Matiwu 5
5
Tǝtǝlna Ndǝr Hyal A Dar Kǝra Mau
1Ənggǝra Yesu lari dlamir nji, kǝ ji maˈyi a dar kǝra mau, kǝ ji nda nggya gya. Ba zǝmbǝlma nyi ˈyar shili ǝgya ja.
Barka
(Luka 6:20-23)
2Kǝ ji dzǝguya highiɓau, ju na,
3“Barka anǝ njira
tǝtǝwa wu mambǝl,
ara tǝlkur Hyal nǝr nda ngau.
4Barka anǝ njira
wu sǝˈyinggu,
ara nju nda pǝli anǝ nda.
5Barka anǝ njira tinakǝr,
ara ndu nda
faˈabiya ki ǝnga duniya.
6Barka anǝ njira
ǝnga wuɓau ǝnga hilir nggya tsapǝu,
ara nju nda nyabiya nda.
7Barka anǝ njira
ǝnga tǝhuɗǝu,
ariya nanda nju
nda tǝhuɗǝ ǝgya nda.
8Barka anǝ njira
ɗǝfuwa nda cicau,
ariya ndu nda lari Hyal.
9Barka anǝ njira
mǝl thlǝr aga nggya jamǝu,
ariya nju nda ngga nda
ǝnga wazha Hyal.
10Barka anǝ njira
nju ɗa nda
ariya mǝl sǝra tsapǝu,
ara tǝlkur Hyal nǝr nda ngau.”
11“Barka anǝ hyi ma nji nggǝl hyi, nji ɗa hyi ǝnga thla fati nǝ kurthlǝu ǝnga na patǝr sǝ ɗǝmwaˈyi ar kǝra hyi ariya yau. 12Hya caguli ǝnga hya nggya ǝnga huɗǝ pipida ara hyu nda uya akkǝri gangǝ a dǝmǝlmau, ariya abangǝ nga nji ɗa nabiˈyar kǝra tǝrabiya tsu.”
Unau Ənga Mbǝmbǝl
(Markusu 9:50; Luka 14:34-35)
13“Nahyi ngǝ unau nǝ duniya. Ama ma unǝ caɓǝnakǝr, abar nga ju sǝni shabiya kǝrnyi a shila? Tsu ja sǝni ɗa mǝnahǝ mai, kǝl ba nja vakana nyi a biya ba nja biya cicina nyi.
14“Nahyi mbǝmbǝl nǝ duniya ngau. Mǝlmǝ kǝra a dar madzigam a sǝni ɗǝwanakǝr mai. 15Nja sǝni mbǝbiya pitǝlla ba nja mbuya ǝgya kiɗa ǝgwa mai. Ama nja kyaga fiya a dar madzigam, ba ja dzǝgwa mbǝl anǝ kalar ndǝ kǝra a vwu ki kau. 16Abangǝ tsu, bǝgǝ mbǝmbǝlǝr hyi a mbǝl a dumwar nji, aga nda lari mǝnahǝkura thlǝrǝr hyi ba nda dzǝgwa fal Dǝrhyi kǝra a dǝmǝlmau.
Highiɓau Ar Kǝra Dlaɗau
17“A sara hya ɗǝnga abǝr yi shili aga ya sa dazhina highiɓǝ nǝ dlaɗǝ Musa ǝnga highiɓǝ nǝ nabiˈyar mai. Nayi shili aga ya sa dazhina nda mai ama aga ya sa nyabiya nda. 18Ya nar hyi jiri, divira dǝmǝlmau ǝnga gyi wu ˈyi a sanakǝr, alaga sǝ ǝnggǝr cambwaɗi ba alaga sǝ kushu ǝnggǝr tsǝfǝ tafǝu, aˈyi wu nda sa wu dlaɗǝ mai, kǝl kalar sǝ nyabiya dzau.
