ရှင်လုကာ 18
18
အခန်း (၁၈)
တရားသူကြီးလား မှလ်နူးပုံဥပမာ
1အင်မ်ပါလ်နောလ် ကိုယ်တော်ယေရှုနား အတပည့်လှီ့အောလ် လုန်လျှော့ယကော် ဆုတောင်းလောဒ့်ဟိုင် ပုံဥပမာ ပွလ်ဟှတ်တောလ် အမိန့်ဟိလ့်ခေါမ်စေး 2“ဟမာလ် လုလုဟှတ်တောလ် ဖုလော်ရှင်ခါ ကိယတိ၊ ခေါင်လှီ့ခါ လေးစားမှုမယ်ယတိ တရားသူကြီး ပွလ်ဟှတ်အမယ်။ 3အင်မ်လုအောလ်မယ်တိ မှလ်နူးပွလ်ဟှတ်နား တရားသူကြီးစငေါလ် ဈာတ်ဆော်ထေ့နား ကေးလား ကေးပြိုင်ဘက်ကီကိုယ်ဝေါလ်ကိ အငြင်းပွားခေါမ် တရားမျှတဟနောလ် စိုင်းပက်ဟိုင်အလျှောက်။
4အင်မ်ဘော်နားခါ တရားသူကြီးနား မှလ်နူးအကူညီတောင်ခေါမ် အချိန်ဓီစိအငြင်းဟိလ့်။ အင်မ်ဘော်နားခါ နောက်ဆုံးငေါလ်စေး အင်မ်တရားသူကြီးနား ‘ကေးနား ဖုလော်ရှင်ခါကေကိယဘော် ခေါင်လှီ့ခါ အလေးကေတောဒ့်ယနားခါ 5နီမှလ်နူးနား ကေး အနှောက်ယှက်ဆော်ခန်းနောလ် အင်မ်တွက် တရားမျှတဟနောလ် ကေစိုင်းပက်လောဒ့်အိုက်။ အင်မ်ဟိုဝေါလ်ယောင် နီမှလ်နူး ကေးစငေါလ် လူးဆော်ဆော်ထေ့နား နှောင့်ယှက်တီးဟိုင် ဆီးယော်’ တိရို အစဉ်းစား” တိရို အမိန့်။
6အင်မ်ပါလ်နောလ် ကိုယ်တော်ယေရှုနား အတပည့်လှီ့အောလ် “အင်မ်တရားယတိ တရားသူကြီးနား အဟောင်ခေါမ် စဉ်းစားစမာလ်။ 7နီဘော် တရားယတိ တရားသူကြီးကုံးနားခါ မှာလ်နူးတွက် တရားမျှတဟနောလ် အစိုင်းပက်နောက်ဟိုဝေါလ်စေး ဖုလော်ရှင်နား အပုန်းဟို့စငေါလ် အကူညီပက်ဟိုင် ဆုတောင်ဆော်တိလှီ့ အပုန်းဟို့ရွေးချယ်ခေါမ် ခေါင်လှီ့တွက် တရားမျှတဟနောလ် အစိုင်းပက်ဟိုင်အသေချာယောင်ထေ့နား နာင်မီးအကူညီဟိုင် နှောင့်နှေးဟိုင်ဆီးယော်။ 8နာင်မီးရိုး ဟောင်ဟိုင် ကေလီခေါမ်စေး ဖုလော်ရှင်နား အင်မ်လှီ့တွက် တရားမျှတဟနောလ် အရင်ငေါလ်အစိုင်းပက်ဟိုင် အသေချာယောင်။ အင်မ်ဘော်နားခါ ခေါင်စိုး ကြွလူးဘွာလ်ခေါမ်ချိန်ငေါလ် နီဆုမ်သပ့်ကာလ် ဖုလော်ရှင် ယုမ်ကြည်တိလှီ့ အမှူးလောဒ့်အိုက်ယာ” တိရို အမိန့်။
ဖာရိရှဲလား အခွန်ကောက်ပုံဥပမာ
