गालाति 4
4
1-2आङा माप्मा कोलुङ्ना रिङ्उम्बाक्, कोइ याप्मिङाना उइछा युङ्ग्वा, हिट्नुङ् हिट्ना छा ओओ लिसाना बेला उप्पा सिए, हिट्नुङ् हिट्ना ओओ सियाना उप्पाङाना सोब्बे माक्फेन्सुबेन्ङाना डाङ्बा लिचा हिट्ना ओओ डोक् लिसानाँ कामारा गाड्डे एडोक् लियुक्॥ पोङ्भोने हिट्ना ओओ कोइना कोइङा उप्पाङा टोङ्सुबिडुना बेला मिलिए सोम्मा उन् हिट्नुङ् उन्ङाना उमाक्फेन्सुबेन् चा उपुयुबिडुटु॥ आखेरिङि हिट्नाङा सोब्बे थोक्ङाना आधिकार टोगुटु॥ 3हिट्नाड्डे डोक् माङ्हाङ् आन्याँ मिसेन् निमा पाइले, आन्याँ चा पिच्छाचि गाड्डे लिसिङे, पोङ्भोने ना नाराङि सासान् काचोक् ओभेन्गा हाङ्साङागा आधिन्ङि वासेट्टिङागा॥ 4टरो जब माङ्हाङ्ङा माट्टुना बेला टाए, उन्ङा उइछा पाङ्सुए॥ उन् ठिबाङ् मेन्झेमालाम्मा पोङ्से हिट्नुङ् उन्ङा माङ्हाङ्ङा मोसा पिडुना धारमाबिधि पालान् चोक्मा कोलाना डाना॥ 5हिट्ना धारमाबिधि पालान् चोक्मा कोन्युक् नुङ् आनि छुट्कारा पिमाउङ्सा उन्ङा हिट्डे चोगुए॥ हिट्नालाम्मा डोक् आनि माङ्हाङ् ओछालेट्चि लिमा हिडिएसिए॥ 6हाट्ले आनि माङ्हाङ् ओछालेट्चि ए, हिट्नुङ् माङ्हाङ्ङा उइछाङाना ओहाङ्सा आनि निङ्ग्वाङि आठेन्डाबिडाइसे, हिट्नुङ् हिट्ना हाङ्सालाम्मा आनि उन् “हाउ आब्बा, पाबा” नुङ् छेम्मा हिडुम्टुम्॥ 7हिट्डेउङ् हाट्लेउङ् खानिम्बाक् चाकार माखाक्, खानि सोब्बे माङ्हाङ्ङाना ओछालेट्चि ए॥ हिट्नुङ् खानि माङ्हाङ्ङाना ओछालेट्चि आलिसिनाँ उन्ङा ओछालेट्चि पिमा युङ्सुना ख्वाप्पा थोक् खानिङा आटोगुम्टुम्॥
पावालङा गालातिङिगा बिस्वासिचि यान्दा चोगुचिचि
8खानिङा माङ्हाङ् मिसेन् निमा पाइले खेडोक्गा साम्माङ्चि साम्माङ् आचोगुम्चिमुङ् हिट्नागाँगा आधिन्ङि आलिसिए॥ 9टरो हाट्लेउम् खानिङा माङ्हाङ् मिसेन् आनिसेसुम्मे, हिट्नुङ् माङ्हाङ्ङा खानि ओछालेट्चि माचोगेसे॥ हिट्डेउङ् पोङ् पाइलेगा खेडोक्गा धारमाकारमा हिट्नुङ् खेडोक्गा हाङ्सालेङ् आनोक्टिउङ् फेरि हिट्नागाँगा सेवा चोक्मा निङ्ग्वा आचोगुम्टुम्ना टे? पाक् आझै हिट्नाडेगा थोक्चिगा साक्तिङाना आधिन्ङि युङ्मा आकोलिटिगि? 10खानिङाउम्टे याहुदि धारमाकारमा, चाडाबाडा, बारखि, रितिथिति एडोक् मानाँ चोक्मा आकोलुएट्टुम्॥ 11खानि लाउङ्सा आङा चोगुङ्ना टोॽवा खेरोक् डोक् लिसेनि नुङ् आङा चिन्तित लिसाइसाङे॥ 12बिस्वासि भुम्भु-झान्झाचि हिट्नुङ् आनो-आन्झाचि, आङा गाड्डे डोक् खानि चा लिसानि नुङ् बिन्टि चोक्नाँनि, पोङ्भोने आङा चा खानि गाड्डे डोक् लिसेसाङे॥#४:१२ नाङाना उटुप्बाक् पावालङा याहुदिचिगा लिसाडागा रिङ् नाडुए हिट्नुङ् हिट्नागा गाड्डे डोक् लिसे॥ हाट्ले पावालङा हिट्नागा लिसाडायागा रिङ् नाडानुम् हिट्नुङ् उन् गाड्डे डोक् लिसानि नुङ् लोडुचिचि॥
