गालाति 5
5
खिरिस्टङा सोतान्तर आपियुक्
1खिरिस्टङा आनि सोतान्तर लिमाउङ्सा छुट्कारा आचोगाइसे॥ हिड्डेउङ् दोरो लिसानिउङ् युङानि, हिट्नुङ् फेरि धारमाबिधिङाना चाकार लिनेनिन्॥
2खेम्सानुम्, आङा पावाल आप्पेङा खानिलाउङ्सा लोनाँनि, खानिङा खाताना आचोगुम्टुम् भोने खिरिस्टङा खानिलाउङ्सा चोगुना टोॽवा खेडोक् डोक् लियुक्॥ 3फेरि आङा खानि लोनाँनि, खानि माङ्हाङ् ओटोकानाङि माहामा लिमा खाताना आचोगुम्टुम् भोने, खानिङा धारमाबिधिङि लिसागा ख्वाप्पा थोक् खानिङा पालान् चोक्मा कोन्युक्॥ 4हिट्नुङ् खानिङा धारमाबिधि पालान् आचोगुमुङ् माङ्हाङ् सोरि धारमोति लिमा आकोलिटि भोने, खानि आप्पे खिरिस्टलाम्मा आसाम्डिएसिए, हिट्नुङ् खानि माङ्हाङ् ओमायादायालाम्मा लाप्माङ् आलिसिएसिए॥ 5माङ्हाङ्ङा आनि धारमोति ए नुङ् आलाड्ना रिङ् ठाहा टोक्मा माङ्हाङ्ङाना ओहाङ्साङा डोक् आनि घुवार आफायुक्, पोङ्भोने आनि खिरिस्टङि बिस्वास चोगुम्टुम्॥ 6पोङ्भोने खिरिस्ट येसुङि बिस्वास काचोक्चि आनि लाउङ्सा खाताना चोगुम्चा चोक्निम्चा पाक्चा फाराक् वाइना॥ टरो मुलि रिङ्उम्बाक् खिरिस्टङि आनि बिस्वास चोगुम्नाँ आनि आरु याप्मिचि माया चोगुम्चिम्चिम्॥
7खानिङा नुलोक् डोक् आचोगुएट्टुम्ना डाना, टरो छेम्बाना रिङ् पालान् चोक्मा साङा माछाक्टिएगा? 8नाड्डेना टेप्माना रिङ्उम् खानि माछेम्डिना माङ्हाङ्लाम्मा टायाना माखाक्॥ 9ओछेक्छेक् चोगानि, खाट्टिप्मा खामिरङा ख्वाप्पा पिठो बोङ्बोङ् चोगु गाड्डे डोक्, माङ्जोना हिसिक्माङा जोम् याप्मिचिगा बिस्वास जाखाम् चोक्मा हिडुटु॥#१ कोरिन्थि ५:६ 10खानिङा आङा लोनानिगा रिङ् नुङ् आरुलेङ् निङ्ग्वा आपिनिम्ना नुङ् आङा टाङ्बाङि बिस्वास चोगुङ्टुङ्॥ टरो खानि याङ्छामा काचाट् जो उलि चा माङ्हाङ्ङा हिट्ना साजाए पिडुटु॥
11आम्भु-आन्झाचि हिट्नुङ् आनो-आन्झाचि, आझै आङा खाताना चोक्मा कोन्युक् नुङ् पारचार चोगुएट्टुङ् भोने, पोङ् याहुदिचिङा आङा आझै याङ्छामा याङ्ओचाट्नागाँ? आङा याप्मिचि खाताना चोक्मा कोन्युक् नुङ् पारचार चोगुङे भोने, खिरिस्ट खाप्चेङि सियाना रिङ्ङा खोनाङाना चा निङ्ग्वा टुग्निना॥ 12खानि याङ्छामा माचाट्टिगाँ खाताना एडोक् माखाक् हिट्नागाँङाउम् उन्चि आङ्गा डोक् ओहेग्वाक्॥
सेङ्सेङ्ना हाङ्सा हिट्नुङ् आनि निङ्ग्वा
13आम्भु-आन्झाचि हिट्नुङ् आनो-आन्झाचि, खानिउम् टे माङ्हाङ्ङा सोतान्तर लिमाउङ्सा मासेगिगा ए॥ खानिङा आटोगुम्ना सोतान्तर पाप चोक्माना निङ्ग्वालेङ् टिनेनुम्॥ टरो ना सोतान्तरउम्बाक् ठिबाङ्ङा आरको माया चोक्सा सेवा चोक्मालाउङ्सा चोगानुम्॥ 14पोङ्भोने खानिङा ठिक् आग्याँ पालान् आचोगुम्टुम् भोने, ख्वाप्पा धारमाबिधि पुरो आचोगुम्टुम्, हिट्ना आग्याँम्बाक्, “खान्ङा आप्पे गाड्डे डोक् काटाक्लुङ्चि चा माया चोगुचि॥”#लेबि १९:१८ 15टरो खानि आप्पे-आप्पे आखेइयाक्टिटि हिट्नुङ् खानि खानि केङ्केङ् आचोगिटि भोने, ओछेक्छेक् चोगानि, नाभाम्टे खानि आप्पे-आप्पे जाखाम् आलिसिटि॥
