गालाति 6
6
1आम्भु-आन्झाचि हिट्नुङ् आनो-आन्झाचि, कोइ याप्मिङा ओचाफेम्मा टोॽवा चोगुना आटुबुम्मे भोने, खानि माङ्हाङ्ङाना ओहाङ्साङि दोरो आलिसागा मेयोक् लिसानिउङ् हिट्ना सुधार चोक्मा कोन्युक्॥ टरो ओछेक्छेक् चोगानि, नाभाउम्टे खानि चा निङ्ग्वा छिक्माङि ठामा आहिडिटि॥ 2खानि याङ्छामाङि आठाइना बेला ठिबाङ्ङा आरको घुवार फागा फा चोगानि, नाड्डेउङ् खिरिस्टङाना धारमाबिधि खानिङा आयुडुम्टुम्॥ 3कोइ याप्मि आप्पेम्बाक् ठेना याप्मि माखाक्, टरो आप्पेलाउङ्सा ठेना याप्मि नुङ् मिट्टुटु भोने उन्ङा आप्पे लाउङ्सा धोखा पिडुटु॥ 4खानि सोब्बेङा आप्पे आचोगुम्ना टोॽवा नुलोक् पुयानुम्॥ ओचेट्नुना लिसे भोने खानिङा आचोगुम्ना टोॽवाङि हारका लिसानि, टरो खानिङा आचोगुम्ना टोॽवाम्बाक् आरु याप्मिचिलोक् टोङ्नेनुम्॥ 5पोङ्भोने सोब्बेङा आ-आप्पे चोक्माना टोॽवाङाना जिम्मा आप्पे लिमा कोन्युक्॥
6माङ्हाङ् उरिङ् सिकाँ कालिबाङा उन्लोक् लिसागा ख्वाप्पा नुगा थोक्चि उन् काहिसिक्बालोक् हाम्मा कोन्युक्॥
7आप्पेलाउङ्सा खानिङा धोका पिनेनुम्॥ माङ्हाङ् साङा चा ढाँट् फोक्मा हिडुन्ना॥ याप्मिङा जे हिसुटु, हिट्ना थोक् डोक् छुम्सुटु॥ 8जुन् याप्मिङा उनिङ्ग्वाङिना ओचाफेम्माना रिङ् चोक्मा एडोक् निङ्ग्वा पिडुटु, हिट्नाङा जाखाम् लिमाना रिङ् टाडुटु॥ टरो जुन्ङा सेङ्सेङ्ना हाङ्साङाना निङ्ग्वाङाना रिङ् चोगुटु, हिट्नाङा सेङ्सेङ्ना हाङ्सालाम्मा लाट्निना चोला टोगुटु॥ 9आरु घुवार फामाना रिङ्ङि आनि निङ्ग्वा सेट्निम्चा, पोङ्भोने नाड्डे चोगुम्याक्टुम्मे भोने माङ्हाङ्ङाना ओबेलाङि आनि इनाम टोगुम्टुम्॥ 10हिड्नाडेउङ् आनि मौका टोगुम्नामे सोब्बे याप्मिचिलाउङ्सा ओचेट्नुलोक् चोक्मा कोन्युक्॥ मुलिगारि खिरिस्टङि बिस्वास ओचोगुगा याप्मिचि लाउङ्सा ओचेट्नु चोक्मा कोन्युक्॥
पावालङाना आखेरि साल्लाह
11पुयानुम्, आङा आप्पे आमुक्ङा खानिलाउङ्सा ठेगा-ठेगा आक्छेरङि छेप्टुएसुङे॥
12याप्मिचि ओटोकानाङि ओचेट्नु लिमा ओकोन्गाँ खानि खाताना चोक्मा कोन्युक् नुङ् मालोडेट्टि॥ ना रिङ् हिट्नागाँ खिरिस्ट खाप्चेङि सियाना बारेङि पारचार ओचोगुनाँ याप्मिचिङा याङ्छामा ओचाट्टुन्चिन् नुङ् एडोक् मालोडिएट्टि॥ 13खाताना उलिसागा याप्मिचि आप्पेङा चा धारमाबिधि पालान् ओचोगुन्गा, टरो खाताना चोक्मा मेट्टुम्चिम्मे नुङ् घामान्डा चोक्मा लाउङ्सा एडोक् हिट्नागाँ खानि हिट्डे चोक्मा मामेट्टेएट्टि॥ 14टरो आङाम्बाक् आरु रिङ्ङि माखाक्, आनि टाङ्बा येसु खिरिस्ट खाप्चेङि सियाना रिङ्ङि एडोक् ठेलोक् नाभुक् चोगुङ्टुङ्॥ उन् खाप्चेङि सियानाँ आङा लाउङ्सा नाराङिगा थोक्चि पाक्चा माखाक्, हिट्नुङ् नारा लाउङ्सा आङा पाक्चा माखाक्॥ 15हिड्नाडेउङ् खाताना चोगुम्चा चोक्निम्चा पाक्चा लिनिना, टरो याप्मिङाना उनिङ्ग्वा ओछोङ्ग्वाट् लिमाम्बाक् मुलि रिङ् ए॥ 16हाट्ले ना रिङ् जुन् जुन्ङा उन्चि चोलाङि पालान् ओचोगुटु हिट्नागा माङ्हाङ्ङा सान्ति पिडुचिचि हिट्नुङ् लुक्मा टुक्टुचिचि॥ हिट्नागा याप्मिचि डोक् माङ्हाङ् ओयाप्मिचि ए॥
17हाट्ले नुङ् हिट्नागा माङ्जोगा हिसिक्मा आखेम्सुमुङ् आङा याङ्छामा याङ्चाट्नेनिङ्, पोङ्भोने आङा येसुङाना नोकार नुङ् निमेट्माना खेसिक्ङाना ओडाम् आयेम्ङि खुयुएसुङे॥#मुलिचेला टोॽवा १४:१९-२०; २ कोरिन्थि ११:२३-२९#६:१७ याप्मा खेप् पावालङाना बिरोधिचिङा उन् ओलेम्सुए हिट्नुङ् कोरा लाहाब् ओचोगुए, पोङ्भोने उन्ङा खिरिस्टङाना बारेङि हिसिक्टुचे॥ ओलेम्सुनाँ ओयेम्ङि खेसिक्ङाना डाम् लिसे॥
18आम्भु-आन्झाचि हिट्नुङ् आनो-आन्झाचि, आनि टाङ्बा येसु खिरिस्टङाना मायादाया खानिलोक् उलियाक्॥ आमेन्॥
© 2023, Wycliffe Bible Translators, Inc. and Nepal Bible Society