ရှင်လုကာ 20
20
အခန်း (၂၀)
ကိုယ်တော်ယေရှု အခွင့်အာဏာ
1နှိုပ်ဟှတ်တောလ် ကိုယ်တော်ယေရှုနား ဗိမာန်တော်ခြံဒုလ့်ကာလ် ခေါင်ထုလှီ့အောလ် ဆီးတင်ပွန်လှီ့လား တရားလှီ့အဟောဟိုဝေါလ် ဂျူးပုရောဟိတ်လန်လှီ့၊ ကျမ်းဆလော်လှီ့လား ဂျူးခေါင်ယှီဆောက်င်လန်လှီ့ ခိုက်လူးထေ့နား 2ကိုယ်တော်ဝေါလ် “နီလှီ့ ဟိဘောင်အခွင့်အာဏာဓေါလ်နာစိုင်း။ နီအခွင့်အာဏာ ဟအူနား နာင်ငေါလ် အပက်” တိရို အာမ်ဟိ့။
3အင်မ်ဟိုဝေါလ် ကိုယ်တော်နား “နာင်မီးရိုး မေးခွန်းပွလ်ဟှတ် ကေဟိ့ရိုက်။ ဖြေရိုး။ 4သွီးဓေါလ်သန့်စင်ခေါမ်ပေးတိ ဆလော်ယောဟန်နား ခေါင်လှီ့အောလ် သွီးဓေါလ်သန့်စင်ခေါမ်ပေးဟိုင် အခွင့်အာဏာ အင်မ်နောလ် ဟအူနားအပက်။ ဖုလော်ရှင်နားဝြာ။ ဆီးယနား ခေါင်ပွလ်ဟှတ်ဟှတ်နားဝြာ” တိရို အဟိ့။
5အင်မ်ဟိုဝေါလ် အင်မ်လှီ့နား ပွလ်ဟှတ်လား ပွလ်ဟှတ်ဆွေးနွေးထေ့နား “ယောဟန် အခွင့်အာဏာလှီ့ ဖုလော်ရှင်စငေါလ်ကိအလူး တိရို ဟောင်ဟိုဝေါလ်ခါ ကိုယ်တော်နား ‘အင်မ်ဘော်နောက်ဟိုဝေါလ်စေး ဟိဘော်ဟိုင်ရိုး ယောဟန်ယုံယော်စု’ တိရို အဟောင်ဘွာလ်ဝိုက်။ 6ခေါင်ပွလ်ဟှတ်ဟှတ်စငေါလ်ကိ တိရို ဟာမ်ဖြေဟိုဝေါလ်ခါ ခေါင်လှီ့နား ယောဟန်ခေါမ် ပရောဖက်ပွလ်ဟှတ်တိရို အာမ်ယုံခန်းနောလ် ဟမီး ဘာလ့်ဟနောလ် လုံးငေါလ်အာမ်ခုန်ငိုက်” တိရို အာမ်ဟောင်။
7အင်မ်ခန်းနောလ် အင်မ်လှီ့နား “ဟအူနား ယောဟန်ရိုး ခေါင်လှီ့အောလ် သွီးဓေါလ်သန့်စင်ခေါမ်ပေးဟိုင် အခွင့်အာဏာ အပက်နောက်ခေါမ် ကေးမီးနားစူးယော်င” တိရို အာမ်ဖြေ။
8အင်မ်ဟိုဝေါလ် ကိုယ်တော်နား “ကေးရိုးခါ ဟအူနား နီအခွင့်အာဏာ အပက်နောက်ခေါမ် ကေးနားခါ ဖြေခွတ်ယော်” တိရို အမိန့်ဘွာလ်။
စပျစ်ခြံဟိုတိလှီ့ပုံဥပမာ
