်လူးနောက်ခေါမ် စုတ်င်ဟိုင်အလီခန်းနောလ်ထောလ်။
16စိပ်စိပ် အစေခံလူးထေ့နား ‘ရှင်ငါး၊ အရှင်နား နာပက်ဟိလ့်ခေါမ် ဒေါင်းဂိုတစ်မိနာဝေါလ် ဆဟြာထက်ခေါမ်ပိုဝေနား တိုးပွားဟနောလ် ကေစိုင်း’ တိရို အလျှောက်။
17ဆောင်ဖလောင်နားခါ ‘အခိလ်။ နာင်နောက်ခေါမ် အမှုကိစ္စအဒိပ်တိကုံးငေါလ်ခါ ဆတ်ဇော်မယ်တိ အစေခံပွန်ရိုးနာထောလ်ခန်းနောလ် လုလုဟြာ ပိုင်ဆတ်’ တိရို အဟောင်။
18အင်မ်ပါလ်နောလ် အနှိနောက် အစေခံခါ လူးထေ့နား ‘အရှင်ငါး၊ အရှင် ပက်ဟိလ့်ခေါမ် ဒေါင်းဂိုဝေါလ် ဆပိုးဟိုရ်ဘောင် တိုးပွားဟနောလ် ကေစိုင်း’ တိရို အလျှောက်ဟိုဝေါလ်
19ဆောင်ဖလောင်နားခါ ‘အခိလ်။ နာင်နားခါ လုလုပိုးဟို ပိုင်ဆတ်’ တိရို အဟောင်။
20အင်မ်ဘော်နားခါ အထုမ်နောက် အစေခံနားစေး ‘အရှင်ငါး၊ အရှင် ပက်ဟိလ့်ခေါမ် ဒေါင်းဂို နီရိုး။ ပုဝါဝေါလ် ထုတ်ပယ်နား ကေစီမ်း။ 21နာင်နောက်ခေါမ် နာပုန်းဟို့နားနာပိုင်ခေါမ် ဆီးကော်နာစီမ်(မ်)မယ်ထေ့ဘော် နာပုန်းဟို့နား နာလိမ်းယခေါမ်ထိင်းဌေ့ယီပါးလှီ့ ယှိုင်းထေ့တိ စည်းကမ်းတင်းကြပ်တိအောလ် နာထောလ်ခန်းနောလ် နာင်ကေကိ’ တိရိုအလျှောက်။
22အင်မ်ဟိုဝေါလ် ဆောင်ဖလောင်နား ‘နာင်နောက်ခေါမ် ပွန်ယတိ အစေခံပွလ်ဟှတ်ယောင်၊ နာင်ဟောင်ခေါမ် ခေခေါဘော် အပြစ်စီရင်ခေါမ် နာခံလောဒ့်အိုက်။ ကေးနား ကေပိုင်ယခေါမ်လှီ့ ကေစီမ်မေဘော် ကေလိမ်ယခေါမ် ထိင်းဌေ့ယီပါလှီ့ ယှိုင်းတိ စည်းကမ်းတင်းကြပ်တိတိရို နာင်နား အမှန်ကုံးငေါလ် ယုမ်ထေ့နား လက်နာခံနောက်ဟိုဝေါလ်စေး 23ဟိဘော်ဟိုင်ရိုး ကေးဒေါင်းဂိုဘဏ်ဒုလ့်ကာလ် အပ်ပေယော်တိ။ နာအပ်ပေဟိုဝေါလ်စေး ကေး ကေလူးဘွာလ်ဟိုဝေါလ် ကေးဒေါင်းဂိုဘဏ်အတိုးဓေါလ် ဟှတောလ် ကေလောဒ့်အိုက်’ တိရို အမိန့်။
