JONAH 3
3
1 Bawipa ih ṭong cu Jonah hnenah a ra thleng sal ih, 2“Tho awla a nasa zetmi khawlipi Nineveh ah feh aw; ka lo sim ciami vekin ka thu va phuang aw,” tiah a ti. 3Jonah in Bawipa ih thu a thlun ih Nineveh khua ah a feh. Nineveh cu khua tum ngaingai a si ih khawsung cu ni thum sung feh a si. 4Nikhat sung a feh ih Nineveh khua ahcun thu a sim: “Ni sawmli hnuah Nineveh khawpi hi a cem ding,” tiah a tlang-au ciamco.
5Cutikah Nineveh khua mi pawl in Pathian an zum. Nauta bik in upa bik tiang buri hnipuan an hruk ih rawl an ul.
6Cuih thu cu Nineveh siangpahrang in a theih tikah a siangpahrang tokham ihsin a tho ih a lal hnipuan a hlit hnuah buri hnipuan a hruk ih vutcam lakah a to. 7Cule Nineveh khawsung ah thu a than ih, “Nineveh siangpahrang le a tlangsuak pawl ih thuthan mi cu: Minung siseh, ṭilva siseh, caw siseh, tuu siseh zianghman nan ei lo pei; rawl nan ei lo pei ih tidai khal nan in lo pei. 8Minung siseh ramsa siseh, nan zatein buri hnipuan nan hruk pei ih nan aw neih patawp in Pathian nan ko pei. Zozo khal a thil sual tuahmi le a siatnak tlansan seh. 9Kan hlohral ṭheh lonak dingah Pathian in a thin a sup sal ih a thinhengnak a daiter khal a si thei,” tihi a si.
10Cutiih an tuahmi le an nundaan ṭha lo pawl an tlansan kha Pathian in a hmuh tikah a thin a sup sal ih an parah thlenter dingih a tummi siatsuahnak cu a thlengter sal lo.
S'ha seleccionat:
JONAH 3: FCL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Falam Bible Revision © Bible Society of Myanmar, 2002.