9အင်မ်ပါလ်နောလ် ကိုယ်တော်ယေရှုနား ခေါင်ထုလှီ့အောလ် ပုံဥပမာ အမိန့်ခေါမ်စေး “ခေါင်ပွလ်ဟှတ်နား စပျစ်ခြံခြံဟှတ် လိမ်ဟိလ့်ထေ့နား အင်မ်ခြံ ခြံဟိုတိလှီ့အချို့အောမ်ဟိုဟိလ့်ထေ့နား အစွာဘီရိုး ခရီးထွက်ထေ့နား အင်မ်ဓိလ်နောလ် အချိန်ဓီဟနောလ်အမယ်ဟိလ့်။ 10စပျစ်ဌေ့ ပေါ်ချိန်ငေါလ် ခြံမို့နား အစေခံပွလ်ဟှတ် တိထေ့နား အလောဒ့်ဟိုင် ခြံငေါလ်ထွက်တိ အဌေ့အချို့ အတောင်ငယ်ဆောက်။ အင်မ်ဘော်နားခါ အင်မ်အစေခံခေါမ် ခြံဟိုတိလှီ့နား မွာထေ့နား အီခါပေးကော် အာမ်တိဘွာလ်။ 11အင်မ်ပါလ်နောလ် ခြံမို့နား အနှိနောက် အစေခံပွလ်ဟှတ် အတိဘွာလ်တီ။ အင်မ်ဘော်နားခါ ခြံဟိုတိလှီ့နား အင်မ်အစေခံခါ မွာဗာန် အယှောက်ခွဲထေ့နား အီခါပေးကော် အာမ်တိဘွာလ်။ 12အထာကွန်ဟှတ် ခြံမို့နား အထုမ်နောက် စေခံ အတိဘွာလ်တီဟိုဝေါလ်ခါ ခြံဟိုတိလှီ့နား အစိပ်ဟိုဝေါလ်ကိ အစေခံလှီ့ဘော်ယောင် မွာထေ့နား စပျစ်ခြံအပြင်ငေါလ် အာမ်ဆှုတ်လိုခ့်။
13အင်မ်ဟိုဝေါလ် စပျစ်ခြံမို့နား ‘ဟိဘော် ကေစိုင်းလောဒ့်အိုက်နောက်ခေါမ် ကေစုတ်င်ပါလ်။ ကေးခစ်ခေါမ် ကေးစိုး ကေတိအိုက်။ အင်မ်လှီ့နား ကေးစိုးနောက်ဟိုဝေါလ်စေး အာမ်လေးစားဟိုင်ယောင်’ တိရို စဉ်းစားထေ့နား အစိုးအတိ။
14အင်မ်ဘော်နားခါ ခြံဟိုတိလှီ့နား ခြံမို့နားအစိုး အလူးခေါမ် အာမ်မှူးဟိုဝေါလ် ‘နီခေါင် နီခြံမှေလောဒ့်ဟိုင်ရိုး အထောလ်။ အင်မ်လောဒ့်ဟိုင်မှေ ဟမီးနား လောဒ့်ဟိုင်ရိုး အင်မ်ခေါင် ဓူးလူးပူး’ တိရို ပွလ်ဟှတ်လားပွလ်ဟှတ် ဟောင်ထေ့နား 15ခြံဟိုတိလှီ့နား ခြံမို့အစိုး စပျစ်ခြံ အပြင်ငေါလ်ထုထေ့နား အာမ်ဓုတ်။
အင်မ်ဘော်နောက်ဟိုဝေါလ်စေး ခြံမို့နား အင်မ်လှီ့ ဟိဘော် အပုအိုက်။ 16စပျစ်ခြံမို့ လူးထေ့နား ခြံဟိုတိလှီ့ အဓုတ်ကိုက်။ ပါလ်နောလ်စေး ခြံခေါမ် အစွာခေါင်လှီ့အောလ် အပက်တိုက်” တိရို အမိန့်။ ကိုယ်တော်ဟောင်
ရောလောဒ့်တိလှီ့နား “နီကိစ္စလှီ့ အီဟိုဝေါလ်ခါ ထောလ်လူးယဆလာ” တိရို အာမ်ဟောင်။
