Kạhtukko 7
7
1E bạbu, ińakʼ kathako ańjomme
ar ińakʼ sanam hukumko amakʼ ontorre
gathao dohokakʼme.
2Ińakʼ hukum dohoyme, ar jiwetʼ baṛe tahenme.
Ińakʼ cecetʼakʼ do amakʼ mẽtʼãhã reakʼ moni leka
pahra dohoyme.
3Amakʼ kạṭupʼkore onako bedhao dohokakʼme,
ar amakʼ ontorre ol dohokakʼme.
4Ạkil metaeme, “Am do ińren misera kanam,”
Ar bud do gate kanae mente bujhạuem;
5ona do bạṛicʼ maejiuakʼ ti khone rukhiyạmea,
ar luhum suhum katha roṛetʼkạnicʼ
uni laṭghaṭicʼ maejiuakʼ ti khon hõ.
Bạṛicʼ maejiuakʼ neota
6Iń do oṛakʼ reakʼ khiṛki duạr khon
bhãora bhugạkʼ khoniń oyoṅkan tahẽkana.
7Khaṭo bhudanko mod khoniń ńelkedea,
juạnko modre mitʼṭen juạniń tạnkhikedea
okoeyakʼ do khaṭo bud tahẽkantae.
8Uni do maejiuakʼ oṛakʼ sorte kulhiteye parom calakʼkan tahẽkana,
ona tayom uni do uniyakʼ oṛakʼteye boloyena;
9Unre ạyupʼ jokhecʼ, ńuhum jokhecʼ
ńindạ okte, kaṛaṅ kucạṅ ńutge tahẽkana.
10Ona jokhecʼ mitʼṭen maejiu do uni sãote ńapamokʼ lạgitʼe
oḍok hecʼena;
uni do kusmbi kicricʼe horokʼ akada, ar ontor do phạsiạrate perecʼ tahẽkana.
11Uni doe bạṛicʼ maejiu kana, ar ãṭ aṛaṅte kathae roṛeda,
uniyakʼ jaṅga do oṛakʼre baṅ tahẽ thirokʼkantaea;
12Oka do kulhire, oka do bajarre ar oka do dobạṭiạkoreye tãṛãkʼ baṛaekana.
13Uni do uni koṛae cokʼadea ar besorom mocateye metadea,
14“Ińakʼ oṛakʼre dãṛẽko reakʼ jel menakʼa,
teheńge iń do dãṛẽń samaṅ akatʼa.
15Ar onate am tulucʼ ńapamokʼ lạgitʼ iń oḍok hecʼakana;
ar amiń ńapamketʼmea.
16Misor disạm reakʼ roṅ beroṅ kicricʼte
ińakʼ aṭetʼiń sajao akada;
17Gondhoros, oguru ar darcinite
aṭetʼiń mahkao ocoakatʼa.
18Dela, setakʼ hạbicʼ dupulạṛ telaṅ moṅgonokʼ ma,
Ar khạndri dulạṛte suk laṅ bhog joṅma.
19Ińren jãwãe do oṛakʼre bạnuiya, uni do sạṅgińte dãṛãne calao akana;
20uni do thạilạkʼ perecʼ ṭakae idiakada,
ar kunạmi laha do oṛakʼte bae ruạṛa.”
21Ạḍi phuslạu kathateye bulạukedete uni do muhinteye idikedea,
ar sebel sebel kathateye ạnḍicʼkedea,
22Unre uni do maejiu tayomteye calaoena.
Ḍaṅgra cetʼleka gure lạgitʼko tiyạkʼ idiye
ar sikṛite tolkate pagla hoṛ cetʼleka sạjạiko ńam,
onkage uni hoṛ do bae baḍaekana, noa iạte jiwi calakʼtaea mente.
23Cẽṛẽ cetʼleka usạrate jhampateye ńir bolokʼkan
ar mucạtʼre uniyakʼ kunḍire sar ạuri bolokʼ hạbicʼ
onkage uni hoṛ hõ bae baḍaekana, noate jiwi do calakʼtaea mente.
24E bạbu, ńitokʼ ińakʼ kathako ańjomtińme,
ar okań metamkan ona luturakʼme.
25Amakʼ mon do uni maejiuakʼ horte alom sen ocowakʼa,
ar uniyakʼ horre hõ alom dãṛãna;
26ente uni do aemageye sobokʼ gur akatʼkoa,
hẽ ạḍi utạrgeako uniye sumạrakatʼko do.
27Uniyakʼ oṛakʼ do hoyokʼkana Sheolte calakʼ hor,
one okaṭakʼ hor do moron reakʼ kandhateye pheḍ akan.
Santali Bible © Bangladesh Bible Society, 2021.