Matiwu 9
9
Yesu Shilǝgǝbiya Ndǝ Tǝsǝkǝnǝu
(Markusu 2:1-12; Luka 5:17-26)
1Kǝ Yesu gwu kwambwal, kǝ ji tǝrabiya a biyar ya dǝl, ba ji maˈyi a ndu mǝlmǝ gǝ nda. 2Kǝ nji hǝr nyi vanyi ndǝ tǝsǝkǝnǝu a shili a yi pida ar caɗǝu. Ənggǝra Yesu lari mbǝrsar nda, kǝ ji na anǝ ndǝ tǝsǝkǝnǝ kau, “A sara ga tal mai, zǝr ɗa, a tǝfǝbiya ngǝr yi bikǝ ngau.” 3Ənggǝra njir sǝni dlaɗǝ nggar abangau, kǝ ndǝ na anǝ kǝrnda, “Ndǝ kau, ju diɗa thlǝmǝr Hyal!”
4Ariya Yesu wu sǝni sǝra nda vǝr ɗǝnga, kǝ ji na anǝ nda, “Ara mi nga hyu ɗǝnga ɗǝmwaˈyi wu ɗǝfuwa hyi abanga? 5Mani ngǝ a ndiya ǝnga ɓatsa? ‘Nja na a tǝfǝbiya ngǝr nji bikǝ ngau,’ ǝndǝga, ‘Hyaˈari ga ɓǝ’ ya? 6Ama yu yiwu hya sǝni, abǝr Zǝr Ndǝ aˈyi ja ǝnga dǝnama tǝlkur nǝ tǝfǝbiya bikǝ wu duniya.” Agabangau, kǝ ji na anǝ ndǝr tǝsǝkǝnǝu kau, “Hyaˈari, ga hǝri caɗǝ ngau, ba ga maˈyi a ndu ki.”
7Ba nda nyi hyaˈari tsu, ba ji maˈyi a ndu ki nyi. 8Ta dlamir nji lari abangau, kǝ hivǝr mbari nda, kǝ ndǝ fal Hyal kǝra lǝri culi naja ka dǝnama tǝlkur anǝ nji.
Yesu Ngga Matiwu
(Markusu 2:13-17; Luka 5:27-32)
9Ənggǝra Yesu dumwa ǝnga ɓau, kǝ ji lari vanyi ndǝ kǝra nju ngga ǝnga Matiwu, ja vǝr nggya ar vir dlǝwu budau. Kǝ Yesu na anǝ nyi, “Nu ɗa.” Kǝ ji hyaˈari ba ji nu nyi.
10Ənggǝra Yesu a vǝr sǝm sǝr sǝm wu ki Matiwu, kǝ njir dlǝwu budǝ gangǝu ǝnga njir bikǝ gangǝu shili ndǝ sa sǝm sǝr sǝm ǝnga ja ba ǝnga zǝmbǝlma nyi ˈyar. 11Ənggǝra njir Farisi lari sǝ kau, ba ndǝ yiwa miya zǝmbǝlma nyi ˈyar, “Ara mi ngǝ malǝmǝr hyu sǝm sau ǝnga njir dlǝwu budau ba ǝnga njir bikǝ ka?”
12Ənggǝra Yesu nggari sǝ kau, kǝ ji na, “Nji jamǝ wu gal ligǝta mai, kǝl njira gǝra ngga. 13Ama maˈya mau hya nda ɗǝnga tara mi ngǝ ndǝr kǝ a gǝri, ‘Tǝhuɗǝ nga ya yiwu, aˈyi saɗaka mai.’ Ara nayi shili aga sa ngga nji tsapǝ mai, ama aga sa ngga njir bikau.”
Yiwa Sau Ar Kǝra Hǝ Zǝmǝtsini
(Markusu 2:18-22; Luka 5:33-39)
14Kǝ zǝmbǝlma Yahwana ˈyar shili ara Yesu, ndǝ sa yiwa nyi, “Amaya, mi ngǝ ɗa naˈya ǝnga njir Farisi wu hǝ zǝmǝtsini, ama nǝ ngau, nandu hǝ mai ya?”
15Kǝ Yesu shaɗǝwa nda, ji na, “Bazhiya salkwanjili ndǝ wu nggya ǝnga huɗǝ kyakyaru ma tsu salkwanjili aˈyi ǝnga nda ya? Pǝci wu nda shili kǝra nji wu sa hǝna salkwanjili ara nda. Wu pǝci ta nga ndu hǝ zǝmǝtsini.
16“Ndǝr ndǝɓǝ zhaɓi hahal ǝnga mafǝliyangǝ aˈyi mai. Ma ji mǝl abangau, ba mafǝliyangǝ nga nyi a tana hahala nyi, ta nyi a dzǝgwa ndiya nǝ ɗǝɗǝmǝ ǝnga ɗǝmwaˈyu. 17Ndǝr pǝ ˈyimi inabi mafǝliyangǝ a gwu pǝla hahal aˈyi mai. Ma nji puwa, ba pǝla ka pǝthlau, ˈyimi inabi kǝra gwa tsu wu pǝnakǝr, pǝla nyi tsu wu ndzǝnakǝr. ˈYimi inabi mafǝliyangǝ nja puwa a gwu pǝla mafǝliyangǝ. Agabangau, nji wu nda tsǝripǝri nda gyapǝu.”