9အင်မ်ပါလ်နောလ် ကိုယ်တော်ယေရှုနား ပုန်းဟို့နားပုန်းဟို့ ကေဖြောင့်မတ် တိရို ခိန်နယ်ထေ့နား ခေါင်လှီ့နှိုမ်ထေ့တိ ခေါင်တချို့အောလ် ပုံဥပမာပုဒ်ဟှတ် အမိန့်။ 10“ဟမာလ်ခေါင်ပွလ်နှိ ဆုတောင်းဟိုင်ရိုး ဗိမာန်တော်ခြံငေါလ် အဟီဈာတ်။ ပွလ်ဟှတ်စေး ဖာရိရှဲဝေါလ်ထောလ်ထေ့နား အထာပွလ်ဟှတ်စေး အခွန်ကောက်ကာလ်အထောလ်။ 11ဖာရိရှဲနား အာပွတ်စောတုလ်ထေ့နား ‘ဖုလော်ရှင်ငါး၊ ကေးနောက်ခေါမ် အစွာခေါင်လှီ့ဘော် လောဘတောဝေဟီ၊ မရိုးမသား ကေစိုင်းခေါမ်ခါ မယ်ယော်။ အိမ်းထောင်ရေးရိုး ဆက်ဇော်ကေဖောက်ယခေါမ်အပြင် နီအခွန်ကောက်ဘော်ခါ ကေမယ်ယခန်းနောလ် ဖုလော်ရှင်ကျေးဇူး ကေချီးမွမ်း။ 12ကေး #18:12 ဓမ္မဟောင်းဒုလ့်ကာလ် ဂျူးခေါင်ယှီပွလ်ဟှတ်နောက်ခေါမ် ကုမ်ဟှတ်တောလ် အပြစ်ဖြေခေါမ်နှိုပ်ဟှတ်ယောင် အေအောတ်ဟာဥပုသ်စောင့်လောဒ့်တိရိုအပူလ်။ အင်မ်အပြင် ဂျူးခေါင်ယှီလှီ့နား လိုင်ရိုးထွက်တိ ပုံဟြာပုံထေ့နား ပုံဟှတ်ယောင် ဖုလော်ရှင်ငေါလ် အာမ်လှူလောဒ့်။ပတ်ဟှတ်တောလ် နှိုပ်နှိအေအောတ့်ဟာထေ့နား ဆုကေတောင်။ ကေးနား ကေလောဒ့်ခေါမ်တကအောလ်ကိ ဆယ်ဖို့တစ်ဖို့ခါ ဖုလော်ရှင်ငေါလ် ကေလှူဒါန်းဟိလ့်’ တိရို ဆုအတောင်။
13အင်မ်ဘော်နားခါ အခွန်ကောက်နားစေး အလှမ်းမာလ်ကထု တုလ်ထေ့နား နေဟြှလ်ကုံးခါ ဓေါ့်ဝေဝံ့ကော်ဝေါလ် အကာင်စာန်ဆုတ်ကယ်ဗာန် ‘ဖုလော်ရှင်ငါး၊ အပြစ်ဒုစရိုက်ဆော်ဝေါလ်ထောလ်တိ ကေးမာနယ်ပက်သား’ တိရို ဆုအတောင်။
14နာင်မီးရိုး ကေဟောင်လောဒ့်အိုက်နောက်ဟိုဝေါလ်စေး အင်မ်ခေါင်ပွလ်နှို အိမ်းမာလ် အဟီဈာတ်ဘွာလ်ဟိုဝေါလ် ဖုလော်ရှင် ခွင့်လွှတ်ခေါမ် ခံလောဒ့်တိစေး ဖာရိရှဲဆီးကော် အခွန်ကောက်တိအောလ် အထောလ်။ ဟိဘော်ဟိုင်ရိုးနောက်ဟိုဝေါလ်စေး ပုန်းဟို့နားပုန်းဟို့ ချီးမြှောက်ကယ်တိစေး နိမ့်ချခေါမ် ခံလောဒ့်ထေ့နား ပုန်းဟို့နိမ့်ချအယ်တိစေး မြှောက်ခေါမ်ခံလောဒ့်အိုက်” တိရို အမိန့်။
ဒိပ်စိုးလှီ့ဘော် နှိမ့်ချခေါမ်
