Kạhtukko 10
10
Solomonakʼ sopolha
1Solomonakʼ dhorom sopolha.
Ạkilan hopon do apatakʼ jionre rạskại ạguiya,
menkhan bebuj hopon do eṅgatakʼ jionre duke ạguiya.
2Behok lekate ńamakʼ dhonre jãhãn porho do bạnukʼa,
menkhan dhorom do moron khone rurukhiyạwa.
3Probhu Isor do acʼ botoraekanko bae reṅgecʼ ocokoa,
menkhan bedhoromkoakʼ laloc doe ạuṛiyakʼ ocoya.
4Asketokʼ ti do manwae reṅgecʼ ocoyea,
menkhan khaṭaokʼkan ti doe kisạ̃ṛokʼa.
5Ạkilan hopon do aghãṛre phosole samṭaoa,
menkhan lajao ocokʼ hopon do irokʼ jokhecʼe jạpitʼkakʼa. 6Dhoromicʼakʼ bohokʼre do bhor hijukʼa,
menkhan bedhoromicʼakʼ mocare do
jor julumge oko tahena.
7Dhorom hoṛko reakʼ disạ do bhore ạguiya,
menkhan bedhoromkoakʼ ńutum do sea giḍikʼa.
8Okoeyakʼ ontorre ạkil menakʼ uni do hukume bataoa,
menkhan bok bokaokʼkan bebuj hoṛ doe maraokʼa.
9Okoe dhoromteye calakʼkan uni do khạtirjomae dãṛãnkana,
menkhan okoe peṛta horteye calakʼ uni doe sapʼ ocokʼa.
10Mẽtʼ ripitʼicʼ hoṛ doe haso ocokʼa;
ar bok bokaokʼkan bebuj hoṛ doe bạṛijokʼa.
11Dhorom hoṛakʼ moca do jion reakʼ jharna leka,
menkhan bedhorom hoṛakʼ mocare do
jor bojorge oko tahena.
12 #
Jak 5.20; 1 Pat 4.8 Kurud do jhogṛae janam ocoya,
menkhan dulạṛ do sanam lekan bedhorome danaṅa.
13Buj menakʼtae hoṛakʼ mocare do ạkil tahena,
menkhan pãeṛa ṭheṅga do buj bạnukʼtayicʼ hoṛakʼ dea lạgitʼ kana.
14Ạkilan hoṛ do bidiạkoe dohojoṅa,
menkhan bebujakʼ moca do jarkhare hoho ạguiya.
15Kisạ̃ṛkoakʼ dhon do pạcriteko esetʼ akatʼ nagraha lekana.
16Dhoromkoakʼ kuṛại do jion kana,
menkhan bedhoromkoakʼ arjawakʼte kại do ḍherokʼkana.
17Ḍanṭaoicʼ do jion reakʼ horteye calakʼkana,
menkhan nisṛạue phesṛaoetʼkan hoṛ doe sen adokʼa.
18Kurude okoyetʼ kan hoṛ do
eṛe kathae roṛa;
ar bebuj hoṛ do bodname gahaoa baṛaea.
19Ḍher kathare bedhorom do baṅ okulạnokʼa,
menkhan okoe mocae ḍanṭaoetʼtae uni doe budangea.
20Isor botoraekoakʼ alaṅ do khạṭi rupạ leka,
menkhan bedhoromkoakʼ ontor reakʼ dam do bạnukʼtakoa.
21Isor botoraekoakʼ luṭi do ḍher hoṛgeye ńeljutkoa,
menkhan ạkil begorte bebuj hoṛ doko gujukʼa.
22Probhu Isor okoeye bhorae uni doe kisạ̃ṛgea;
ar ona bhorre jãhãn duk ar kosṭo do baṅ tahena.
23Bạṛicʼ kạmi do bebujkoakʼ rạskạ kana,
menkhan budankoakʼ rạskạ do ạkilge.
24Bedhorom hoṛ do okako botorakʼ onaregeko paṛaokʼa,
menkhan Isor botoraekoakʼ khojogokʼa do purunokʼtakoa.
25Hoe bharḍo hecʼlenre bạṛicʼ hoṛ do bako tahena,
menkhan Isor botorae hoṛ do jaejug diṛho akane tahena.
26Ḍaṭare sirkạ ar mẽtʼre dhũạ lagaolenre cetʼleka kosṭo ạikạukʼa,
onkage kuṛhiyạ hoṛ hõ jãhãregem kolkae onḍege kosṭoko ńama.
27Probhu Isor botorae do bahaokʼ dine baḍhaoa,
menkhan bedhoromkoakʼ din do khaṭokʼtakoa.
28Isor botoraekoakʼ asre do rạskạ menakʼa,
menkhan bedhoromkoakʼ as do michạgetakoa.
29Probhu Isorakʼ hor do dhorom hoṛko lạgitʼ gaṛ leka,
menkhan okoe do bạṛicʼko kạmi onko lạgitʼ do morone ạguiya.
30Isor botorae hoṛko do jao okte diṛho akanko tahena
menkhan bedhorom hoṛko do disạmre bako girobas daṛeakʼa.
31Dhorom hoṛkoakʼ moca khon do ạkil reakʼ katha oḍokokʼa,
menkhan peṛta katha roroṛ alaṅ doe getʼ giḍi ocokʼa.
32Dhorom hoṛkoakʼ moca do lek lekan kathae roṛa,
menkhan bedhoromkoakʼ moca do eken peṛta kathageye roṛa.
Santali Bible © Bangladesh Bible Society, 2021.