24အင်မ်ပါလ်နောလ် ဆောင်ဖလောင်နား အစွာအစေခံလှီ့ ပါနယ်ထေ့နား ‘အင်မ်စငေါလ်ကိ ဒေါင်းဂို လိုဝေဘွာလ်ထေ့နား ဒေါင်းဂိုမိနာဟြာတောဝေတိအောလ် ပက်တောလ်’ တိရို အမိန့်။ 25အင်မ်လှီ့နား ‘အရှင်ငါး၊ အင်မ်စငေါလ် ဒေါင်းဂိုမိနာဟြာအမယ်ပါလ်’ တိရို အာမ်လျှောက်ခန်းနောလ်
26ဆောင်ဖလောင်နား ‘နာင်မီးရိုး ဟောင်ဟိုင်ကေလီခေါမ်စေး ယုမ်မာလ်လောဒ့်တိခေါင်ငေါလ် ပိုဝေနားပက်တိုက်နားခါ ယုမ်မာလ်လောဒ့်ယတိခေါင်စငေါလ်ကိစေး အင်မ်နောလ်ပက်တယ်တိ မက်စောကုံးခါ သိမ်းခေါမ်ခံလောဒ့်အိုက်။ 27တုအောလ် ကေးနား ဆောင်ဖလော်အဖြစ်အုပ်ချုပ်ခေါမ် လီယတိ ကေးဆုန်ပွီလှီ့ နီဓိလ်နောလ် လူပူနိုးထေ့နား ကေးမော်ကုံးငေါလ် အင်မ်ခေါင်လှီ့ ဓူးဝေါလ်’ တိရို အမိန့်ပက်” တိရို အမိန့်။
ဂျေရုဆလင်လုအောလ် ဝင်ခေါမ်
28ကိုယ်တော်နား အင်မ်ဘော် အဟောပါလ်နောလ် တပည့်တော်လှီ့မော်ဝေါလ်ကြွထေ့နား ဂျေရုဆလင်လုအောလ် တပည့်တော်လှီ့ဓေါလ် ဆက်ကယ်နားအဈာတ်။ 29သံလွင်ကုန်းဟြှလ်ကာဝေါလ်ကိ ဗက်ဖာဂေနာမ်းလား ဗေသနိနာမ်းကာ အာမ်ခိုက်ယေဟိုဝေါလ် အတပည့်ပွလ်နှိ မော်ဝေါလ်အတိ။ အတိလှောင်နောလ် ကိုယ်တော်နား အင်မ်ဟွဒ့်ရိုး 30“အမော်ဝေါလ်ကိ နာမ်းမာလ် ဈာတ်သားဟိ။ အင်မ်ဓိလ်နောလ် အူနားခါ အာမ်စူမ်ဖူဟာမ်းယခေါမ် မြည်းစောလူဟှတ် ရွရ်းဓေါလ်အဟင်နယ်ခေါမ် နာဟီမှူးအိုက်။ ရွရ်းဆွီ့ထေ့နား ကေးစငေါလ် လူးဘွတ်ဟီ။ 31ပွလ်ဟှတ်ဟှတ်နား ‘ဟိဘော်ဟိုင်ရိုး နီမြည်းရွရ်း နာဟီဆွှီ့ တိရို အာမ်ဟိ့ဟိုဝေါလ်စေး အရှင်နား အလီမယ်ခန်းနောလ်’ တိရို ဟောင်ဘွတ်ဟီ့” တိရို အဆိန်။
32အင်မ်တပည့်တော်ပွလ်နှိခါ နာမ်းဒုလ့်ကာလ် အဟီခိုက်ယေဟိုဝေါလ် အင်မ်ဓိလ်နောလ် ကိုယ်တော်ယေရှုဟောင်ဘော် ကိမ်ကိမ်အဟီမှူး။ 33အင်မ်တပည့်တော်ပွလ်နှိနား မြည်းစော ရွရ်းအဟီဆွီ့ဟိုဝေါလ် အမို့လှီ့နား “ဟိဘော်ဟိုင်ရိုး မြည်းစော ရွရ်းနာဟီဆွီ့” တိရို အဟိ့။