17အင်မ်ဟိုဝေါလ် ကိုယ်တော်နား အင်မ်လှီ့ဓေါ့်ဝေဗာန်
“ကျမ်းစော်ဒုလ့်ကာလ် ရော့ကယ်တိ အိမ်းဆောက်တိလှီ့နား အာမ်လီယခေါမ် #20:17 နီစော်ကြောင်းငေါလ် ထောင့်ချုပ်လုံးနောက်ခေါမ် ကိုယ်တော်ယေရှုရည်ညွန်းယေ။ ကိုယ်တော်ယေရှု ငြင်းပယ်တိလှီ့ ခမ်းလောဒ့်ဟိုင် အမိန့်ခေါမ်ငေါလ်ထောလ်။လုံးနောက်ခေါမ်
အရေးကြီးတိလုံးငေါလ် အထောလ်လူး နောက်ခေါမ်အဓိပ္ပါလ် ဟအီအဆိုလို။
18အင်မ်လုံးခုံငေါလ် ကိုးတိခေါင်လှီ့ အပိုင်းပိုင်းရိုး ကျိုးကြေအာမ်ပျက်စီးရိုက်။ အင်မ်လုံးနား ပွလ်ဟှတ်ဟှတ် အကောက်နောက်ဟိုဝေါလ်ခါ အင်မ်ခေါင် အဖက်တေဇိတိုက်” တိရို အဟောင်။
19ဂျူးပုရောဟိတ်လန်လှီ့လား ကျမ်းဆလော်လှီ့နား ကိုယ်တော်နား အင်မ်လှီ့ အကြောင်း နီပုံဥပမာဝေါလ် အဟောင်နောက်ခေါမ် အာမ်စုတ်င်။ အင်မ်ခန်းနောလ် အင်မ်လှီ့နား ကိုယ်တော်ခေါမ် ချက်ချင်း မင်ဟိုင်အာမ်လီ။ အင်မ်ဘော်နားခါ ခေါင်ထုလှီ့အာမ်ကိခန်းနောလ် မင်ယော်ဟ။
အခွန်ပက်ခေါမ်
20အင်မ်ပါလ်နောလ် အင်မ်လှီ့နား ကိုယ်တော်ခေါမ် အကာဝေါလ်စောင်ဗာန် အမှော်အူဟှတ်ဟှတ်ဟောင်ဟနောလ်စိုင်းထေ့နား ရောမအုပ်ချုပ်တိလှီ့ကွတ်ဒုလ့်ကာလ် မင်ထေ့နား အပ်ခွတ်ဟိုင်တွက်ကာလ် ဖြောင့်မတ်ဟန်ဆောင်တိ သူလျှိုလှီ့ အာမ်တိ။ 21အင်မ်သူလျှိုလှီ့ ကိုယ်တော်စငေါလ် ဈာတ်ထေ့နား ကိုယ်တော်ဝေါလ် “ဆလော်ဝြား၊ နာင်နား နာဆောင်ခေါမ်လှီ့ မှန်ထေ့နား အူဟွင်းခါလိုက်ကော်ဝေါလ် ဖုလော်ရှင် လာမ်းစဉ်လှီ့ခါ အမှန်တိုင်း နာဆောင်ပက်ခေါမ် ကေးမီးနား ကာမ်စုတ်င်။ 22အင်မ်ပါလ်နောလ် အင်မ်လှီ့နား ရောမဆောင်ဖလောင်လန်နောလ် အခွန် ကာမ်ပက်ခေါမ် ပညတ်တရားဓေါလ် အညီယာ၊ ဆီးယနား ညီယော်ဝြာ” တိရို အာမ်လျှောက်။
23အင်မ်ဘော်နားခါ ကိုယ်တော်နား အင်မ်ခေါင်လှီ့ ပရိယာယ် အစုတ်င်ခန်းနောလ် 24အင်မ်ခေါင်လှီ့အောလ် “ဒေနာရီဒေါင်းဂို ဓေါင်နောလ်။ ဒေါင်းဂိုဝေါလ် ဟအူပုံလား ဟအူမိန် အပူလ်” တိရို အဟိ့။