आङा पाइले खेप् पारचार चोगुङ्नाँ खानिङा आड्डिक् ओचेट्नुलोक् याङ्आमेट्टिङे॥ 13आङा खानिङि पाइलेना खेप् नुना खाबोर आप्टुङ्ना बेला आङा टुगाङ्ना रिङ् खानि लाउङ्सा ठाहा युङ्ग्वा॥ 14हिट्ना बेला आङाना आयेम् टुगाउङ् खानिलाउङ्सा याङ्छामा लिसा चा खानिङा आङा चिम्मा याङ्आफुट्टेट्टिन्ना॥ हिट्ना ओसाट्टोङि खानिङा माङ्हाङ् रिङ् काउग्बा हिट्नुङ् खिरिस्ट येसु गाड्डे डोक् आङा नुलोक् याङ्आचोगिङे॥ 15हिट्ना बेला खानि आङालोक् आड्डिक् हारका आलिसिएसिगा, हाट्ले खोनि खाडेना हिट्ना हारका? आङा ना रिङ् चा माट्टुङ्टुङ्, खानिङा सोब्बे रिङ्ङि घुवार याङ्आफाडिङे, हिट्ना बेला लिसानाउम्बे खानिङा आङाना नुलोक् लाउङ्सा खानि मिक् चा आहोट्टुमुङ् पिमा निङ्ग्वा आचोगुमे बे॥ 16हाट्ले पाक् आङा खानि छेम्बाना रिङ् लोनानिनाँ खानि साट्टुर लिसाङेनि टे?
17माङ्जोना रिङ् काहिसिक्बाचिङा खानि निङ्ग्वा मेप्मा आड्डिक् ओकोलुएट्टु, टरो हिट्नागाँगा निङ्ग्वाम्बाक् ओचेट्नुना चोक्माउङ्सा माखाक्॥ खानिङाम्बाक् हिट्नागालेङ् एडोक् निङ्ग्वा आपिडुम् नुङ् आङालाम्मा साम्मा हिट्नागाँ खानि माकोलेएट्टि॥ 18हाट्ले हिट्नागा याप्मिचिङा खानि हिसिक्मा निङ्ग्वा चोक्मा ओचेट्नुना रिङ् ए॥ टरो आङा खानिलोक् लाप्माङ् वाङा चा हिट्नागाँ हिट्डे निङ्ग्वा चोक्मा खानिगा ओचेट्नु लाउङ्सा डोक् ए॥ 19खानि आइछाचि गाड्डेगा डोक्, मेन्झेमा छाडाङ्मा बेथा लाहाब् लिना बेला याङ्छामाङा छोट्-छोट् केलि गाड्डे आङा चा फेरि खानि लाउङ्सा याङ्छामाङा छोट्-छोट् लिङेट्ङा॥ खानि खिरिस्टङाना चाट्लाङि मिटुम्मे सोम्मा आङा ना याङ्छामा आङ्डुङ्टुङ्॥ 20ना बेला आङा खानिलोक् हिट्नि लिसाङ्ना बे नाड्डे टुक्लोक् पारा माप्मा कोन्नेट्नि बे॥ टरो हाट्ले खानि आङा पाक् रिङ् लोनानिगा हिट्ना रिङ् डोक् आनिङ्ग्वाङि वाइना॥
हागार लोक् सारा
