Matiwu 7
7
A Sara Hya Thla Numa Ar Kǝra Nji Mai
(Luka 6:37-38,41-42)
1“A sara hya thla numa ar kǝra nji mai, aga tsu nju nda thla numa ar kǝra hyi mai. 2Ariya culi thla numa kǝra hyi mǝl anǝ nji, ca nga nju nda thla numa ǝni anǝ hyi. Cala tǝkǝ sǝ kǝra hyi tǝkǝ sǝ ǝni anǝ nji, ca nga nju nda tǝkǝ sǝ ǝni anǝ hyi.
3“Ara mi nga gu lari zǝr sar kǝra wu liya zamǝ ngau, ama naga sǝni tsamiya gwalang kǝra ar liya gǝ kǝ mai ya? 4Əndǝga, abari nga ga sǝni na anǝ zamǝ ngau, abǝr, ‘Taˈyau, ya hǝbiya ngǝ zǝr sar kǝra wu liya gau,’ ya, kǝja gwalang ngǝ ar liya ga? 5Nagǝ ndǝr kwaɗashima, ga hǝbiya gwalang kǝra wu liya gǝ kwatahǝu, aga ga daɓaga lari mǝnahǝu, ba ga sǝni hǝbiya zǝr sar kǝra wu liya zamǝ ngǝ kau.
6“A sara hya nǝ nyi anǝ hya sǝra cici mai, ara hya wu shabiya dzǝ ba ja uya hyi ǝnga mbǝlgǝu. Ənga a sara hya vakar nyi anǝ gadu tsǝka nǝ gǝnna gangǝ mai, ca ngǝ tsǝka wilwilu, ara gadu wu nda cicina nda.
Hya Kǝdiyau, Hya Gal Ənga Hya Tsatsari
(Luka 11:9-13)
7“Hya dumwa ǝnga kǝdiyau, nju nǝ hyi. Hya dumwa ǝnga gal, hyu uya. Hya dumwa ǝnga tsatsa tsu, nju pahǝna hyi. 8Ara kalar ndǝra kǝdiyau, nju nǝ nyi, kalar ndǝra gal, ju uya, ndǝra tsa umbwa tsu, nju pahǝna nyi.
9“Wa ngǝ wu pama hyi, ma zǝr nyi kǝdi macikǝl, ba ja nǝ nyi tsǝka? 10Əndǝga ma zǝr nyi kǝdi kalfi, ba ja nǝ nyi pabǝ ya? 11Ma nahyi, nji ɗǝɗǝmwaˈyi wu sǝni nǝ nyi anǝ wazhar hyi sǝ mǝmǝnahǝu, abari ngǝ Dǝrhyi kǝra a dǝmǝlma? Ju sa nǝ nyi sǝ mǝmǝnahǝ anǝ njira wu kǝdi sǝ ara ja, a ndiya nǝ dǝrhyi. 12Kalar sǝra hyu yiwu nja mǝl anǝ hyi, nahyi tsu ca nga hya mǝl anǝ nda, ariya kǝ ca ngǝ sǝra highiɓǝ nǝ dlaɗau ǝnga nabiˈyar aga nyi.
Miyar Gwa Ki Kǝra Ciciɗǝu Ənga Balangǝu
(Luka 13:24)
13“Hya gwu ki lagur miyar gwa kǝra ciciɗǝu, ariya miyar gwa ndar vir sa balangǝ nga ja, ǝnga lagur ndar tsu ɓatsǝ nga nyi, njir gwu miyar gwa nyi tsu, gangǝ nga nda. 14Ama miyar gwa nǝ uya pi, ciciɗǝ nga nyi, ǝnga lagur gwu gwa tsu dzadzau nga nyi. Njira uya gwa aˈyi nda gangǝ mai.
A Sǝni Tsamǝr Nji Wu Ar Yaya Nyi
(Luka 6:43-44)
15“Hya hangǝkal ǝnga nabi fatiˈyar, kǝra a vǝr shili ǝgya hyi a papa tǝmahǝu, ama jirkura nyi ufwar vwa nga nda. 16Hyu nda sǝnibiya nda lagur sǝr mǝla nda. A sǝni uya nji yayar wur inabi sara ar wur shikǝɗi ya? Əndǝga a sǝni uya nji yayar kanda sara ar wur shikǝɗi ya?
17Abangǝ tsu, kalar wu mǝnahǝu, ju ya wazha mǝnahǝu. Wu kǝra gǝra mǝnahǝ tsu, ju ya wazha kǝra gǝra mǝnahǝu. 18Wu kǝra mǝnahǝu, a sǝni yabiya wazha kǝra gǝra mǝnahǝ mai, abangǝ tsu, wu kǝra gǝra mǝnahǝu, a sǝni yabiya wazha mǝnahǝ mai. 19Kalar wu kǝra gǝra sǝni yabiya wazha mǝnahǝu, ba nja gǝmna nyi ba nja vakuwa nyi a gwu uˈu. 20Agabangau, hyu nda sǝnibiya nda lagur sǝr mǝla nda.
Nayi Saya Sǝni Hyi Mai
(Luka 13:25-27)
21“Aˈyi kalar ndǝra wu na anǝ ɗa, ‘Thlagǝu, Thlagǝu,’ ngǝ wu nda gwu tǝlkur Hyal mai, ama kǝl ndǝra mǝl yiwu huɗa Dǝɗa kǝra a dǝmǝlmau. 22Ar pǝci ta, nji gangǝ wu nda na anǝ ɗa, ‘Thlagǝu, Thlagǝu! Naˈya aˈyi tǝtǝlna ndǝr Hyal wu thlǝmǝ ngǝ wa? Aˈyi ˈyi kǝdlǝbiya mambǝl ɗǝmwaˈyi wu thlǝmǝ ngǝ wa? Ənga aˈyi ˈyi mǝlna sǝ dǝdǝgurˈyar gangǝ wu thlǝmǝ ngǝ wa?’ 23Ama yu nda shaɗǝwa nda, ‘Nayi saya sǝni hyi mai. Hya tǝkǝ ǝnga yau, nahyi njir mǝl ɗǝmwaˈyikur!’
Njir Hǝr Mǝthlǝu
(Luka 6:47-49)
24“Agabangau, kalar ndǝra nggari ndǝr ɗa kau, ba ji mǝl thlǝr ǝni, ja nda ɗa ǝnggǝr ndǝ hahangǝ ndǝra hǝriya ki nyi ar pathlara mau. 25Ənggǝra par tǝɗau, dlǝlǝmǝ nyau, yambaɗǝ sau, ba ji tsaɓǝr ki kau, ama naji dla mai, ara nji hǝriya nyi ar vi mǝmau. 26Kalar ndǝra nggari ndǝr ɗa kǝ tsu ba ji nggǝl ara mǝl thlǝr ǝni, ju nda ɗa ǝnggǝr ndǝ dza kǝra hǝriya ki nyi ar vi mǝshiˈwa. 27Ənggǝra par tǝɗau, dlǝlǝmǝ nyau, yambaɗǝ shili ka sa tsar ki kau, ba kiya nyi dla, dla nyi ma, dla didiɗi.”
28Ənggǝra Yesu kuɗǝna nana sǝˈyar kau, ba highiɓǝ nyi kǝ ɗa sǝ dǝdǝgur anǝ dlamir nji. 29Ara ji highiɓǝ anǝ nda ǝnga dǝnama tǝlkur, aˈyi ǝnggǝr nǝ malǝmǝ dlaɗǝr nda ˈyar mai.
©2024 Initiative for the Translation and Development of African Languages and Margi Tiwi Nga Təm