Kạhtukko 9
9
Ạkil ar Albudạha
1Ạkil do acʼakʼ oṛakʼe benao akada;
uni do dhiri reakʼ eae goṭecʼ khunṭiye bitʼakada.
2Uni do janwar gurkate jele isin akada
ar darkha rasa sãote mosolae mesal akawada;
uni do jomakʼte ṭebile sajao akada.
3Uni do acʼren kạ̃ṛmĩko sanam jaegareye kol akatʼkoa,
ar nagraha reakʼ joto khon cetan utạr ṭhạ̃i khon
uni do hohoyetʼteye meneda,
4“Lelha hoṛ do nonḍeko hijukʼma.”
Okoeyakʼ buj bạnukʼtako onkoe metako kana,
5“Dela hijukʼte, ińakʼ jomakʼ jompe,
ińakʼ mosola mesal akatʼ darkha rasa ńũipe;
6Lelhako sãote gatekʼ do bạgime,
inạ khanem bańcaokʼa;
am do budan reakʼ horte taṛamme.”
7Landa dhutʼ hoṛ ṭhen okoe milimisiạ lạgitʼe calakʼ uni doe lajao ocokʼa;
bạṛicʼ hoṛkoakʼ dos okoeye ńambaṛae
bạṛicʼ hoṛ do unigeye dusiyea.
8Landa dhutʼicʼ hoṛ do dosko alom udukʼaea,
arem udukʼae khan ame hirkhạwama;
bickom ạkilan hoṛ do uniyakʼ dosko udukʼaeme,
uni do ame dulạṛmea.
9Ạkilan hoṛ solha emaeme, inạkhan arhõ ạkilanicʼe hoyokʼa;
Isor botorae hoṛ cetʼaeme, uni do arhõ cecetʼakʼe hameṭjoṅa.
10 #
Job 28.28; Ser 111.10; Kạh 1.7 Probhu Isor botorae do ạkil reakʼ etohopʼ kana;
ar uni sonoticʼ baḍaeye do buj kana.
11Buj doe menede, “Iń hotete am do ḍher dinem bahaokʼa,
ar bochor reakʼ dinkoge juṭucʼama.
12Ạkilanicʼem hoyokʼ khan amakʼ lab hoyokʼtama,
menkhan landa dhutʼicʼem hoylen khan eskarge kosṭom ńama.”
13Lilhi maejiu doe bachaogea
uni do jãhãn tạkicʼakʼge bae bataoa, uni do ạkil bạnukʼtaea.
14Uni do acʼakʼ oṛakʼ reakʼ duạr aṛere
ar nagraha reakʼ cetan utạr ṭhạ̃ireye duṛupʼa.
15Ar okoe ona horteko parom calakʼ
uni do onko hohoakoteye metakoa,
16“Lelha hoṛ do nonḍeko hijukʼma.”
Ar ạkil bạnukʼtako hoṛ doe metakoa,
17“Kombṛo akatʼ dakʼ do heṛemgea;
ar oko reakʼ jomakʼ do sebelgea.”
18Menkhan uni do bako baḍaea, gocʼ hoṛko onḍe menakʼkoa mente;
ar uni maejiuren neota hoṛ do Sheol reakʼ khạndṛuńreko tahenkana.
Santali Bible © Bangladesh Bible Society, 2021.