အင်မ်ခေါင်လှီ့နား “ရောမဆောင်ဖလောင်လန် အမိန်လား အပုံ” တိရို အာမ်ဟောင်ဘွာလ်။
25အင်မ်ဟိုဝေါလ် ကိုယ်တော်နား “ရောမဆောင်ဖလောင်လန်ဓေါလ် ဆိုင်တိ ဆောင်ဖလောင်လန်နောလ် ပေးဘွတ်စူး။ ဖုလော်ရှင်ဓေါလ် သက်ဆိုင်တိလှီ့ခါ ဖုလော်ရှင်ငေါလ် ဆက်သဘွတ်စူး” တိရို အမိန့်။
26ဖြောင့်မတ်ဟန်ဆောင်တိလှီ့ သူလျှိုလှီ့နား ခေါင်လှီ့မော်ဝေါလ် အမှော်အူဟှတ်ဟှတ်ဟောင်ဟနောလ် အာမ်စိုင်းခွတ်ယခေါမ်အပြင် ကိုယ်တော် ဖြေခေါမ်လှီ့ စါစ်နိုးထေ့နား ဒပ့်ကာလ်အာမ်မယ်ကြလှာလ်။
ဘာလ့်နောက်ကာလ်ကိ ဆောက်င်ဟင်ဘွာလ်ခေါမ်အကြောင်း အာမ်ဟိ့ခေါမ်
(ရှင်မဿဲ ၂၂:၂၃-၃၃။ ရှင်မာကု ၁၂:၁၈-၂၇)
27အင်မ်ပါလ်နောလ် အင်မ်ဓိလ်နောလ် ခေါင်လှီ့ ဘာလ့်နောက်ကာလ်ကိဆောက်င်ဟင်လူးဘွာလ်ခေါမ် ယုံယတိ #20:27 ဇဒ္ဒုကဲနောက်ခေါမ် ဂျူးဘာသာအဖွဲ့စည်းဖွဲ့ဟှတ်မိန်ငေါလ်အထောလ်။ဇဒ္ဒုကဲတချို့လှီ့ ကိုယ်တော်ကာဝေါလ်ဈာတ်ထေ့နား 28“ဆလော်ဝြား၊ မောရှေပညတ်ကျမ်းရိုး ‘ပီဟာမယ်တိ ခေါင်ပွလ်ဟှတ် စိုးနောင်မယ်ကော် အဘာလ့်ဟိုဝေါလ် အနောင်မှေဆက်ခံဟိုင် ဒိပ်စောမယ်ဟိုင်ရိုး ဘာလ့်တိအသာနား အပီဟာခေါမ် အနောက်လောဒ့်’ တိရို အရော့ကယ်။ 29အင်မ်ဘော်နောက်ဟိုဝေါလ်စေး ဟမာလ် သာနောင်ခွာဆိ့အောလ် အလန်ဆုံးတိ အိမ်းထောင် အေဟိလ့်ထေ့နား၊ စိုးနောင်မယ်ကော် အဘာလ့်ဟိလ့်။ 30အင်မ်ပါလ်နောလ် အနှိနောက်အလန်ဆုံးတိနား အင်မ်မုတော လက်ထပ်နားခါ စိုးနောင်လောဒ့်အယ်ကော် အဘာလ့်ဘွာလ်တီး။ 31အင်မ်ပါလ်နောလ် အထုမ်နောက်ခေါင်ခါ အင်မ်ဘော်ယောင် အထောလ်ဘွာလ်တီး။ အင်မ်ဘော်တိုင်ငေါလ် အင်မ် သာနောင်ခွာလှီ့ မှလ်နူးဓေါလ် အိမ်းထောင်အေထေ့နား စိုးနောင်လောဒ့်ကော်ဝေါလ် အာမ်ဘာလ့်ကြ။ 32နောက်ဆုံးငေါလ်စေး အင်မ်မှာလ်နူးခါ အဘာ့လ်။ 33အင်မ်ဘော်နောက်ဟိုဝေါလ်စေး အင်မ်မုတောနောက်ခေါမ် သာနောင်ခွာဆိ့ဓေါလ် လက်အထပ်ဟိလ့်ခန်းနောလ် ဖုလော်ရှင်နား အင်မ်လှီ့ ဘာလ့်နောက်ကာလ်ကိဆောက်င်ဟင်လူးဘွာလ်ဟိုဝေါလ် အင်မ်မုတော ဟအူပီးဟာဝေါလ် အထောလ်နိုက်” တိရို ဇဒ္ဒုကဲလှီ့နား အာမ်ဟိ့။
