Matiwu 8
8
Yesu Shilǝgǝbiya Ndǝr Pibi
(Markusu 1:40-45; Luka 5:12-16)
1Ta Yesu shida sara dar ma nyi, ba nji gangǝ nu nyi. 2Kǝ ndǝr pibi shili, ji sa ɓǝliya undi a dumwa nyi, ji na, “Thlagǝu, ma gu yiwu, gu sǝni mǝliya ɗa jamǝu.” 3Kǝ Yesu har tsi ka tsǝkwar nyi, ji na, “A hǝnggǝr yau. Ga ɗa jamǝu!” Ənggǝrna, ba pibiya nyi piyari nyi. 4Kǝ Yesu na anǝ nyi, “Ga hangǝkal ga sara na sǝ kǝ anǝ ndǝ mai. Ama ga maˈyi a ndǝgya pubu ga nda canǝ nyi kǝrngau, ga dzǝgwa kǝbǝna sau ǝnggǝra dlaɗǝ Musa nana nja mǝl aga ci dzau. Ga mǝliya abangǝ aga ga cabiya nyi anǝ nji abǝr a ɗar gǝ jamǝu.”
Mbǝrsa Nǝ Midala Soja Nǝ Roma
5Ənggǝra Yesu vwu Kafarnahumu, kǝ vanyi midala soja shili ǝgya ja, ju kǝdi dlǝwa dzǝ ara ja. 6Ji na, “Thlagǝu, ndǝr mǝl thlǝr anǝ ɗa a yi pida nga ja a ndu ki, naja sǝni shabiya dzǝ mai, ɓwaɓwatǝ nga ja gwa gagaɗau.”
7Kǝ Yesu na anǝ nyi, “Yu maˈyi, aga ya nda shilǝgǝbiya nyi.”
8Kǝ midala soja shaɗǝwa, ji na, “Thlagǝu, nayi ɗa tsaˈa aga ga shili wu ki ɗa mai, ama ga nana ndǝr wacu, ba ndǝr mǝl thlǝr anǝ ɗa kǝ a ɗa jamǝu. 9Ariya nayi ǝnga kǝrɗa ma ǝgya ndǝ dǝnama tǝlkur nga yau, ǝnga tsu sojaˈyar aˈyi kǝra ǝgya kiɗa yau. Yu na anǝ ndǝ kau, ‘Maˈyi,’ ba ja maˈyi, anǝ vanyi ndǝ tsu, yu na ‘Shili,’ ba ja shili. Ma yi na anǝ mafa ɗa, ‘Mǝliya abangau,’ ba ja mǝliya.”
10Ənggǝra Yesu nggar ndǝr kau, ba ɗa sǝ dǝdǝgur anǝ nyi, ji shabiya dzau, ba ji na anǝ nji kǝra a vǝr nu nyi, “Ənga jiri yu nar hyi, wu Izirayila nayi saya uya ndǝra ǝnga mbǝrsa ǝnga dǝnama ǝnggǝr ndǝ kǝ mai. 11Yu na anǝ hyi, abǝr gangǝ njir mbǝrsa wu nda shili sara wu shidar pǝci ǝnga shidar fwahǝu ndu sa nggya ndu sǝm sǝr sǝm nǝ caguli ǝnga Ibrahimu ǝnga Ishaku ba Yakubu wu tǝlkur Hyal.
12Ama nju sa vakuwa a gwu kuthlǝ nǝ kyakyaru njira a kyau nda ɗa nji Hyal, ama ba ndǝ nggǝl. A ndǝna ndu nda tiwi ǝnga ndu ɗǝ hira nda ari.” 13Kǝ Yesu na anǝ midala soja, “Maˈyi, wu ɗa anǝ ngau, kakalǝ ǝnggǝra gǝ mbǝrsa.” Ənggǝrna, kǝ ndǝr mǝl thlǝr nyi ta ɗa jamǝu.
Yesu Shilǝgǝbiya Mǝya Mala Biturusu
(Markusu 1:29-31; Luka 4:38-39)
14Ənggǝra Yesu vwu ki Biturusu, kǝ ji thlǝwa mǝya mala Biturusu gǝvǝ a yi pida, gyangǝ a vǝr tǝ nyi. 15Kǝ ji tsǝkwari pǝla ja, kǝ gyanga nyi piyari nyi ba ji hyaˈari ji nǝ nda sǝr sǝm.
Yesu Shilǝgǝbiya Nji Gangǝu
(Markusu 1:32-34; Luka 4:40-41)
16Ta wagǝ ɗa, nji gangǝ njira ǝnga mambǝl ɗǝmwaˈyi wu dza nda nji shili ǝnga nda anǝ Yesu, kǝ ji kǝdlǝbiya mambǝla nyi ˈyar ǝnga ndǝr nyi. Abangǝ tsu kǝ ji shilǝgǝbiya patǝr njira gǝra ngga. 17Ji mǝl abangau, aga nyabiya sǝra nabi Əshaya nana, abǝr, “Ji hǝri sǝra wu tǝ mǝn ǝnga ji faˈari shilǝgǝr mǝn.”