15နှိုပ်ဟှတ်တောလ် ခေါင်အချို့လှီ့နား အာမ်စိုးနောင်လှီ့ ကိုယ်တော်နား အလှမ်းနားစေး ဖုလော်ရှင်စငေါလ်ကိ ပွန်တိလှီ့လောဒ့်ဟိုင်တွက် ကိုယ်တော်စငေါလ် အာမ်လူးပူနောက်။ အင်မ်ဘော်နားခါ တပည့်တော်လှီ့နား အာမ်မှူးဟိုဝေါလ် အင်မ်ဘော် အာမ်စိုင်းယဟိုင် ခေါင်လှီ့အောလ် အာမ်ဟောင်။ 16အင်မ်ဘော်နားခါ ကိုယ်တော်ယေရှုနား အင်မ်ဒိပ်စောလှီ့ ပါနယ်ထေ့နား “ဒိပ်စောလှီ့ ကေးစငေါလ် လူးဆပ်ဟ။ အင်မ်လှီ့ ငိုင်းယေကော့စူး။ ဟိဘော်ဟိုင်ရိုးနောက်ဟိုဝေါလ်စေး ဖုလော်ရှင်သာသနာတော်နောက်ခေါမ် နီဘော်ဒိပ်စောလှီ့ဘော် မယ်တိလှီ့တွက်ကာလ်ယောင်အထောလ်။။ 17နာင်မီးရိုး ကေးနား အမှန်ဟောင်ဟိုင်ကေလီခေါမ်စေး ဖုလော်ရှင်သာသနာတော်ခေါမ် ဒိပ်စောပွလ်ဟှတ်ဘော် လက်ခံယတိလှီ့စေး ဖုလော်ရှင်သာသနာတော်ဒုလ့်ကာလ် အီဟိုဝေါလ်ခါ ဝင်ခွင့်လောဒ့်ဟိုင်ဆီးယော်ဟ” တိရို အမိန့်။
ဘိုးတိ ဂျူးခေါင်ယှီအကြီးအကဲ
18ဟမာလ် ဂျူးခေါင်ယှီခေါင်းဆောင်ပွလ်ဟှတ်နား ကိုယ်တော်ဝေါလ် “ပွန်တိ ဆလော်ဝြား၊ နိစ္စထာဝရဆောက်င် လောဒ့်ဟိုင် ကေးနား ဟအီကေစိုင်းလောဒ့်အိုက်” တိရို အဟိ့။
19အင်မ်ဘော်နားခါ ကိုယ်တော်ယေရှုနား “ကေး ဟိဘော်ဟိုင်ရိုး ပွန်တိ ဆလော်တိရို နာဟောင်။ ဖုလော်ရှင်ပါးဟှတ်တောလ်ကိ လွဲထေ့နား ကောင်းမြတ်တိ အူခါမယ်ယော်။ 20ဖုလော်ရှင်ပညတ်တော်လှီ့ နာင်နား နာစုတ်င်။ အိမ်းထောင်ရေးဖောက်ပြန်ကော့။ ခေါင်ဆောက်င်ဓူးလောဒ့်ယော်၊ မူးဝေလောဒ့်ယော်၊ လှိုက်ယေလောဒ့်ယော်၊ နူးပေါလ် ရိုသေဘွတ်” တိရို အမိန့်။
21အင်မ်ခေါင်နား “ကေဒိပ်စောဟိုဝေါလ်ကထု နီပညတ်တော်ကိမ်ကိမ် လိုက်နာထေ့နား ကေကျင့်ကြံဟိလ့်” တိရို အလျှောက်။
22ကိုယ်တော်ယေရှုနား အင်မ်ခေခေါ အယှောက်ဟိုဝေါလ် အင်မ်ခေါင်ငေါလ် “နာင်နား နာစိုင်းဟိုင်ပွလ်ဟှတ် အမယ်ဟာမ်း။ နာပိုင်ခေါမ်လှီ့ကိမ်ကိမ်ရီထေ့နား စါက်ကာလ်တိလှီ့အောလ် ဒေါင်းဂိုလှူဘွတ်။ အင်မ်ဘော် နာစိုင်းဟိုဝေါလ်စေး နာင်နောက်ခေါမ် ဟြှားလုအောလ် ဥစ္စာစည်းစိမ်လှီ့ နာလောဒ့်အိုက်။ အင်မ်ပါလ်နောလ်စေး ကေးတပည့်အဖြစ် ကေးနှူဝေါလ်လူးဝြား” တိရို အမိန့်။ 23အင်မ်ဘော်နားခါ အင်မ်ဂျူးခေါင်းဆောင်ခေါမ် တပြင်းဘိုးတိပွလ်ဟှတ်တောလ် အထောလ်ခန်းနောလ် အင်မ်ခေါင်နား အင်မ်ခေခေါလှီ့ အယှောက်ဟိုဝေါလ် တပြင်းအဝမ်းနည်း။
