1 KORINTI 3
3
Teposisalaa
3:1-9
1Ka ongkue, pepaekompo, i tempo atuu nahi kupokompepauakomiu kana saru mia bukeako Penaa, sine butu saru mia tuwu ntolino anu napi sompo ponto'orino ndi Ondae i Kerisituu. 2#Ibr. 5:12-13 Susu anu kuweeakomiu, komba kaanga motea, hangano napi mpokotarimao. Ka maupo kanandio-andio napi mpokotarimao. 3Hangano da mia komiu mentuwu ntolino. Hangano, tewala i olomiu hinao kohili ka teposisala kombake mongkona atuu mokomengkaao, nine omiu mia mentuwu ntolino ka nine mentuwu komiu montonda po'eheno aroamiu? 4#1Kor. 1:12 Hangano tewala anu asa mia motae, ”Ongkue inso a bawaano i Paulu,” ka anu mehano mpotae, ”Ongkue inso a bawaano i Apolo,” kombake mongkona atuu mokomengkaao, nine omiu mia mentuwu ntolino anu komba rohani? 5Gaagi, hapake i Apolo? Hapake i Paulu? Ondae puu mpo'angga-Do i Ue anu hangano ondae ka igagi mpompe'ala-ala, singge mia montonda sala anu Doweeakono i Ue. 6#Tin. 18:4-11, 24-28 Ongkue pahoo, i Apolo sumiwuio, sine Ondae Ue Ala anu motuwuo. 7Onaemo pu'uno anu tinudu komba anu mompaho ke anu monsiwui, tendeano Ondae Ue Ala anu mompowee tuwua. 8Moiko anu mompaho maupo anu monsiwui mengkena koa; ka singge mia ta tumarimao tambono menunu saru inanggano onaeno. 9Hangano omami onaemo pe'asa mpo'angga-Do Ue Ala; omiu onaemo lere-Do Ue Ala, winangu-Do Ue Ala.
Pondasi ka winangu
3:10-23
10Menunu saru pompehohawa-Do Ue Ala, anu Doweeakune, ongkue kana asa mia puu mpowangu anu pande monaa akumo pondasi, ka mia susua motilaloakono mowangu iwawono. Sine sompo-sompo mia asalakono ka ipepenteeo, ba kana'umpe ba ipowangu i wawono. 11Hangano nahina maupo te'asa mia anu polio monaa pondasi susua sekonopo pondasi anu ninaaomo, onaemo Ondae i Yesu Kerisituu, 12Ke mia ira mpowanguako wulaa a wawo mpodasi andio, ke salaka, watu paramata, keu, ewo mokari ke seami, 13pohona te'upua inanggano singge mia ta koa tengkita. Hangano oleo-Do i Ue ta mokomengkaao, nde onae ta tengkitaako api ka ba kana'umpe inanggano singge mia ta inarahakoako api atuu. 14Tewala anggaa anu winanguno asa mia nahi mo'ai, mia atuu ta mohawe tambo. 15Tewala inanggano mo'ai, onae ta marugi, sine koroino ta kinadudui, sine kana inso a laro api. 16#1Kor. 6:19; 2Kor. 6:16 Nahi imento'orioke, nine omiu raha-Do Ue Ala ka nine Penaa-Do Ue Ala mo'ia i laromiu? 17Tewala hinao mia anu sumolangio raha-Do Ue Ala, asalakono mia atuu Ira sumolangio Ue Ala. Hangano raha-Do Ue Ala onaemo mempori ka raha-Do Ue Ala atuu onaemo omiu.
18Ka si hina mia mopo'oo koroino onaeno. Tewala hinao i olomiu anu potaeno onae monto'ori montonda wawontolino andio, po'ineeomo ka igagi benge-benge, ka iponto'ori koa. 19#Ayb. 5:13 Hangano ponto'orino wawontolino andio Dopebenge-bengeo Ue Ala. Hangano hinao teburi, ”Ondae anu morako mia monto'ori a laro mpandeno mo'ungke akala.” 20#Pud. 94:11 Ka a mpo'ianga susua, ”Doto'orio i Ue luwuno tinoodo mia mponto'ori; Menteeano luwuno nahina tuduno.” 21Onaemo pu'uno ka si hina mia anu mawongkoakono koroino a mia, hangano luwuakoano omiu umbuno: 22moiko i Paulu, i Apolo, maupo i Kepasi, moiko wawontolino, tuwua, maupo matea, moiko tempo kanandio-andio, maupo tempo anu ta hawe. Luwuno omiu mpe'ueo. 23Sine omiu onaemo mia-Do i Kerisituu ka Ondae i Kerisituu onaemo mia-Do Ue Ala.
S'ha seleccionat:
1 KORINTI 3: XMZ
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió