1 KORINTI 4
4
Butu Ondae Ue Ala puu mpobitara
4:1-5
1Kanandiomo moikoano domengkita kami mia: kana tetenaa-Do i Kerisituu, anu ndi onae pine'ala-alaako rahasia-Do Ue Ala. 2Anu poko'ariano inema inso a luwuno puu pompekakaako anu kanandio onaemo, nine mengkaa tekona domempine'ala-ala. 3Ndi ongkue tedei koa ntu'u pengkonaano ke komiu bintara aku ke a aasa pobitaraa mia. Tendeano maupo koroiku ongkueku nahi kubitarao. 4Hangano lano nahina pinokonto'oriku, sine komba hangano atuu kupinokomenteeako. Ondae anu bitara aku, onaemo Ondae i Ue. 5Onaemo pu'uno, si mpobitara ba napi tempono, onaemo ba napi Dohawe i Ue. Ira mokomewineo, saru mbo'u hapa anu tewuni a laro wongi-wongia, ka Ira mopokitao hapa anu tinoo i laro aroa. Ka sompo-sompo mia ta mohawe po'unde-unde inso ndi Ondae Ue Ala.
Impe'urumakomo
4:6-21
6Pepaekompo luwu-luwu, luwuno pau andio kupokonao a ngkoroiku ongkueku ka ndi Apolo, hangano omiu, ka impepaguru inso a mpandirimami hapa pengkonaano pau, ”Si melaloo anu hinao teburi,” ka si hina i olomiu anu mompelangka-langkai mokolaluao anu aasa sekonopo anu susua. 7Hangano isemake anu tumuduo laluakopo? Ka hapake anu hina ndi omue, anu nahi utarimao? Ka tewala lano utarimao, tembio ka umawongkoako, kana nahi utarimao? 8Memowohi komiumo, gagi komiumo mengkaea, maupo nahi saru omami megagi komiumo mokole. Anai, tedoa moiko tewala mentee kanandio, nine megagi komiumo mokole, ranta omami mbo'u tetonda gagi mokole saru omiu. 9Hangano, montonda pohaweku, omami luwuno tinena, Dopoweeakami Ue Ala po'ianga i totono ntu'u, mengkena kana mia anu mehinuku mate iramo, hangano megagi kamimo kikitaano wawontolino, luwuno mala'eka ka mia. 10Mebenge-benge kami hangano Ondae i Kerisituu, sine mempande komiu ndi Ondae i Kerisituu. Omami memolema, sine omiu memoroso. Omiu memaramba, sine omami kodei tuwumami.
11Hawe a tempo andio memokoninggo kami, memokoranga, nahi kimpelemba, mentinunduhi ka tuwu mpelakopi, 12#Tin. 18:3 anggaa anu mobea kime'anggaakono kaemami. Tewala mempinepaukiako kami, mporonso kami; tewala mewineweunsa'o kami, mensabara kami; 13tewala mempinosebe kami, kimesangkio mpiha moiko; megagi kamimo mpengkena kana rompono wawontolino, mengkena saru anu mokoburu inso a luwuakoano. Hawe kanandio-andio.
14Kuburio mongkona andio komba ndio kupokoko'ii komiu, sine kumuahako komiu anaku anu pinehohawaku. 15Hangano maupo mapasowu-sowu anu paguru komiu mongkona Ondae i Kerisituu, komba hadio amamiu. Nde ongkuemo gagi amamiu anu ndi Ondae i Kerisituu Yesu hangano Lele Mawongkoa anu kupaleleo ndi omiu. 16#1Kor. 11:1; Plp. 3:17 Onaemo pu'uno ka ku'emao ndi omiu: imentondaomo pandiriku! 17Onaemo pu'uno ka kutenao i Timotiu aiwa ndi omiu, onaemo ana anu pinehohawaku ka anu pine'ala-ala ndi Ondae i Ue. Onae ta mopoto'oriakomiu tuwua anu tinondaku ndi Ondae i Kerisituu Yesu, kana anu kupaguruako ira a sompo bawaa i sua-suamo koa. 18Sine hinao ba opia mia anu gagi mompelangka-langkai, hangano potaedo, nine nami aku hawe mbo'u ndi omiu. 19Sine aku koa ronga hawe ndi omiu, tewala po'ehe-Do i Ue. Ka aku koa tumo'orio, komba mongkona pinaudo mia anu mpompelangka-langkai atuu, sine mongkona rosodo. 20Hangano Poparentaa-Do Ue Ala komba hina inso a mpau, sine inso a mpabawa. 21Hapake po'ehemiu? Asalakonoke ka ku'aiwaako ponsepi ndi omiu ke saru pompehohawa ka aroa anu mauru?
S'ha seleccionat:
1 KORINTI 4: XMZ
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió