Kạhtukko 6
6
Lelhatetʼ reakʼ sontor katha
1E bạbu, jãhãeren jạmindarem hoyakan khan,
ar eṭakʼko lạgitʼ jạmindar hoyokʼ lạgitʼ hõm bandhok akan khan,
2ar okam roṛakatʼ ona reakʼ jhạlirem paṛao akan khan,
amakʼ moca reakʼ kathatem sapʼ ocoakan khan,
3enḍekhan E bạbu, ma rukhiyạkʼme,
ar chaḍaokʼ lạgitʼ
uni ṭhen senkate apnar copodokʼme,
ar nerha jerhakʼme,
4amakʼ mẽtʼ do alom jạpitʼ ocowakʼa,
ar mẽtʼ hõ alom hạrupʼ ocoytama.
5Sikạriwakʼ ti khon jel hopon leka,
laoṭa oḍaoicʼakʼ ti khon cẽṛẽ leka
am do paskao oḍokokʼme.
6E asketicʼ, mucʼko ṭhen calakʼme,
ar onkoakʼ kạmiko ạṛi bạndhiyte ạkil cetʼjoṅme.
7Onko hukumako reakʼ do celege bạnukʼkoa,
onko cetanre jãhãn sordarko se mạlik hõ bạnukʼkoa;
8enhõ uni do niron dinre jomakʼe doho jarwayeda
ar phosol samṭao jokhecʼ hõ jomakʼe jogaṛeda.
9E asketicʼ, ar tin hạbicʼem giticʼkokʼa?
Tinre jạpitʼ khon dom beretʼa?
10 #
Kạh 24.33,34 Am dom meneda, “Thoṛaganiń jạpitʼ kakʼrege, ar thoṛań giticʼ ńokʼlenge,
ar ti kukucʼkate mitʼ ghạṛiń kunḍlạṅ hataṛlenge.”
11Menkhan mitʼ talao peṛako hecʼamre se
ḍạkukoakʼ tirem paṛaolenre cetʼlekam reṅgejokʼ
ṭhik onkage am hõm reṅgejokʼa.
12Okoe hoṛ doe kharapge, are bạṛicʼge
uni do bạṛicʼakʼ kathako mocateye asen baṛaea;
13Uni do mẽtʼ ripitʼkateye isạraya,
ar jaṅgateye corhoda,
ar kạṭupʼteye udukʼ baṛaea,
14mon reakʼ phẽpṛa iạte sanam ghạṛicʼ bạṛicʼakʼ phundiye aṭaoa
uni do reṭepeṭe reakʼ itạgeye er idiyeda.
15Ona iạte ackage uni cetanre muhin do hijukʼa;
ar ṭuṅ ghuṛirege uni doe marao utạrokʼa,
ar bae beretʼ daṛeakʼa.
16Probhu Isor do eae goṭecʼ jiniskoe kurudakʼkana
onako do uni ṭhen hirkhạwakʼ kana;
17bạḍạite perecʼ mẽtʼ,
eṛe alaṅ,
miridoskoakʼ mãyãme joro ocoyicʼ ti,
18bạṛicʼ motlobe aṭaoyetʼkan mon,
behokakʼ kạmi lạgitʼ ńir calakʼkan jaṅga,
19eṛe roṛ ar eṛe goha emokʼicʼ,
ar boehako talare gulmale ehopʼkan hoṛ.
Laṭghaṭ reakʼ cehaona
20E Bạbu, am babawakʼ hukumko dohoyme,
ar am gogowakʼ sikhnạt hõ alom bạgiwakʼa.
21Jaejug hạbicʼ amakʼ monre rebetʼ dohoyme,
ona do amakʼ hoṭokʼre bedhaokakʼme.
22Calakʼ jokhecʼ ona do hore udukʼama,
ar jạpitʼ jokhecʼ ame horhomea
arem ebhenlen khan am sãote kathae roṛa;
23ente noako hukum do diuhe leka, noa sikhnạt do marsal leka,
ar ḍanṭao reakʼ nisṛạu do jion reakʼ horge.
24Noako do bạṛicʼ maejiuakʼ ti khon,
ar ạ̃nạ̃ṛi maejiuakʼ cikạ̃ṛ cikạ̃ṛ
katha khone rukhiyạmea.
25Uniyakʼ mońjtetʼ ńelte monre alom lalocokʼa,
ar uniyakʼ mẽtʼ pipnire alom jhampa ocokʼa;
26ente kusmbi kuṛi do mitʼ kecakʼ piṭhạteye ạkhrińokʼa,
ar laṭghaṭ maejiu do amakʼ jiwiye sendraetama.
27Seṅgel aṅgra halaṅkate okoe apnarakʼ gochareye dohoy
enḍekhan uniyakʼ kicricʼ do cetʼ baṅ lokʼtaea?
28Ar jolokʼkan aṅgra cetante okoeye taṛam
enḍekhan uniyakʼ jaṅga hõ cetʼ baṅ lokʼtaea?
29Okoe hoṛ eṭakʼ maejiu ṭhene bolokʼ uniyakʼ dosa do onkage hoyokʼtaea;
ar uni do jãhãe maejiugeye joṭede enḍekhan sạjại doe ńamtegea.
30Reṅgecʼ jalate okoeṭakʼ hoṛe kombṛoyetʼ,
uni do kombṛo iạte bako kurudaea.
31Enhõ tinreye sapʼ ocokʼa
unre hoedaṛeakʼa uni do eae dobṛa em ruạṛkakʼ hoyokʼtaea,
pasecʼ acʼakʼ oṛakʼ reakʼ joto dhon hõ emokʼ hoyokʼtaea.
32Okoeye laṭghaṭ uni do buj reakʼ okulạn menakʼtaea;
uni do acʼtegeye maraokʼ kana.
33Uniyakʼ bhạgre do ghạl ar bemanot menakʼa;
ar uniyakʼ durnam do tisge baṅ muchạukʼtaea;
34ente ontor reakʼ jaljalaokʼ do jãwãetetʼakʼ edreye rakaba;
ar hala hạli lạgitʼ uni do jãhãn mãyãge bae uduga.
35Uni do jãhãn khuti purun bae ataṅa,
ar ạḍi bạ̃ṛti danaere hõ bae tirpitokʼa.
Santali Bible © Bangladesh Bible Society, 2021.