ဘိုးတိလှီ့လား ဖုလော်ရှင်သာသနာတော်
24အင်မ်ခေါင်ဝမ်းအနည်းခေါမ် ကိုယ်တော်ယေရှုနား အမှူးဟိုဝေါလ် အတပည့်လှီ့အောလ် “ဘိုးတိလှီ့စေး ဖုလော်ရှင်သာသနာတော်ဝေါလ် ဝင်ဟိုင်အခက်ခဲ။ 25ထီဖင်ပေါက်ကာလ် ကုလာအုတ်လူဟှတ် ဝင်ဟိုင်စေး အလွယ်ဟာမ်းမိုက်။ ဖုလော်ရှင်သာသနာတော်ဝေါလ် ဘိုးတိပွလ်ဟှတ်အဝင်ဟိုင် အခက်ခဲ” တိရို အမိန့်။
26ပရိတ်သတ်လှီ့နား အင်မ်ခေခေါ အာမ်ယှောက်ဟိုဝေါလ် “နီဘော်နောက်ဟိုဝေါလ်စေး ဟိဘောင်ခေါင်လှီ့ ကယ်တင်ခေါမ် ခံလောဒ့်အိုက်” တိရို အာမ်ဟိ့။
27ကိုယ်တော်ယေရှုနား “ခေါင်လှီ့တွက် ထောလ်ခွတ်ယတိလှီ့ ဖုလော်ရှင်တွက် အထောလ်ခွတ်” တိရို အမိန့်။
28အင်မ်ဟိုဝေါလ် ပေတရုနား “ကေးမီးနား ကာမ်ပိုင်ခေါမ်လှီ့ကိမ်ကိမ် စွန့်လွှတ်ဟိလ့်ထေ့နား နာင်နှူကာမ်ယုန်းလူ” တိရို အလျှောက်။
29ကိုယ်တော်ယေရှုနား အတပည့်လှီ့အောလ် “နာင်မီးရိုး ကေးနား အမှန်ကေဟောင်လောဒ့်အိုက်နောက်ဟိုဝေါလ်စေး နာင်မီးနား ဖုလော်ရှင်သာသနာတော်တွက် နာမ်အိမ်း၊ နာမ်ပီးဟာ၊ နာမ်သာနောင်လှီ့၊ နာမ်နူးပေါလ်၊ နာမ်စိုးနောင်လှီ့ စွန့်လွှတ်တိလှီ့စေး 30တုဘဝအောလ် ပွန်တိလှီ့လောဒ့်ထေ့နား ဟြှားလုအောလ်ခါ နိစ္စထာဝရဆောက်င် အာမ်လောဒ့်အိုက်” တိရို အမိန့်။
ဘာလ့်ဟိုင်အကြောင်း အထုမ်နောက်အမိန့်ဗာန်ခေါမ်
31အင်မ်ပါလ်နောလ် ကိုယ်တော်ယေရှုနား သာဝကကုလာနှိ အကာဝေါလ်ဆောင်ထေ့နား “ငေရိုး။ တုအောလ် ဟမီးနောက်ခေါမ် ဂျေရုဆလင်လုအောလ် ဟမ်ဈာတ်။ ပရောဖက်လှီ့နား ခေါင်စိုးအကြောင်းလှီ့ အာမ်ရော့ဟိလ့်ဘော် အထောလ်လူးဝိုက်။ 32ဟိဘော်ဟိုင်ရိုးနောက်ဟိုဝေါလ်စေး အင်မ် ဂျူးခေါင်ယှီဆီးယတိလှီ့ကွတ်ဒုလ့်ကာလ် အာမ်အပ်ခေါမ်အခံလောဒ့်အိုက်။ အာမ်လှောင်ပြောင်ငိုက်။ အာမ်စော်ကားဝိုက်။ မွမ်ဒိလ် စာသွီရိုး အာမ်ဆွီနောက်ခေါမ် အခံလောဒ့်အိုက်။ 33အင်မ်ပါလ်နောလ် အင်မ်လှီ့နား မွာထေ့နား အဓုတ်ကိုက်။ အင်မ်ဘော်နားခါ အထုမ်နှိုပ်ပါလ် အဆောက်င်ဟင်လူးဘွာလ်ဝိုက်” တိရို မိန့်။