34ကိုယ်တော်နား “နီဆုမ်သပ့်ခုံငေါလ်ကိ ခေါင်လှီ့စငေါလ် လက်ထပ်ခေါမ်၊ ပက်တယ်ခေါမ်လှီ့ အမယ်။ 35အင်မ်ဘော်နားခါ ဘာလ့်နောက်ကာလ်ကိဆောက်င်ဟင်ဘွာလ်ထေ့နား ဟြှားလုအောလ်မယ်ဟိုင် ထိုက်တန်တိလှီ့ လက်ထပ်ခေါမ်လှီ့၊ ပက်တယ်ခေါမ်လှီ့ မယ်တီးယဘော် 36အင်မ်လှီ့နောက်ခေါမ် အထာကွန်ဟှတ် အာမ်ဘာလ့်တိရိုခါ မယ်ခွတ်ယော်။ ဟိဘော်ဟိုင်ရိုးနောက်ဟိုဝေါလ်စေး အင်မ်လှီ့နောက်ခေါမ် ဘာလ့်ခွတ်ယတိ နောတ်ဒေဝါလှီ့ဓေါလ် အာမ်တူဝေ။ အင်မ်လှီ့နောက်ခေါမ် ဘာလ့်နောက်ကာလ်ကိအာမ်ဆောက်င်ဟင်ဘွာလ်တလှီ့အောလ် အာမ်ထောလ်ခန်းနောလ် ဖုလော်ရှင်နား အစိုးနောင်လှီ့အောလ်ခါ အာမ်ထောလ်။ 37မောရှေနားခါ မီးအူးတိ ခူမ်သူအကြောင်း အရော့နောက်အခန်းရိုး ဖုလော်ရှင်ခေါမ် ဟမာလ်ဘာလ့်ဟိလ့်ပါလ်တိ ‘အာဗြဟံနားဖုလော်၊ ဣဇက်နားဖုလော်၊ ယာကုပ်နား ဖုလော်’ တိရို အပုန်းဟို့နားအပုန်းဟို့ဟောင်ဝေထေ့နား ဘာလ့်တိလှီ့ အာမ်ဆောက်င်ဟင်လူးဘွာလ်ခေါမ် အကြောင်းအဖော်ပြဟိလ့်။ 38ဖုလော်ရှင်ခေါမ် ဘာလ့်တိလှီ့ ဖုလော်ရှင် ဆီးယော်။ ဆောက်င်ဟင်တိလှီ့ ဖုလော်ဝေါလ်ယောင် အထောလ်။ ဟိဘော်ဟိုင်ရိုးနောက်ဟိုဝေါလ်စေး အင်မ်လှီ့ကိမ်ကိမ်နောက်ခေါမ် ဖုလော်ရှင်ဓေါလ်ဟှတောလ် အာမ်ဆောက်င်ဟင်ခန်းနောလ်ထောလ်” တိရို အမိန့်။
39အင်မ်ဟိုဝေါလ် ကျမ်းဆလော်အချို့လှီ့နား “ဆလော်ဝြား။ နာင်အဖြေ အမှန်” တိရို အာမ်လျှောက်။ 40အင်မ်ပါလ်နောလ် အူနားခါ ကိုယ်တော်ဝေါလ် မေးခွန်းဟီးဝံ့တီးယော်ဟ။
မေရှိယနောက်ခေါမ်ဆောင်ဖလောင်ဒါဝိဒ်နားအစိုး
(ရှင်မဿဲ ၂၂:၄၁-၄၆။ ရှင်မာကု ၁၂:၃၅-၃၇)
