Izai 3
3
1LESEGNER, Bondie Toupwisan,
pe retir dan Zerizalem e dan Zida
tou resours ek provizion,
tou zot stok dipin ek dilo.
2Bann gerye,
bann ziz e bann profet,
bann deviner e bann ansien,
3bann kapitenn
e bann gran dimoun,
bann konseye e bann saz,
bann mazisien e bann longanis.
4Mo pou fer bann zenes vinn zot bann sef.
Bann ti zanfan pou gouvern zot.
5Dimoun pou lager ant zot.
Ant vwazin, pou ena bel deboulman.
Bann zenn pou lev ar gran dimoun.
Bann ti dimoun pou lev ar bann gran-misie.
6Enn zom pou mem trap so frer
dan lakaz so papa e pou dir li:
“To ena enn manto,
abe vinn nou sef alor.
Tomem responsab
sa bann lakaz kraze la”.
7Sa zour-la, li pou leve pou li dir:
“Mo pa enn dokter,
dan mo lakaz pena dipin ek manto,
napa fer mwa
vinn sef lepep.”
8Zerizalem finn maye
e Zida finn tonbe.
Akoz seki zot dir ek seki zot fer kont LESEGNER,
zot pena okenn respe pou so grander ek so pwisans.
9Zot figir mem fini kondann zot.
Zot pa per pou tal zot pese parey kouma Sodom,
zot pa finn kasiet nanye.
Maler lor zot,
parski zot finn fer zot prop maler!
10Dir: Bienere seki fer lazistis
parski li pou manz fri so bann aksion.
11Ayo maler pou seki fer lemal,
parski li pou gagn maltrete dapre so bann prop aksion.
12Ayo mo pep! Bann zanfan pe met dir ar li,
bann madam pe dominn li.
To bann gid pe kondir twa dan perdision.
e zot finn fer twa pran move sime.
13LESEGNER pe leve pou li akize,
li finn diboute, pou li ziz lepep.
14LESEGNER vinn ziz bann ansien,
so pep avek so bann sef:
“Zot finn bril karo rezin.
Seki zot finn kokin ar dimoun mizer, li dan zot lakaz.
15Ki drwa zot ena pou kraz mo pep
e defigir bann pov?” Ala LESEGNER Toupwisan finn koze.
16LESEGNER dir:
“Parski bann tifi Sion, zot alert
e zot fer agreab,
zot marse tipa-tipa
pou fer sonn laklos dan zot lipie,
17LESEGNER pou fer latet bann tifi Sion ranpli ar lagal
e pou fer zot fron vinn touni.”
18Sa zour la, LESEGNER pou tir bann akseswar: ti laklos, medayon, 19pandantif, brasle, vwal 20foular, brasle pou lipie, sintir, parfin ek tabiz 21bag, piersing, 22linz maryaz, kaskol, chal, sakos, 23laglas, chouridar, sapo, sari.
24Enn loder pouritir pou ranplas loder parfin.
Dan plas enn sintir, pou gagn enn lakord.
Dan plas enn zoli kwafir, latet pou raze.
Dan plas enn zoli kostim, pou met enn sak goni.
Dan plas zoli-zoli batman, pou ena enn mark fer rouz. Laont sa!
25Zerizalem, to bann zom pou tonbe ar kout lepe.
To bann gerye pou mor dan lager.
26Lavil antie pou plengne e pou an-dey,
to pou touni, to pou asiz anba.
Kreol Morisien OT Portions © Bible Society of Mauritius, 2020.