34အင်မ်ဘော်နားခါ အတပည့်လှီ့နား ကိုယ်တော်ယေရှု ဟောင်ခေါမ်ခေခေါ ရောစူးခွတ်ယော်ဟ။ အင်မ်ခေခေါ အဓိပ္ပါယ် အကွယ်ဝှက်ယေခန်းနောလ် ကိုယ်တော်ဟောင်ခေါမ်ခေခေါ ရောစူးခွတ်ယော်ဟ။
မိတ်မှူးယတိနား မိတ်အမှူးဘွာလ်ခေါမ်
35ကိုယ်တော်ယေရှုလား အတပည့်လှီ့ ဂျေရိခေါလုကာ အာမ်ခိုက်လူးဟိုဝေါလ် မိတ်မှူးယတိပွလ်ဟှတ် လာမ်းကာဝေါလ် ငွာထေ့နား အတောင်ငယ်။ 36အင်မ်နား ခေါင်ထုလှီ့ အာမ်ဈာတ်ရောခ့်ခေါမ် အရောက်ဟိုဝေါလ် ဟိဘော်လှီ့ရိုး ထောလ်တိရို အဟိ့။ 37ခေါင်တချို့လှီ့နား နာဇရက်လုအောလ်ကိ ကိုယ်တော်ယရှု ဖြတ်ထေ့နားအဈာတ်တိရို အာမ်ဟောင်။
38အင်မ်ဟိုဝေါလ် အင်မ်ခေါင်နား “ဆောင်ဖလောင်ဒါဝိဒ်စိုး#18:38 ဆောင်ဖလောင်ဒါဝိဒ်စိုး ယေရှုနောက်ခေါမ်စေး ဆောင်ဖလောင်ဒါဝိဒ်မျိုးဆက်ကာလ်အထောလ်။ ယေရှု ကေး မာနယ်ပက်မို့ဝြား” တိရို အပါ။
39ကိုယ်တော်မော်ဝေါလ် ဈာတ်ဟတိလှီ့နား အင်မ် ဒပ့်ကာလ်မယ်ဟိုင် အာမ်ဟောင်။ အင်မ်ဘော်နားခါ အင်မ်နား “ဆောင်ဖလောင်ဒါဝိဒ်စိုး ယေရှု ကေးမာနယ်ပက်မိုဝြား” တိရို ပါငေနား အဟောင်။
40ကိုယ်တော်နားအရောက်ဟိုဝေါလ် ဓိလ်းထေ့နား အင်မ်ခေါင် အပုန်းဟိုစငေါလ် လူးပူလ်နောက်ဟိုင် ခေါင်အချို့အောလ် အမိန့်အပက်။ အင်မ်ခေါင် အကာဝေါလ် အခိုက်လူးဟိုဝေါလ်
41ကိုယ်တော်ယေရှုနား “ကေးနား နာင်တွက် ဟအီလှီ့ ကေစိုင်းပက်လောဒ့်အိုက်” တိရို အဟိ့။
အင်မ်နား “အရှင်ငါး၊ မိတ်မှူးဘွာလ်ဟိုင် ကေလီ” တိရို အဟောင်ဘွာလ်။
42အင်မ်ဟိုဝေါလ် ကိုယ်တော်နား “မိတ်မှူးဘွာလ်ဆတ်။ နာင်ယုမ်ကြည်မှုနား နာင် အကုသပက်ပါလ်” တိရို အမိန့်။ 43အင်မ်ခေါင်နား ချက်ချင်းကုံး အမိတ် အမှူးဘွာလ်ခန်းနောလ် ဖုလော်ရှင် ချီးမွမ်းဗာန် ကိုယ်တော်ယေရှုနှူဝေါလ် အရုန်းနယ်လှာလ်။ အင်မ်အဖြစ်ပျက်လှီ့မှူးတိလှီ့ ခေါင်လှီ့နားခါ ဖုလော်ရှင် အာမ်ချီးမွမ်းလှာလ်။
S'ha seleccionat:
ရှင်လုကာ 18: CSJ
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Chin Songlai (ဆောင်လိုင်) Bible by Beyond Translation is licensed under Creative Commons Attribution-ShareAlike 4.0 License.