41အင်မ်ပါလ်နောလ် ကိုယ်တော်နား အင်မ်ဓိလ်နောလ်မယ်တိ ခေါင်လှီ့အောလ် “မေရှိယခေါမ် ဆောင်ဖလောင် ဒါဝိဒ်နားအစိုး တိရို အာမ်ဟောင်။ အင်မ် နာင်မီးနား ဟိဘော် နာမ်ရောက်စုတ်င် တိရို အဟိ့။ 42ဆာလံကျမ်းရိုး ဆောင်ဖလောင်ဒါဝိဒ် ကိုယ်တိုင်နား ဟောင်ဟိလ့်ခေါမ်စေး
‘ဖုလော်ရှင်နား ကေး အရှင်ငေါလ်
43နာင်ဆုန်ပွီလှီ့ နာင်အုပ်ချုပ်မှုဒေါင်ငေါလ် ခိုက်ဟနောလ်
ကေးနား ကေစိုင်းဝေ့ ကေး ခစ်လာမ်းမာလ် မယ်ယား တိရို အဟောင်ဟိလ့်’ တိရို အမိန့်။
44အင်မ်ဘော်ဝေါလ် ဆောင်ဖလောင်ဒါဝိဒ်နား မေရှိယအောလ် ‘ကေးအရှင်’ တိရို အဟောင်ဟိလ့်ခန်းနောလ် မေရှိယခေါမ် ဆောင်ဖလောင်ဒါဝိဒ်စိုးဝေါလ် ဟိဘော်အထောလ်ခွတ်ကိုက်” တိရို အမိန့်။
ကျမ်းဆလော်လှီ့အောလ် သတိပက်ခေါမ်
(ရှင်မဿဲ ၂၃:၁-၃၆။ ရှင်မာကု ၁၂:၃၈-၄၀)
45ခေါင်ထုပရိတ်သတ်လှီနား အာမ်ငေးဟိုဝေါလ် ကိုယ်တော်နား အတပည့်လှီ့အောလ် 46“ကျမ်းဆလော်လှီ့ သတိတောဝေဘွတ်စူး။ အင်မ်ခေါင်လှီ့ အာမ်ဈာတ်ရောခ့်ဟိုဝေါလ် ဝတ်ရုံဆောင်းတိ ဝီဝေထေ့နား ဈာတ်ရော့လောဒ့်ခေါမ် အာမ်ကြိုက်။ ဈေးဒုလ့်ကာလ်ခါ ခေါင်လှီ့နား ရိုရိုသေသေအာမ်ဘစ့်တယ်ခေါမ် အာမ်လီ။ ဓမ္မာရုံငေါလ်ခါ အမော်ဆုံးငေါ ငွာလောဒ့်ခေါမ်အာမ်လီ။ အေပွဲအောတ့်ပွဲလှီ့အောလ်ခါ အပွန်နောက်ခုံငေါလ် ငွာလောဒ့်ခေါမ်အာမ်လီ။ 47မှလ်နူးလှီ့ ဥစ္စာပစ္စည်းလှီ့ မတရားသိမ်းထေ့နား ဆုအာမ်တောင်ဟိုဝေါလ်ခါ ဟန်ဆောင်ထေ့နား ဆောင်းပိုးနူးဝေါလ်ဆုအာမ်တောင်ထေ့။ ဖုလော်ရှင်နား နီခေါင်လှီ့အောလ် ပိုဝေနားပြင်းပြင်းထန်ထန် အပြစ်အပက်တိုက်” တိရို အဟောင်။
S'ha seleccionat:
ရှင်လုကာ 20: CSJ
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Chin Songlai (ဆောင်လိုင်) Bible by Beyond Translation is licensed under Creative Commons Attribution-ShareAlike 4.0 License.