Dzaukura Nu Yesu
(Luka 9:57-62)
18Ta Yesu lari dlamir nji gangǝ zǝwar nyi, kǝ ji sǝwa nja tǝrabiya ǝnga ja a biyar ya dǝl. 19Kǝ vanyi malǝmǝ dlaɗǝ shili, ji sa nar nyi, “Malǝmǝ, yu nu ngau, kalar vira gu maˈyi a ndari.”
20Kǝ Yesu shaɗǝwa nyi, ji na, “Thlahu ǝnga kaˈu nga nda, ˈyagǝˈyar tsu kir nda aˈyi, ama Zǝr Ndau, vira ja fiya kǝra ja ari aˈyi mai.”
21Vanyi zǝmbǝlma na anǝ nyi, “Thlagǝu, taˈyi ya maˈyi ya nda haɗǝna dǝɗa kwatahǝu.”
22Ama Yesu na anǝ nyi, “Nu ɗa, piyari nji tǝtǝ nda haɗǝna nji tǝtǝr nda.”
Yesu Kughiya Majigwalǝu
(Markusu 4:35-41; Luka 8:22-25)
23Ənggǝra ji gwu kwambwal, kǝ zǝmbǝlma nyi ˈyar nu nyi. 24Fǝɗǝngǝkǝr nda, kǝ majigwalǝ ǝnga dǝnama shili ar dǝla nyi, ji sa kǝnggǝɗǝr ˈyimiya nyi, kǝl ta dlǝgwam ˈyimiya nyi gwu kwambwala nyi. Ama Yesu nǝnyi wu ghanyi nga ja. 25Kǝ ndǝ hyaˈari ndǝ nda hyaˈana nyi, ndu na anǝ nyi, “Thlagǝu, kǝtiya mǝn, kǝja mǝnu sa!”
26Ji shaɗǝwa, “Nahyi njira ǝnga mbǝrsa tǝtǝwa, ara mi nga hyu hivǝra?” Kǝ ji hyaˈari ji kughiya majigwala nyi daɓǝ ǝnga kǝnggǝɗǝr dǝla nyi, kǝ patǝkura vi bǝgǝ zǝmǝu.
27Ba sǝ kǝ ɗa sǝ dǝdǝgur anǝ nji kau, ndǝ yiwa, “Wa thlǝmǝ culi naja ka nda? Patǝ ǝkkǝˈyi majigwalǝu ǝnga dǝl wu ɓǝlar ndǝr nyi!”
Yesu Shilǝgǝbiya Nji Mǝthlǝu Kǝra Ənga Mambǝl Ɗǝmwaˈyu
(Markusu 5:1-20; Luka 8:26-39)
28Ənggǝra ji shili a biyar ya dǝl nǝ ˈyiˈyir Gadarasanu, kǝ nji mǝthlǝ ǝnga mambǝl ɗǝmwaˈyi shili sara wu hulili ndǝ sa thlǝwa nyi. Ariya sǝr mǝla nda, ndǝ ɗa sǝra nju hivǝr gagaɗau, ka ɗa ma tsu ndǝr sǝni nu lagu ta aˈyi mai. 29Ənggǝrna, kǝ nji kǝ gwu wau, ndu na, “Mi ngǝ dzawu ngau ǝnga ˈya, nagǝ Zǝr Hyala? Əndǝga gǝ shili aga ga sa nǝ ˈya ɓwaɓwatǝ tsu pǝcir ˈya gǝra ɗa ya?”
30Lǝhǝ a dzǝr vi ta, fǝgǝ gadu aˈyi gangǝu kǝra a vǝr ɓǝla ar dza mau. 31Mambǝl ɗǝmwaˈyi ˈyar kǝ kǝdi Yesu, “Amaya, ma gu kǝdlǝ ˈya a biya, sǝwa ˈya a ndu fǝgǝ gadu kau.”
32Kǝ ji na anǝ nda, “Yau, maˈya mau.” Kǝ ndǝ biya, kǝ ndǝ gwu gaduwa nyi, kǝ fǝgǝ gaduwa nyi patǝ aga zǝmǝ ndǝ hwi a gya, kǝ ndǝ pǝpau a gwar dǝl, ba ndǝ kuɗǝ ar ˈyimiya nyi. 33Njir ɓǝla fǝgǝ gaduwa nyi hwinakǝr. Ta ndǝ vwu huɗa mǝlmau, ba ndǝ vwa nar nyi anǝ nji sǝra ɗa patǝu ǝnga sǝra ɗa ǝnga njira ǝnga mambǝl ɗǝmwaˈyi kau. 34Kǝ patǝkura njir mǝlmǝ biya aga nda ɓǝ ǝnga Yesu. Ta ndǝ lari nyi, kǝ ndǝ kǝdi nyi aga ja piyari nda ˈyiˈyir nda.
©2024 Initiative for the Translation and Development of African Languages and Margi Tiwi Nga Təm