16हिड्नाडेउङ् आङा खानि लोनाँनि, सेङ्सेङ्ना हाङ्साङा मालोडि गाड्डे लाम्टियानि, हिट्नुङ्ना खानिना पापलोक्ना निङ्ग्वाङा चोक्मा कोलु गाड्डे ओचाफेम्मा टोॽवा आचोक्निम्ना॥ 17आनिना ओचाफेम्मा निङ्ग्वाङा चोक्मा कोलुना रिङ् सेङ्सेङ्ना हाङ्साङाना बिरुद्दाङि लियुक्, हिट्नुङ् सेङ्सेङ्ना हाङ्साङा चोक्मा कोलुना रिङ् आनिना ओचाफेन्ना निङ्ग्वाङाना बिरुद्दाङि लियुक्॥ नागाचि इप्पोक् साक्ति ठिक् आरकोङाना बिरुद्दाङि कोब्चिगा॥ हिट्डेउङ् आनिना ओभेन्ना निङ्ग्वाङा चोगुनाँ आनि चोक्मा कोलुम्ना ओचेट्नुना टोॽवा चोक्मा हिनिम्ना॥#रोमि ७:१५-२३ 18टरो खानि सेङ्सेङ्ना हाङ्साङा मालोडि गाड्डे आलाम्टिइटि भोनेम्टे खानि धारमाबिधिङाना आधिन्ङि आलिसिन्गा॥
19आनिना पाप निङ्ग्वाङा चोगुगा टोॽवाचि सोब्बेलाउङ्सा ठाहा युङ्ग्वा, हिट्नागाम्बाक् इम्मेप्माजामा टोॽवा चोक्मा, आसुद्दो निङ्ग्वा चोक्मा, हिट्नुङ् मोन्डिसिइना टोॽवा चोक्मा, 20हिट्नुङ् मुरति साम्माङ् चोक्मा, टुनामुना चोक्मा, आरु चिम्मा फुट्मा, याप्मिचिलोक् खेमा, रेक् काप्मा, याक्लेट्मा, आप्पे एडोक् ओचेट्नु लिमा कोम्मा, मिटोङ्मा, आरको छुम्मा चोक्मा, 21हिट्नुङ् सिसा मिहिमा, टेडुबा लिमा, ओचाफेन्ना रिङ्ङि मोज्मोज्जा चोक्मा, हिट्नुङ् नाड्डेगा आरु ओभेन्गा टोॽवा चोक्मा लियुक्॥ नाड्डेगा टोॽवा काचोक्चिङा माङ्हाङ् उमुलुक्ङि साहाभागि लिमा उहिडुन्ना नुङ् आङा पाइले चा ना रिङ् खानि लोनाँने हिट्नुङ् हाट्ले चा खानि लोनाँनि॥
22टरो सेङ्सेङ्ना हाङ्साङा माट्टु गाड्डे काचोक्बा याप्मिङा नाड्डेगा टोॽवा चोगुटु, उन्ङा याप्मिचि माया चोगुचिचि, खुसि लियुक्, हाङ्हाङ् लियुक्, आङ्मा काहिबा लियुक्, याप्मिचि दाया चोगुचिचि, आरु नुलोक् मेट्टुचिचि, बिस्वासिलो लियुक्, 23मेयोक्ना लियुक्, हिट्नुङ् आप्पे लाउङ्सा काबुङि कायुङ्बा लियुक्॥ नागा टोॽवाङाना बिरुद्दाङि पाक्चा नियाम वाइना॥ 24खिरिस्ट येसुङि उलिगा याप्मिचि टेप्माङा उन्चि पापलोक्ना चोलालोक् ओभेन्गा निङ्ग्वा चा खाप्चेङि ओसेडुटु॥
ठिबाङ्ङा आरको घुवार फामा
25आनि सेङ्सेङ्ना हाङ्साङा ओछोङ्ग्वाट् चोला आपिडाइसे, हिड्डेउङ् हाङ्साङा आलोडा गाड्डे आनि चोगुम्॥ 26हिट्नुङ् आनि आम्टेप्मा औधि ठेङाना नुङ् माट्मा लिनिना, आरु याप्मिचिलोक् चुङ्मा लिनिना, हिट्नुङ् ठिबाङ्ङा आरको रेक् काप्माना टोॽवा चोक्मा लिनिना॥
© 2023, Wycliffe Bible Translators, Inc. and Nepal Bible Society