19Kalar ndǝ kǝra gǝra ɓǝlari pathlǝ wu kusha dlaɗǝˈyar kau, ǝnga ji highiɓǝ anǝ alenyi nji aga nda mǝl abangǝ ngau, nju nda ngga nyi ndǝra kushu wu tǝlkur Hyal. Abangǝ tsu, kalar ndǝra wu mǝl thlǝr ǝnga dlaɗǝˈyar kau ǝnga ju highiɓǝ anǝ nji, ju nda ɗa dǝgalǝ wu tǝlkur Hyal. 20Ya nar hyi jiri, ma tsapǝkur hyi aˈyi ndiya nǝ njir Farisi ǝnga nǝ malǝmǝ dlaɗǝ ˈyar mai, nahyu sǝni gwu tǝlkur Hyal mai.
Highiɓau Ar Kǝra Ndzǝ Ɗǝfu Ənga Ndau
(Luka 12:57-59)
21“A nggari hyi ǝnggǝra nji na anǝ nji ɗǝɗǝmǝu, abǝr, ‘A sara ga tsa ndǝ mai ǝnga kalar ndǝra tsǝya ndau, nju nda mǝl numa anǝ nyi.’ 22Ama yu na anǝ hyi, abǝr kalar ndǝra ɗǝfu ǝnga zamǝ nyi, nju nda mǝl numa anǝ nyi. Ətsu, kalar ndǝra na anǝ zamǝ nyi, ‘Sǝ nga gǝ mai,’ ba nja hǝri nyi a dumwar njir pathla. Ama kalar ndǝra na anǝ zamǝ nyi ‘Nagǝ dza,’ a ɗar ja tsaˈa aga gwu uˈur kǝtsa.
23“Agabangau, ma ga vǝr lǝ sǝ a dumwar Hyal ba gǝ ɗǝngari abǝr huɗa zamǝ ngǝ ndzǝndzǝ nga nyi ǝnga gau, 24ba ga fiya sǝr lǝ ngau, a dumwar Hyal kwatahǝu. Ba ga maˈyi, ga nda ɓasǝwa ǝnga zamǝ ngau, ǝnggau, ba ga dzǝgwa shili ga sa lǝri sǝr lǝ ngau.
25“Ma ndǝ wulana ngǝ a ndu mwar pathla, hya ɓasǝwa ǝnga ja tsu hyi ar lagu. Ma aˈyi abangǝ mai, ba ja fuwa ngau a gwu tsa ndǝr pathla, ba ndǝr pathla tsu a fuwa ngau a gwu tsa dǝgala ndǝr fursǝna, ndǝr fursǝna tsu ba ja fuwa ngau a gwu fursǝna. 26Ya nar ngǝ jiri, nagu biya mai, kǝl gǝ kina patǝr sǝra nju nu ngau.
Highiɓau Ar Kǝra Sǝsukur
27“A nggari hyi ǝnggǝra nji nana tsu kaɗǝu, abǝr, ‘A sara hya mǝl sǝsukur mai.’ 28Ama sǝra yu na anǝ hyi, ca ngǝ, ma ndǝ tsamǝ mala ǝnga ɗǝfu nǝ cimǝ sǝsukur nga ju mǝl, ja sǝni abǝr, a pidar ja ǝnga ja wu ɗǝfuwa ja. 29Ma liya gǝ nǝ mazǝm, wu sǝwa ngǝ aga ga mǝl bikau, ga tǝkuɗǝbiya nyi, ba ga sǝna nyi. Kuji ga tini pathlǝ wu pama dza gau, a ndiya dza gǝ papatǝu a gwu uˈur kǝtsa. 30Ma pǝla gǝ nǝ mazǝm, wu sǝwa ngǝ aga ga mǝl bikau, gǝmna ba ga vakana nyi. Kuji ga tini pathlǝ wu pama gashal dza gau, a ndiya dza gǝ papatǝu a gwu uˈur kǝtsa.
Highiɓau Ar Kǝra Kǝdlǝ Mala
(Matiwu 19:9; Markusu 10:11-12; Luka 16:18)
31“A nanar nji tsu kaɗǝu, abǝr, ‘Kalar ndǝra kǝdlǝna mala nyi, a ɗar tsaˈa anǝ sala nyi ja nǝ nyi tsǝfǝ nǝ sakida kǝdlau.’ 32Ama yu na anǝ hyi, kalar ndǝra kǝdlǝna mala nyi, ma aˈyi ara nji mbar nyi a vǝr yiwu sal ndǝ mai, a sǝwa nyir ja aga ja mǝl sǝsukur. Ətsu, kalar ndǝra hǝri mala kǝra nji kǝdlǝna, a ɗar ja ndǝ sǝsu.
Highiɓau Ar Kǝra Sǝm Fǝla
33“Ətsu, a nggari hyi nji na anǝ nji ɗǝɗǝmǝu, abǝr, ‘A sara hya sǝm fǝla ar kǝra fati mai, ama hya nyabiya alkawal kǝra hyi mǝliya nyi anǝ Thlagǝu.’ 34Ama yu na anǝ hyi, A sara hya sǝm fǝla valam mai, alaga ǝnga dǝmǝlmau ara tsǝkafǝ Hyal ngau, 35alaga ǝnga gyi wu ˈyi, ara vir fǝ hiya ja ngau, alaga ǝnga Urshalima, ara mǝlmǝ Tǝl dǝgalǝ ngau. 36Ənga tsu a sara hya sǝm fǝla ǝnga kǝra gǝ mai, ara naga sǝni shabiya zǝma shisha gau, ja sha aga ɗa pǝrtǝu ǝnga alaga kyakyar mai. 37Sǝra hya kyaga na, ca ngǝ, ‘Angǝ’ ja ɗa ‘Angǝ’ ǝnga ‘Awau’ ja ɗa ‘Awau.’ Kalar sǝra a biyabanga kau, sara ara Shatan nga nyi shili.
Highiɓau Ar Kǝra Kyi Sau
(Luka 6:29-30)
38“A nggari hyi ǝnggǝra nji nana tsu kaɗǝu, abǝr, ‘Li ar viya li, hir tsu ar viya hir.’ 39Ama sǝra yu na anǝ hyi, ca ngǝ, a sara hya ka ndǝ ɗǝmwaˈyi mai. Ma ndǝ nǝ ngǝ tsǝbalma ar balma mazǝma gau, ba ga shabiya nyi zǝma nyi tsu. 40Ma vanyi ndu yiwu aga ja wulana ngau ǝnga ja hǝri lǝgutǝ ngau, bǝgǝ ja hǝri patǝ ǝkkǝˈyi sǝr bakǝ ngau. 41Ma ndǝ cuwa ngǝ aga hya ɓǝ nǝ miyalu pathlǝu, maˈya mǝ nǝ miyalu mǝthlǝ ǝnga ja. 42Nǝ nyi anǝ ndǝra kǝdiyau ara gau, ndǝra shili tsu, ji sa yiwa mǝl ara gau, a sara ga ka anǝ nyi mai.
Ga Yiwu Dawa Ngau
(Luka 6:27-28,32-36)
43“A nggari hyi nji na anǝ nda, abǝr, ‘Ga yiwu zamǝ ngau, ba ga piyari shishir dza dawa ngau.’ 44Ama yu na anǝ hyi, hya yiwu dawar hyi ba hya kǝdi Hyal anǝ njira wu ɗa hyi. 45Mǝl abangǝ nga hyu nda ɗa wazha Dǝrhyi kǝra a dǝmǝlmau, ndǝra a vǝr sǝwa pǝci ja mbǝl ar kǝra nji tsapǝu ǝnga nji batal ǝnga tsu ja tǝɗǝya par sara a dǝmǝlmǝ a gyar kǝra nji tsapǝu ǝnga nji ɗǝmwaˈyu.
46Ma njira a vǝr yiwu hyi nga hyu yiwu wacu, wa thlǝmǝ culi akkǝri kǝra hyu nda uya? Alaga njir dlǝwu budǝ ma tsu, ndu mǝl abangau. 47Ma tsu, zamǝr hyi nga hyu usa wacu, ya, mi ngǝ sǝra hyi mǝliya pamǝ a mwara alenyi nja? Mǝna sǝni alaga njira aˈyi njir Yahudiya mai, ndu mǝl abangau. 48Hya nggya nyinyi cipǝu, ǝnggǝr kǝra Dǝrhyi kǝra a dǝmǝlmǝ nyinyi cipǝu.
©2024 Initiative for the Translation and Development of African Languages and Margi Tiwi Nga Təm