Kạhtukko 29
29
1Jaoge nisṛạu reakʼ katha ańjomkate hõ okoe hoṛ
hoṭokʼ keṭecʼgeye dohokatae
uni do ackageye jarkharokʼa;
ar bae teṅgo ṭarhao daṛeakʼa.
2Dhoromkoko saṅgelen khan hoṛkoko rạskạkʼa,
menkhan bedhoromko cakʼlaokoko hoylen khan hoṛko doko kũhrạukʼa.
3Okoe hoṛ ạkile dulạṛetʼ uni do apate rạskạ ocoyea,
menkhan okoe do kusumbi sãoteye tahen uni do acʼakʼ dhone nosṭoea.
4Hok reakʼ bicạr iạte raj do disạme ṭarhao daṛeakʼa,
menkhan okoe ghuse kusiyakʼ uni do disạme jarkhara.
5Okoe hoṛ aḍepaserenkoe lạhum sạhumko
uni do acʼakʼ jaṅga lạgitʼ jhạligeye oḍaoeda.
6Bedhorom hoṛ do acʼakʼ kại gunạkʼte jhampareye paṛaokʼa,
menkhan Isor botorae hoṛ doe rạskạkʼa are sereńa.
7Reṅgecʼ orecʼko jemon hok reakʼ bicạrko ńam
onate dhorom hoṛ doko ạri bạndhiyeda,
menkhan bedhoromko do noa reakʼ cetʼge bako bujhạua.
8Ṭiṭkạrikan hoṛko do nagrahare gulmalko janam ocoya,
menkhan ạkilan hoṛ do manwawakʼ edreko khentoya.
9Budan hoṛ do khaṭo bujan hoṛ upạrteye mambla lekhan
uni bebujicʼ doe landaya ar baṅkhane raṅgaokʼa,
ar onate cetʼ miṭ maṭge baṅ hoyokʼa.
10Khũniạhi hoṛ do bin dusạn hoṛko kurudaea
ar soṛa monan hoṛ do goje lạgitʼko kurumuṭuiya.
11Khaṭo bujan hoṛ do acʼakʼ purạ edreye sodora,
menkhan ạkilan hoṛ do apnare sambṛaokʼa.
12Mạliki calaoetʼ hoṛ eṛe kathae luturakʼ khan uniren sanam kạmiyạko hõko bạṛijokʼa.
13Reṅgecʼ hoṛ ar haḍrapko talare begar do bạnukʼa
Probhu Isor do bana hoṛge jione dan akatʼkinạ.
14Okoe raj do sạriyakʼte nandankoe bicạrko
uniyakʼ siṅghạson do ṭarhao tahentaea.
15Pãeṛã ar nisṛạu do ạkile dana,
menkhan okoeṭakʼ hopon do ḍanṭaore bạnui
uni do eṅgattetʼe lajao ocoyea.
16Bedhoromkoko saṅge len khan kại do ḍher idikʼa,
menkhan dhorom hoṛ do onkoakʼ jarkharokʼko ńela.
17Amren hopon ḍanṭaoeme,
uni do sulukreye dohokama
ar amakʼ jiwireye rạskạ ocomea.
18Okare Isor do nạbiko hotete acʼakʼ sạriyakʼ bae sodor
onḍenko hoṛ doko bhiṅgṛạukʼa;
menkhan uni hoṛ doe bhạgangea okoe do Probhu Isorakʼ ạn ạrikoe manaoetʼ.
19Eken katha motote guti do bae ḍanṭaokʼa;
ente bujhạulere hõ uni do ona bae manaoa.
20Am do cetʼ nonkan hoṛkom ńel akatʼkoa
okoe do katha lại lạgitʼe lahapʼ cahapʼ baṛaekan?
Ona khon bickom bebuj hoṛrege bạ̃ṛti as do menakʼa.
21Jãhãe hoṛ acʼren guti gidrạ bạ̃ṛtiye mãyãwae khan,
mucạtʼre uni do uniyakʼ sanamakʼren mạlike hoyokʼa.
22Edrekʼ hoṛ do jhogṛae salgaoa,
ar etaṅ cạndi hoṛ do ạḍiye ghạṭa.
23Manwa do acʼakʼ bạḍạiteye copodokʼa,
menkhan mạ̃hir monan hoṛ do manote ńama.
24Kombṛo tulucʼ bhag hataoicʼ hoṛ do acʼge acʼren bạiriye hoyokʼa;
uni do kiriạ ocolere hõ cetʼge bae sodora.
25Manwa okoeye botorae ona botor do uniyakʼ jhampa leka hoyokʼa.
Menkhan okoe Probhu Isorreye bhorsakʼkan uni do khạtirjomae tahena.
26Bicạrre disạm cakʼlaoicʼakʼ daya ńam lạgitʼ ḍherkogeko kurumuṭuiya.
Menkhan Probhu Isor ṭhen manwa do hok reakʼ bicạrko ńama.
27Dhorom hoṛ do behoketʼ hoṛko hirkhạ mẽtʼteko ńelkoa,
ar sojhe horte calakʼ hoṛ do bedhorom hoṛko hirkhạwaea.
Santali Bible © Bangladesh Bible Society, 2021.