21खानि धारमाबिधि पालान् चोक्मा निङ्ग्वा काचोक्चिङा आरिङ् खेम्सानुम्॥ मोसाङाना धारमाबिधिङि पाक् छेप्टेसेना हिट्ना रिङ् खानि लोनाँनि॥ 22धारमाछाप्लाङि नाड्डे छेप्टेसे, आब्राहामङाना इप्पाङ् येम्बेछा उइछाचि डाचिगा, ठिबाङ् चाकारनि हागारलाम्मा भोने, आरकोम्बाक् आप्पे ओटालिमाङ् सारालाम्मा॥#उत्पति १६:१५; २१:२ 23चाकारनि हागारलाम्मा याप्मिङाना उनिङ्ग्वा गाड्डे छा पोङ्से॥ टरो माङ्हाङ्ङा आब्राहामलोक् आप्पे चोगुना चामारसिङा युमाउङ्सा आब्राहामङाना ओटालिमाङ् सारालाम्मा उइछा पोङ्से॥ 24-25हाट्ले नाहि इप्पाङ् मेन्झेमाचिङाना रिङ्उम्बाक् माङ्हाङ्ङा चोगुना इप्पोक् माङ्हुप् बारेङि साङ्केत चोगुटु॥ चाकारनि हागारङाम्बाक् आराब देसङिना सिनाइ झोन्झोबाङाना बारेङि निमेट्टुटु॥ हागारम्बाक् हाट्लेसेन्ना यरुसलेम खालाङ्गा गाड्डेना ए॥ पोङ्भोने याप्मिचिङा ना झोन्झोबालाम्मा मोसाङाना धारमाबिधि ओटोगुए, हिट्नुङ् हिट्ना पारा डोक् हागारलाम्मा ओपोङ्सागा याप्मिचि ख्वाप्पा चाकारचि ए, हिड्डे डोक् यरुसलेमङिगा याप्मिचि मोसाङाना धारमाबिधि पालान् ओचोगुङ् चाकारचि गाड्डेगा डोक् ए॥ 26टरो साराम्बाक् टोनालोग्ङिना यरुसलेमलोक् टोङ्मा हिडुम्टुम्, पोङ्भोने उन् चाकारनि माखाक्॥ हिट्नुङ् हाट्ले सारा डोक् आनि मामा नुङ् लोमा हिडुम्टुम्॥ 27पोङ्भोने धारमाछाप्लाङि नाड्डे छेप्टेसे–
“हाउ छालुट्मा मेन्झेमाचि, खानि हारका लिसानि,
हाउ खोना बेला चा छाडाङ्मा बेथा ठाहा आटोक्निम्गेट्निम्गा,
खानि निङ्ग्वालाम्मा डोक् हारका लिसानिउङ् राट्टानि,
खानि छालुट्मा आलिसि चा, उन्चि येम्बेछा उलिसागा मेन्झेमाचिगा नुङ्ना चा खानिगा जोम् छालेट्चि उलियुक्॥”#४:२७ आब्राहामङाना ओपाङ्डाङ्मा साराम्बाक् छालुट्मा डाना॥ टरो माङ्हाङ् बिस्वास काचोक्चि सोब्बे आब्राहाम उपुङ्लाचि उलियुक्॥ नाड्डेउङ्, साराङाना उपुङ्लाचि जोम् उलियुक्॥ #यासैया ५४:१
28भुम्भु-झान्झाचि हिट्नुङ् आनो-आन्झाचि, आनि चा इसाहाक गाड्डे डोक् माङ्हाङ्ङा चामारसिङा चोगुना छालेट्चि ए॥ 29याप्मा बारखा पाइले याप्मिङाना निङ्ग्वालाम्मा पोङ्साना छा इस्माएलङा हाङ्साङाना ओबोल्ङा पोङ्साना छा इसाहाक याङ्छामा चाट्टुए॥#उत्पति २१:९ हिड्डे डोक् हाट्लेसेन् चा लियेट्॥ 30टरो ना बारेङि धारमाछाप्लाङा नाड्डे माट्टुएसुए, “चाकारनि हिट्नुङ् उइछा भारा होट्टानुम्, पोङ्भोने चाकारनिङाना उइछाङा सोतान्तर मेन्झेमालाम्मा पोङ्साना उइछालोक् हिट्नाँ खोना थोक्ङाना चा हाक् टोगुन्ना॥”#उत्पति २१:१० 31नाड्डेउङ् आम्भु-आन्झाचि हिट्नुङ् आनो-आन्झाचि, आनि चाकारनिलाम्मा पोङ्सिगा छालेट्चि माखाक्, टरो सोतान्तर मेन्झेमालाम्मा पोङ्सिगा छालेट्चि ए॥
© 2023, Wycliffe Bible Translators, Inc. and Nepal Bible Society