Kwar Yariyusu Ənga Mala Ndzǝndzǝ Mashi
(Markusu 5:21-43; Luka 8:40-56)
18Ənggǝra Yesu a vǝr na sǝˈyar kau, kǝ ndǝr tǝɗǝmwa nǝ umbwa daɓǝ dzǝ nǝ njir Yahudiya shili, kǝ ji sa ɓǝliya undi a dumwa nyi, kǝ ji na, “Kajangǝkau, kwa ɗa a tǝri. Ama shili ga sa fǝr tsi ar ja, ba ja mbǝɗau.”
19Kǝ Yesu hyaˈari ǝnga zǝmbǝlma nyi ˈyar, ba ndǝ nu nyi.
20Kǝ vanyi mala kǝra mǝliya fa kumo apǝ mǝthlǝ a vǝr pǝpǝ mashi, shili lagu ya ja, kǝ ji sa tsǝkwari miya cira lǝgutǝ nyi. 21Ariya ja vǝr na wu ɗǝfuwa ja, “Ma yi sǝni tsǝkwar alaga miya cira lǝgutǝ nyi, yu ɗa jamǝu.”
22Ənggǝra Yesu shabiya dzau, ba ji lari nyi, kǝ ji na, “A sara ga tal kwa ɗa mai. Mbǝrsa ngau, a mǝliya ngǝr jamǝu.” Ənggǝrna, ba ji ɗa jamǝu.
23Ta Yesu shili wu ki ndǝr tǝɗǝmwa nǝ umbwa daɓǝ dzǝ nǝ njir Yahudiya, kǝ ji lari njir mbiɗǝ mbǝlau ǝnga nji tǝzǝwuɗǝwuɗǝu. 24Kǝ ji na, “Kwaya mau ǝnggau! Kwa kǝ tǝ mai, wu ghanyi nga ja.” Kǝ ndǝ nggushina nyi nggushi nǝ diɗa. 25Ama ǝnggǝra ji kǝdlǝbiya nda a biya, kǝ ji gwa ji gwa mbar tsa kwa nyi, kǝ ji hyaˈari aˈyi nggya. 26Ndǝr kǝ tǝtǝlna dzǝ wu ˈyiˈya nyi patǝu.
Yesu Shilǝgǝbiya Nji Lǝfau Ənga Ndǝ Mǝga
27Ənggǝra Yesu a vǝr piyari vi ta, kǝ nji lǝfǝ mǝthlǝ ndu nu nyi, ndu ngga ǝnga dǝnama, “Tǝhuɗǝ ǝgya ˈya, Zǝr Dawuda!”
28Ənggǝra Yesu vwu vanyi ki, kǝ lǝfa nyi ˈyar shili ǝgya ja, kǝ ji yiwa nda, “A mbǝrsar hyi abǝr yu sǝni shilǝgǝbiya hyi ya?” Ndǝ shaɗǝwa, “Angǝ, Thlagǝu.”
29Ənggau kǝ ji tsǝkwar liya nda, ji na, “Bǝgǝ ja ɗa anǝ hyi ǝnggǝra hyi mbǝrsa.” 30Kǝ liya nda pahau. Ənggǝ tsu, kǝ Yesu tǝɗar himiya nda, ji na, “A sara hya na sǝ kǝ anǝ nji mai.”
31Ama ndǝ biya ndǝ tǝtǝlna ndǝra nyi ar kǝra ja baˈamani wu ˈyiˈya nyi.
32Ənggǝra nda vǝr maˈyi a biya, kǝ nji shili anǝ Yesu ǝnga vanyi ndǝra mambǝl ɗǝmwaˈyi kar nyi ara ndǝr. 33Ənggǝra ji kǝdlǝbiya mambǝl ɗǝmwaˈya nyi a biya, ba ndǝ mǝga nyi mbar ndǝr. Kǝ sǝ kǝ ɗa sǝ dǝdǝgur anǝ daɓǝr dlami, ndǝ na, “Sǝ aˈyi ǝnggǝr kǝ saya ɗa wu Izirayila nji lar mai.”
34Ama njir Farisi nǝr nda, ndǝ na, “Ənga dǝnama tǝlkur nǝ Shatan nga ju kǝdlǝ wazha Shatan kau.”
Yesu Tǝhuɗǝu Əgya Nji
35Ənggau, Yesu ɓǝbiya ɓau wu patǝr mǝlmǝ dǝdǝgalǝu ǝnga mǝlmǝ kukushu, ja vǝr highiɓǝ wu umbwa daɓǝ dzǝˈyar nǝ njir Yahudiya, ja vǝr tǝtǝlna ndǝshigu ar kǝra tǝlkur Hyal. Ba ǝnga ja vǝr shilǝgǝbiya kalar shilǝgǝu ǝnga njira gǝra ngga. 36Ta ji lari nji gangǝ daɓau, kǝ ji tǝhuɗǝ ǝgya nda, ara nda vǝr lari ɓwaɓwatǝu, ba tsu dlǝwa dzǝ aˈyi mai, ǝnggǝr tǝmahǝ kǝra gǝra ǝnga ndǝr ɓǝla. 37Kǝ ji na anǝ zǝmbǝlma nyi ˈyar, “Sǝr faˈa a su ki gangǝ nga nda, ama njir mǝl thlǝr kushu nga nda. 38Agabangau, hya kǝdi thlagǝr fa, ja sǝwa njir mǝl thlǝr aga nda sa faˈa sǝ a su ki.”
©2024 Initiative for the Translation and Development of African Languages and Margi Tiwi Nga Təm