Kạhtukko 8
8
Ạkil sarhaoe
1 #
Kạh 1.20,21 Ạkil do cetʼ bae hohoyeda?
Buj do cetʼ ãṭ aṛaṅte katha bae roṛeda?
2Hoṛ aṛe reakʼ usul jaegare
okare hor do dobạṭiạre milạu akan
onḍege ạkil do teṅgo akane tahena.
3Nagrahate calakʼ horre phaṭok-duạr ṭhen uni do ãṭ aṛaṅteye mena,
4“E hoṛko, iń do apeń hohoape kana,
ar sanam hoṛko ṭhen ãṭ aṛaṅteń meneda.
5Lelha hoṛ do, budan hoyokʼ lạgitʼ ạkilko hameṭ joṅa;
ar khaṭo bujan hoṛ hõ ạkilko hameṭ joṅa.
6Ańjomme, iń do lek lekan kathań roṛa,
ar khạṭi katha roṛ lạgitʼ ińakʼ mocań jhijtińạ.
7Iń do sạri kathageń roṛa;
ar bạṛicʼ katha doń hirkhạwakʼ kana,
onate ona do bạń lạiya.
8Ińakʼ moca reakʼ sanam kathako do ṭhikgea,
onare peṛtawakʼ ar bạṛicʼ monsubạ do bạnukʼa.
9Ar bujhạntar hoṛko ṭhen ińakʼ kathako do pusṭạugea;
ar ạkil menakʼtako ṭhen hõ onako do khạṭigea.
10Rupạ khon ińakʼ sikhnạtge ataṅ lạgitʼ ahkaokʼme,
ar damanakʼ sona khon ạkil ńam lạgitʼge ahkaokʼme;
11ente morokotʼ dhiri khon hõ ạkil do damgea;
amakʼ khoj leka jãhãn jinis sãote ona do oho jurilena.
12“Iń doń ạkilangea, ińre do buj menakʼa;
bidiạ ar boge bạṛicʼ bujhạu reakʼ daṛe hõ ińre menakʼgea.
13Probhu Isor botorae do bạṛicʼakʼ kurudakʼge;
bạḍại, ṭenḍosokʼ, bạṛicʼ beohar
ar peṛta katha iń doń kurudakʼ kana.
14Solha ar sạri bidiạ do ińrege;
buj do ińge, jor hõ ińge.
15Rajko do iń hotete rajosṭiko calaoeda,
ar mukhiyạko do hokte perecʼ ạnko benaoeda;
16Iń hotete rapajko ar cetan hudạren hoṛ do
mạlikiko calaoeda;
onko joto do bicạrakʼko kạmikana.
17Okoe ińko dulạṛedeńkan onko do iń hõń dulạṛkoa;
okoe goṭa ontorteko ńam baṛayedeńkan onko do ińko ńameńa.
18Dhon ar man do iń khonge hijukʼa,
ar thambaoakʼ dhon ar bhạlại hõ.
19Sona khon hõ, khạṭi sona khon hõ
iń emakʼ jo do bhagegea;
iń okań emokʼkan ona do bachao akatʼ rupạ khon hõ khạṭigea.
20Iń do dhorom reakʼ horteń taṛameda,
ar dhorom bicạr reakʼ horreń dãṛãnkana.
21Okoe ińko dulạṛiń onko do dhon duribko ńama;
ińge onkoakʼ murạikoń perecʼkatakoa.
22 #
Sod 3.14
“Probhu Isor doe sirjạukedeńạ, acʼakʼ sirjạu reakʼ etohopʼre
Ạd reakʼ kạmiko modre pạhilakʼge;
23Pạhil khonge, dhạrti ạuri sirjạure,
jaejug khon iń doń dohoakana.
24Tinre jãhãn jalapuri baṅ tahẽkana,
ar dakʼte perecʼ jharna baṅ tahẽkana,
unre iń doń janamlena.
25Buru boṭkocʼko muṭhạnokʼ ạuri khongeń tahẽkana.
26Tinre dhạrti ar ṭạnḍiko
se dhạrti reakʼ mitʼṭecʼ dhuṛi hõ baṅ benao akan tahẽkan,
un khon iń doń tahẽkana.
27Uni do tinre sermae bạisạuetʼ tahẽkana
unre iń do onḍeń tahẽkana;
uni do tinre jalapuri reakʼ simạnakoe ṭhiketʼ tahẽkana,
unre iń do onḍeń tahẽkana.
28Uni do tinre cetan secʼre rimile bạisạuetʼ tahẽkana
ar ot latarre jharnakoe bạisạuetʼ tahẽkana,
29ar tinre jalapuri reakʼ simạkoe benaoetʼ tahẽkana
jemon dakʼ do uniyakʼ niạm bahrete bae sen daṛeakʼ,
ar tinre uni do dhạrti reakʼ rehetʼe ṭhiketʼ tahẽkana,
30unre ińge kạrigol lekate uni aṛereń tahẽkana.
Dinke din iń do kusiteń perecʼente
uni samaṅre jao ghạṛicʼ iń rạskạkʼkan tahẽkana;
31Uniyakʼ dhạrti iạteń rạskạkʼkan tahẽkana,
ar manwa iạte rạskạte perecʼ iń tahẽkana.
32“E bạbu, ńitokʼ ińakʼ katha ańjomme;
okoe ińakʼ horteko calakʼkan onko doko bhạgangea.
33Ińakʼ hukumko moneyakʼme, ar ạkilan hoyokʼme,
ar alom posṛaya.
34Okoe hoṛ ińakʼ kathako ańjom
ar dinạm hilokʼ ińakʼ duạr ṭhen ebhen akane tahen
ar ińakʼ silpińko ṭhene tạṅgi hataṛ uni doe bhạgangea.
35Ente okoe ińe ńameńkan uni do jione ńama
ar Probhu Isor ṭhen khon dayae ńama.
36Menkhan okoe iń bae ńameńkan uni do acʼgeye bạṛijokʼ kana;
ar okoe ińko kurudạńkan onko sanamko do gujukʼko dulạṛa.”
Santali Bible © Bangladesh Bible Society, 2021.