34အင်မ်တပည့်တော်ပွလ်နှိနားခါ “အရှင်နား အလီမယ်ခန်းနောလ်” တိရို အဟီဖြေဘွာလ်။ 35အင်မ်ပါလ်နောလ် အင်မ်တပည့်တော်ဟွဒ့်နား မြည်းစောခေါမ် ကိုယ်တော်စငေါလ် လူထေ့နား မြည်းခုံငေါလ် ဆူဆောက်ဖို့ထေ့နား ကိုယ်တော်ခေါမ် မြည်းခုံငေါလ်စူမ်ခွတ်ဟိုင်ရိုး အဟီကူညီပက်။ 36အင်မ်မြည်းစော စူမ်ထေ့နား ဂျေရုဆလုအောလ် ဈာတ်နောက်လာမ်းမာလ် ခေါင်ထုပရိတ်သတ်လှီ့နား ကိုယ်တော်ယေရှု မော်ဝေါလ်ကိလာမ်းခုံငေါလ် အာမ်ဆူဆောက်လှီ့ အာမ်ဖို့ပက်။
37ကိုယ်တော်ယေရှု ဂျေရုဆလင်လုကာဝေါလ်မယ်တိ သံလွင်ကုန်းငေါလ်ကိ ကာမ်းနောက်လာမ်းမာလ် အခိုက်ဟိုဝေါလ် အင်မ်ဓိလ်နောလ်မယ်တိလှီ့ ကိုယ်တော်ယေရှု #19:37 တပည့်တော်ကိမ်ကိမ်နောက်ခေါမ်စေး ကိုယ်တော်ယေရှု ခေငေထေ့နား ကိုယ်တော်ယေရှုနှူဝေါလ်ရုန်းလူးတိလှီ့ကိမ်ကိမ်ငေါလ် အာမ်ထောလ်။တပည့်တော်လှီ့ကိမ်ကိမ်နား အာမ်ပုန်းဟို့မှူးဟိလ့်လောဒ့်ခေါမ် ကိုယ်တော်ယေရှု စိုင်းဟိလ့်ခေါမ် စါစ်နောက်ဟိုင်လှီ့တွက် ပျော်ရွှင်ဗာန် ပါရ်ထေ့နား ဖုလော်ရှင် အာမ်ချီးမွမ်း။
38အင်မ်လှီ့နား “ဖုလော်ရှင် နာမတော်ဓေါလ် ကြွလူးတိ ဆောင်ဖလောင် ကာမ်ချီးမွမ်း။
ဟြှားလုအောလ် ငြိမ်းချမ်းခေါမ်မယ်ဆီးလိုင်။ ဟြှားလုအောလ်မယ်တိ ဖုလော်ရှင် ကာမ်ချီးမွမ်း” တိရို အာမ်ပါရ်။
39အင်မ်ဟိုဝေါလ် ခေါင်လှီ့ ပူနူးဒုလ့်ကာလ်ကိ ဖာရိရှဲအချို့လှီ့နား ကိုယ်တော်ဝေါလ် “ဆလော်ဝြား၊ နာင်တပည့်လှီ့ နီဘော်အာမ်ပါရ်ယဟိုင် အမိန့်ပေးမော်ဝြား” တိရို အာမ်ဟောင်။
40အင်မ်ဘော်နားခါ ကိုယ်တော်နား အင်မ်လှီ့အောလ် “နာင်မီးရိုး ကေးနား ကေဟောင်ဝိုက်။ အပုံငေါလ် အင်မ်လှီ့ နီဘော် အာမ်ပါရ်ခေါမ် အာမ်ဓိမ်းနားစေး လုံးလှီ့ အာမ်ပါရ်ငိုက်” တိရို အမိန့်။
ဂျေရုဆလင်လုတွက် ကိုယ်တော်ယေရှုအကာပ်ခေါမ်
