Matiwu 6
6
Lau Anǝ Ndǝr Gha
1“Hya hangǝkal ara mǝl ‘thlǝrǝr hyi nǝ tsapǝkur,’ ja sara ɗa sǝra nja lari ǝnga li wacu. Ara ma hyi mǝl abangau, nahyu nda uya akkǝri ara Dǝrhyi kǝra a dǝmǝlmǝ mai.
2“Agabangau, ma gu lǝ sǝ anǝ ndǝr gha, a sara ga hǝˈuna mai, ǝnggǝra njir kwaɗashima wu mǝl wu umbwa daɓǝ dzǝˈyar nǝ njir Yahudiya ǝnga ar laguˈyar, aga nja faliya nda. Ənga jiri nga yu na anǝ hyi, a uyar nda akkǝrir nda cipǝu. 3Ama ma gu lǝ sau, a sara ga piyari pǝla gǝ nǝ matsal ja sǝnibiya sǝra pǝla gǝ nǝ mazǝm a vǝr mǝl mai, 4aga lǝ sǝ ngau ja ɗa ar ɗǝɗǝwa. Ba Dǝngǝ tsu, kǝra wu lari kalar sǝra nju mǝl ɗǝɗǝwa patǝu, ba ja sa nǝ ngǝ akkǝri.”
Highiɓau Ar Kǝra Kǝdi Hyal
(Luka 11:2-4)
5“Ənga tsu, ma hyu kǝdi Hyal, a sara hya ɗa ǝnggǝr njir kwaɗashima mai, njira wu yiwu kǝdi Hyal aˈyi taˈyi wu umbwa daɓǝ dzǝˈyar nǝ njir Yahudiya ǝnga ar laguˈyar aga nja daɓaga lar nda. Ənga jiri nga yu na anǝ hyi, a uyar nda akkǝrir nda cipǝu. 6Ama ma hyu kǝdi Hyal, hya maˈyi a gwu umbwa hya gwa haɗiya miya nyi, ba hya dzǝgwa kǝdi Dǝrhyi, ndǝra nji gǝra lari. Ba Dǝrhyi, kǝra wu lari sǝra nja mǝl ɗǝɗǝwa, wu nda nǝ hyi akkǝri.
7Ma hyu kǝdi Hyal, a sara hya ndǝr gangǝ ǝnggǝr njira gǝra sǝni Hyal mai, njira wu nggani abǝr ndǝr gangǝ ca ngǝ Hyal wu nggari. 8A sara hya ɗa ǝnggǝr nanda mai, ara Dǝrhyi sǝni sǝra hyu ghari divira hya dzǝgwa kǝdi nyi.
9“Kǝja, ǝnggǝra hya kǝdi Hyal,
“ ‘Dǝrˈya kǝra a dǝmǝlmau,
thlǝmǝ ngǝ ja nggya cicau,
10tǝlkur ngǝ ja shili,
yiwur huɗa gǝ ja ɗa
wu duniya ǝnggǝr kǝra nja vǝr mǝl a dǝmǝlmau.
11Ɗar ˈya sǝr sǝm nǝ ǝshina.
12Tǝfǝbiya ˈya bikǝr ˈya,
ǝnggǝr kǝra ˈyi tǝfǝbiya
njira mǝliya ˈya bikau.
13A sara ga hǝr ˈya
a ndar vir dzǝ mai,
ama ga kǝtiya ˈya
ara Shatan.
Ara tǝlkur, ǝnga
dǝnama, ǝnga kadakadarkur,
nǝ ngǝ ngau baˈanuwa. Amina.’
14“Ara ma hyi tǝfǝbiya njira mǝliya hyi bikau, Dǝrhyi kǝra a dǝmǝlmǝ tsu wu sa tǝfǝbiya hyi. 15Ama ma nahyi aˈyi tǝfǝbiya njira mǝliya hyi bikǝ mai, abangǝ tsu, Dǝrhyi kǝra a dǝmǝlmǝ wu nda tǝfǝbiya hyi bikǝr hyi mai.”
Highiɓau Ar Kǝra Hǝ Zǝmǝtsini
16“Ma hyu hǝ zǝmǝtsini a sara hya hashi bama hyi ǝnggǝr kǝra njir kwaɗashima wu mǝl kǝ mai, ara ndu hashi bama nda aga ca anǝ nji abǝr wu hǝ zǝmǝtsini nga nda. Ənga jiri ya nar hyi, a uyar nda akkǝrir nda cipǝu. 17Ama ma gu hǝ zǝmǝtsini, ga cina bama gau, ǝnga ga ɓǝsǝya mal, 18ara nja sara sǝni abǝr ga vǝr hǝ zǝmǝtsini. Dǝngǝ kǝra nji gǝra lari, ndǝra tsu wu lari sǝra nju mǝl ɗǝɗǝwa wu nda nǝ ngǝ akkǝri.
