Izai 2
2
Lape pou touzour
1Parol ki Izai, garson Amoz, finn gagne konsernan Zida ek Zerizalem.
2Enn zour,
montagn kot lakaz LESEGNER ete
pou klase pli gran parmi tou bann montagn.
Li pou lev pli ot ki tou kolinn,
e tou bann pei pou vinn kot li.
3Boukou pep pou vini, zot pou dir:
“Anou ale! Anou al lor montagn LESEGNER.
Nou pou mont kot lakaz Bondie Zakob.
Li pou montre nou so sime
e nou pou mars lor so larout
parski lalwa pou sorti dan Sion
e parol LESEGNER pou sorti depi Zerizalem.”
4Li pou ziz bann pei.
Li pou fer larbit ant boukou pep.
Zot pou fer zot lepe vinn bann pios
e pou fer zot bann lans vinn bann laserp.
Enn pei pou nepli tir lepe kont enn lot pei.
Zot pou aret aprann kouma fer lager.
Zizman kont larogans
5Vini lakaz Zakob!
Anou mars dan lalimier LESEGNER.
6Wi, to finn rezet to pep. To finn rezet lakaz Zakob parski zot finn ranpli avek kitsoz ki sorti dan Les.
Zot fer sorselri kouma bann Filistin.
Zot lame dan lame ek bann etranze.
7So pei finn ranpli avek larzan ek lor.
So bann trezor napa kapav konte.
So pei plin avek seval
e so bann kales napa kapav konte.
8So pei ranpli avek fos bondie.
Zot tom azenou divan travay zot lame.
Zot ador seki zot ledwa finn fer.
9Limanite pou ploye.
Tou bann zom pou abese:
Napa relev zot!
10Al dan lakav!
Kasiet dan lapousier,
lwin ar koler LESEGNER,
lwin ar grander so mazeste.
11Bann zom ki fezer pou bes latet.
Bann ki ena lorgey, pou imilie.
LESEGNER tousel pou dan laglwar,
sa zour la.
12Parski pou ena enn zour pou LESEGNER Toupwisan
kont tou bann vantar e bann gran-nwar; tou bann ki rod grander, zot pou imilie.
13Kont tou bann sed Liban ki leve drese
e kont tou bann senn Basann.
14Kont tou bann montagn ki drese
e kont tou bann kolinn ki leve.
15Kont tou bann sitadel bien ot
e kont tou miray fortifie.
16Kont tou bann bato Tarsis
e kont tou bann bato marsandiz.
17Bann fezer pou tom azenou
e bann ki fer gran-nwar pou imilie.
LESEGNER tousel pou dan laglwar, sa zour la.
18Tou bann fos bondie pou disparet.
19Zot pou vinn dan bann kavern
e dan bann lakav.
Ler li pou leve pou fer later gagn per,
zot pou kasiet koler LESEGNER
e grander so mazeste.
20Sa zour-la, bann zom pou zet
zot bann fos bondie an-arzan e an-or
pou lera ek sovsouri manze;
pou zet sa bann fos bondie ki zot ti fabrike pou adore.
21Bann dimoun pou kasiet ant bann ros
ek dan fant bann falez.
Ler li pou leve pou fer later gagn per, zot pou kasiet koler LESEGNER ek grander so mazeste.
22Aret kont lor bann mortel
ki ena enn sel souf lavi:
ki valer li ena?
Kreol Morisien OT Portions © Bible Society of Mauritius, 2020.