Kạhtukko 5
5
Loṭghuṭi khon sontor tahen
1E bạbu, ạkil reakʼ oka kathań lạiyam kan ona baṛe mońjte ańjomtińme;
ińakʼ buj reakʼ katha luturakʼme.
2Onate am do boge bạṛicʼ bujhạu reakʼ daṛem ńama,
ar amakʼ moca khon ạkil do oḍokʼ hijukʼa.
3Bạṛicʼ maejuakʼ luṭi khon do rasa jorokʼkana,
ar uniyakʼ alaṅ do sunum khon hõ cikạ̃ṛgetaea;
4menkhan sesre uni do hewer haṛhatʼgeye hoyokʼa,
ar banar secʼ dharanakʼ tarwaṛe lekage.
5Uniyakʼ jaṅga do moron secʼ pheḍ calakʼ kantaea,
ona do sojhe Sheol secʼge calakʼ kana.
6Jion secʼakʼ hor do bae moneyakʼa;
uniyakʼ calakʼ hor do baṅ sojhetaea, ar do ona bae baḍaea.
7E hoponińko, ńitokʼ do ińakʼ katha ańjompe,
ar okaṭakʼ iń menetʼkan ona khon alope ocogokʼa.
8Uni maeju khon amakʼ jaṅga do sahaṛ akae dohoytam,,
ar uniyakʼ oṛakʼ reakʼ duạr sorte hõ alom calakʼa;
9ar baṅkhan amakʼ ṭhonok do eṭakʼ hoṛem emakoa
ar amakʼ bahaokʼ din do kurmutạhakoakʼge hoyokʼa.
10Onate ạ̃nạ̃ṛi hoṛ do amakʼ dhonko joma,
ar amakʼ khaṭaoakʼ reakʼ jo do eṭakʼkoakʼ oṛakʼte calakʼa.
11Jion reakʼ sesa sisire amakʼ hoṛmo ar jel do nosṭokʼtama
unre am dom kuhrạua.
12Amem mena, “Hae! Iń do ḍanṭaoiń kurud akada,
ar ińakʼ ontor do sudhrạukʼ reakʼ kathae nihạ̃t akada.
13Ińren gurukoakʼ katha bạń ańjomleda,
ar ińko cetʼạdiń tahẽkankoakʼ katha bạń luturatʼ tahẽkana.
14Somajren hoṛkoakʼ tire paṛaokate
iń doń gujukʼkan tahẽkana.”
Apnar erare rạskạ
15Amakʼ kuń reakʼ dakʼ khonge am do ńũime;
ar amakʼ ḍạḍi dakʼ reakʼ dakʼge ńũime.
16Amakʼ ḍạḍi dakʼ do bahrete cedakʼ ạtu oḍokokʼa?
Ar amakʼ jharna dakʼ do cedakʼ kulhikote ạtukʼa?
17Amren hoponko do amrengeko tahenma,
bạṛicʼ maejiuko do onare bhag alo tahentakoma,
18ar amakʼ bhumbukre bhor tahenma,
ar amren juạn jokhecʼren bạhu iạtege rạskạkʼme.
19Uni do dulạṛte perecʼ, ar ńelokʼte napae jel leka;
uniyakʼ sohag do jotowakʼteye purunmea.
Am do jao ghuṛi unirem moṅgonokʼa.
20E bạbu, cedakʼ am do bạṛicʼ maejiurem moṅgonokʼ kana?
Ar ạ̃nạ̃ṛi maejiu do cedakʼem hạṛubea?
21Manwakoakʼ dãṛãn do Probhu Isorakʼ mẽtʼãhã samaṅre menakʼa;
onkoakʼ sanam horko uni doe tạnkhiyeda.
22Bedhorom hoṛ do bạṛicʼ kạmi reakʼ jhạlireko paṛaokʼa,
uni do apnarakʼ kại babertegeye tol ḍhumbạgokʼa.
23Ḍanṭao bae senakʼte uni doe gujukʼa;
Ar acʼakʼ maraṅ lelhatetʼ iạte uni doe sen adokʼa.
Santali Bible © Bangladesh Bible Society, 2021.