Kạhtukko 28
28
1Bedhoromko do begor khudạukotegeko dạṛ joṅa,
menkhan dhorom hoṛ do dhạcri kul leka dil akaeko tahena.
2Disạmren hoṛkoakʼ ghạṭ iạte onaren aema cạlạuakoko hoyokʼa,
menkhan ạkilan ar budan cạlạuako hotetege disạm reakʼ kajaktetʼ do tahena.
3Nandankoe jor bojorko kumãyã cạlạua hoṛ do
baratʼ baratʼ dakʼ lekanae one onate phosol ḍahaokʼ.
4Okoe Probhu Isorakʼ ạnko bạgi giḍiyakʼkan
onko do bạṛicʼ hoṛko sarhaokoa,
menkhan okoe onako manaoetʼkan onko do bạṛicʼko upạrteko teṅgona.
5Bạṛicʼ hoṛko do hok bicạr reaṅ bako bujhạua,
menkhan okoe Probhu Isorakʼ sana lekako calakʼkan
onko do boge bạṛicʼ bujhạu reakʼ daṛeko ńama.
6Kisạ̃ṛ hoṛ peṛta horteye calakʼ khon
uni reṅgecʼ hoṛgeye bhagea
one okoe do bin dusạnteye dãṛãnkan.
7Ạn ạrikoe manaoetʼkan uni hopon doe budangea,
menkhan okoe do dạrdạharen gatekane uni hopon do apate
lajao ocoyea.
8Okoe hoṛ jãhã lekan sudtege acʼakʼ dhone baḍhaotae,
uni do nandanko dayawako lạgitʼge onae jarwayeda.
9Probhu Isorakʼ ạn ạri reakʼ katha jãhãe ańjomkate hõ bae senakʼ,
enḍekhan uniyakʼ koejoṅ hõ hirkhạwanakʼ hoyokʼtaea.
10Soṛa monan hoṛ okoe bạṛicʼ horteye idiye uni do acʼakʼ khạ̃ṛiregeye ńurokʼa,
menkhan miridosko do bhạlại hoyokʼtakoa.
11Kisạ̃ṛ hoṛ do acʼakʼ mẽtʼreye ạkilan hoṛ kana,
menkhan bud menakʼtae reṅgecʼ hoṛ do
uniye baḍae oromedea.
12Dhorom hoṛko ektiạriko ńamle khan sanam hoṛakʼ bhạlại hoyokʼa,
menkhan bạṛicʼ hoṛkoakʼ tire ektiạri calaolen khan
hoṛko bako ńamokʼa.
13Okoe hoṛ acʼakʼ kạiye danaṅkakʼ uni do bae jo baha daṛeakʼa,
menkhan okoe onae aṅgoc are bạgiyakʼ uni do dayae ńama.
14Okoe hoṛ behok lạgitʼ jao okteye botorokʼkan uni doe bhạgangea,
menkhan okoe acʼakʼ ontorre keṭejtae ar behok lạgitʼ
bae botorokʼ kan uni do muhinreye paṛaokʼa.
15Hạnḍrạukʼka dhạcri kul ar ghis ghisạu baṛaekan bana cetʼleka,
onkage uni bạṛicʼ hoṛ do one okoe nandankoren cakʼlaoicʼe hoyokʼkan.
16Okoe disạm cakʼlaoicʼakʼ bud bạnukʼtae uni doe santaoa;
ar okoe cakʼlaoicʼ laloce hirkhạwakʼ uni do ḍher din jiwetʼe tahena.
17Okoe hoṛ khũnkate bạṛicʼ cintạreye paṛao akan
uni do ạuriye gujukʼ hạbicʼe ńir baṛaea;
ar okoehõ aloko goṛowaema.
18Okoe bin dusạnteye calakʼkan uni doe bańcaokʼa,
menkhan okoe hoṛ peṛta horteye taṛamkan uni do ackageye ńurokʼa.
19Okoe hoṛ acʼakʼ jumireye khaṭaokʼkan uni do bạ̃ṛti jomakʼ tahentaea,
menkhan okoe do ạuṛiyakʼkoe khudạuetʼkan uni do bud reakʼ okulạn menakʼtaea.
20Pạtiạran hoṛ do ḍher bhore ńama,
menkhan okoe kisạ̃ṛokʼ lạgitʼe ahkaokʼkan uni do sạjạiye ńama.
21Bicạrre mẽtʼãhã beṅgetʼakʼ do baṅ bhagea;
okoeye onkae uni do mitʼkuṭrạ piṭhạ lạgitʼ hõe onka daṛeakʼa.
22Lalocan hoṛ do kisạ̃ṛokʼ lạgitʼe dhãoṛa dhạ̃uṛi baṛaea,
menkhan uni do bae baḍaea okulạn do uniye tạṅgi akadeya mente.
23Okoe hoṛ nisṛạu reakʼ kathae roṛ
uni khon samka sạṭi reakʼ kathae roroṛicʼge
sesre bạ̃ṛti manote ńama.
24Jãhãege eṅgat apatakʼ jinis kombṛokateye men, “Noa do behokakʼ baṅ kana,”
uni do jarkharren gate kanae.
25Laloc menakʼtae hoṛ doe jhogṛakʼa,
menkhan okoe Probhu Isorreye bhorsakʼ uni doe jo bahakʼa,
26Khaṭo bujan hoṛ do acʼakʼ bujreye bhorsakʼkana,
menkhan okoe Isor emakʼ ạkilteye calakʼ uni do khạtirjomae tahena.
27Okoe hoṛ reṅgecʼ orecʼkoe danako uni do okulạnre bae paṛaokʼa,
menkhan okoe onko ńelte mẽtʼe bedtae
uni do ḍher sarape ńama.
28Bạṛicʼ hoṛkoakʼ tire ektiạri calaolen khan hoṛ doko okokʼa,
menkhan onko bạṛicʼ hoṛko maraolen khan dhorom hoṛko ḍherokʼa.
Santali Bible © Bangladesh Bible Society, 2021.