Highiɓau Ar Kǝra Fǝ Gǝnna A Dǝmǝlmau
(Luka 12:33-34)
19“A sara hya tsǝm gǝnna anǝ kǝrhyi wu duniya mai, vira kǝthla ǝnga vuyavuya wu sǝni ndzana, vira tsu njir hǝl wu sǝni pǝthlǝna ba nda vwa faˈari. 20Ama hya tsǝmiya anǝ kǝrhyi gǝnnar hyi a dǝmǝlmau, vira kǝthla ǝnga vuyavuya a sǝni ndzana mai, vira tsu njir hǝl wu sǝni pǝthlǝna nda vwa faˈari mai. 21Ariya vira gǝnna ngǝ ari, ǝna ngǝ ɗǝfuwa gǝ tsu.
Pitǝlla Nǝ Dzau
(Luka 11:34-36)
22“Li ca ngǝ mbǝmbǝl nǝ dzau. Ma liya gǝ mǝnahǝu, dza gǝ patǝ wu nyabiya dzǝ ǝnga mbǝmbǝl. 23Ama ma liya gǝ aˈyi jamǝ mai, patǝkura dza gǝ wu tini mbǝmbǝlkur. Ma mbǝmbǝlǝr dza gǝ wu kuthlǝ nga nyi, kadzangǝ abar ngǝ kyakyarkura kuthlǝ ka!
24“Ndǝr sǝni mǝl thlǝr ǝgya kiɗa tarki mǝthlǝ aˈyi mai, ara ju nda yiwu vanyi ba ja piyari vanyi, ǝnga ju nda hǝya kǝr anǝ vanyi ba ja diɗana vanyi. Nahya sǝni daɓǝri nu Hyal ǝnga gal gǝnna mai.
A Sara Ga Ɓwanǝ Nyi Kǝr Anǝ Kǝrngǝ Mai
(Luka 12:22-31)
25“Agabangau, yu na anǝ hyi, a sara hya ɓwanǝ nyi kǝr anǝ kǝrhyi ariya nggyabiyar hyi ǝnga sǝra hyu sǝm ǝnga sǝra hyu sa mai, alaga ar kǝra kar dza hyi tsu mai. Ariya piya ndau, aˈyi a ndiya sǝr sǝm wa? Ənga dza ndǝ aˈyi a ndiya sǝr ha wa? 26Tsama mǝ ˈyagǝˈyar gǝyi, nandu thlǝka mai ǝnga nandu gǝm mai ǝnga tsu nandu pǝ sǝ wu val mai. Alaga abangau, Dǝrhyi kǝra a dǝmǝlmǝ ngǝ a vǝr sǝmǝna nda. Ya, aˈyi hyu ndiya nda ǝnga dudurkur wa? 27Wa ngǝ wu pama hyi ara ɓwanǝ kǝr nyi, ba ja sǝni cakǝri saka pathlǝu a dar kǝra piya ja?
28“Ətsu mi ngǝ ɗa hyu ɓwanǝ kǝr anǝ kǝrhyi ar kǝra sǝr ha? Tsama mǝ jigwal wu gǝyi, ǝnggǝra ndu hau. Nandu mǝl thlǝr alaga shi paˈwa mai. 29Agabangau, yu nar hyi, alaga tǝl Solomanu wu patǝr kadakadarkur nyi aˈyi saya har kari ǝnggǝr nǝr nda mai. 30Ma abangǝ ngǝ Hyal wu har nyi kar anǝ jigwal wu a gwar tagǝu, kǝra aˈyi nda ǝshina ama ǝzǝgǝu a fuwar nji a gwu uˈu, aˈyi ju nda har hyi kar a ndiya nda wa? Nahyi njira ǝnga mbǝrsa tǝtǝwa.
31Agabangau, hya sara ɓwanǝ kǝr anǝ kǝrhyi, hyu na, ‘Mi nga ˈyu nda sǝma?’ Əndǝga ‘Mi nga ˈyu nda sa?’ Alaga ‘Mi nga ˈyu nda ha?’ 32Ariya nji gǝra sǝni Hyal ngǝ wu gal sǝˈyar kau. Dǝrhyi kǝra a dǝmǝlmau, wu sǝni abǝr a ɗar tsaˈa hya uya sǝˈyar kau. 33Ama sǝ tanggǝrma, ca ngǝ hya gal tǝlkur Hyal ǝnga tsapǝkur nyi ba ja nǝ hyi sǝˈyar kǝ patǝ tsu. 34Agabangau, hya sara ɓwanǝ kǝr anǝ kǝrhyi ariya sǝra ǝzǝgǝ mai, ara ǝzǝgǝ wu shili ǝnga ɓwaɓwatǝ nyi. Ɓwaɓwatǝ nǝ kalar pǝci tsaˈa aga pǝci ta nga nyi.
©2024 Initiative for the Translation and Development of African Languages and Margi Tiwi Nga Təm