41အင်မ်ပါလ်နောလ် ကိုယ်တော်ယေရှု ဂျေရုဆလင်လုကာဝေါလ် ခိုက်ထေ့နား အင်မ်လုအမှူးဟိုဝေါလ် အကာပ်။ 42ကိုယ်တော်ယေရှုနား “ဟိဘောင်နား နာင်မီးစငေါလ် ငြိမ်းချမ်းရေး အလူနောက်ခေါမ် ဂျေရုဆလင်လုအောလ် မယ်တိလှီ့အား တုနှိုပ်ကုံးငေါလ် နာမ်စုတ်င်ဟိုင်ကေလီ။ အင်မ်ဘော်နားခါ တုချိန်ငေါလ် အင်မ်အရာလှီ့ နာင်မီးနား စူးတီးဟိုင်ဆီးယော်စု။ 43နာင်မီး ဆုန်ပူလ်လှီ့နား နာင်မီး တိုက်ခိုက်ဟိုင် အတားဆီးလှီ့ဆောက်ထေ့နား နာင်မီးဝန်းရံထေ့နား ဓိလ်တိုင်ငေါလ်ကထု အာမ်တိုက်ခိုက်ဟိုင်အချိန် နာင်မီးစငေါလ်အခိုက်လူးဝိုက်။ 44အင်မ်လှီ့နား နာင်မီးကိမ်ကိမ်ဓူးထေ့နား လုခါ လုံးလုံးဟှတ်တောလ်လုံးဟှတ်ကုံးခါတင်ငယ်ထေ့နား ကျန်တီးယဟနောလ် ဖျက်စီးခံလောဒ့်အိုက်။ ဟိဘော်ဟိုင်ရိုး နောက်ဟိုဝေါလ်စေး ဖုလော်ရှင်နား နာင်မီး ကယ်တင်ဟိုင် အကြွလူးခေါမ် နာမ်စုတ်င်ယခန်းနောလ်ထောလ်” တိရို အမိန့်။
ဗိမာန်တော်ဒုလ့် သန့်ရှင်းခေါမ်
45အင်မ်ပါလ်နောလ် ကိုယ်တော်ယေရှု ဗိမာန်တော်ခြံငေါလ် ဝင်ထေ့နား ဗိမာန်တော်ခြံဒုလ့်ကာလ် ဈီယီတိခေါင်လှီ့ အဆှုတ်လုတ်။ 46ကိုယ်တော်နား “ကျမ်းစော်ဝေါလ် ‘ကေး ဗိမာန်တော်ခေါမ် ခေါင်လှီ့နား ဆုအာမ်တောင်နောက်ဓိလ်နောလ် အထောလ်လောဒ့်အိုက်’ တိရို ရော့ကယ်နားခါ နာင်မီးနား ဗိမာန်တော်ခေါမ် သူခိုး၊ ဓါးပြလှီ့ စုအယ်နောက် ဓိလ်နောလ်ထောလ်ဟနောလ် နာမ်စိုင်း” တိရို အမိန့်။
47ကိုယ်တော်နား ဗိမာန်တော်ခြံငေါလ် နှိုပ်တိုင် တရားလှီ့ အဟောဟိလ့်နားခါ ဂျူးပုရောဟိတ်လန်လှီ့၊ ကျမ်းဆလော်လှီ့လား တစွာဂျူးခေါင်းဆောင်လှီ့နား ကိုယ်တော် ဓုတ်ဟိုင်ရိုး အာမ်ကြိုးစားဟိလ့်နားခါ 48ခေါင်လှီ့နား ကိုယ်တော်ယေရှု ဟောင်ခေါမ်ခေခေါလှီ့ ငေဟိုင်ရိုး အာမ်လုန်ပြင်းပြခန်းနောလ် အင်မ်ခေါင်လှီ့နား ကိုယ်တော် ဓုတ်ဟိုင် နည်းလမ်း စဉ်းစားဝေါလ်လောဒ့်ယော်ဟ။
S'ha seleccionat:
ရှင်လုကာ 19: CSJ
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Chin Songlai (ဆောင်လိုင်) Bible by Beyond Translation is licensed under Creative Commons Attribution-ShareAlike 4.0 License.