Kạhtukko 27
27
1 #
Jak 4.13-16
Gapa din lạgitʼ do alom sarhaokʼa,
ente oka hilokʼ cetʼ hoyokʼa ona do bam baḍaea.
2Eṭakʼ hoṛ baṛeko sarhaome ma,
menkhan amakʼ luṭi do alo;
hẽ, eṭakʼ hoṛegeko sarhaome ma.
3Dhiri do hamalgea ar gitil hõ hamalgea,
menkhan bebuj hoṛakʼ raṅgao do
onakin banar khon hõ hamalgea.
4Raṅgao do kurmutạhagea ar edre hõ ạḍi tạpisgea,
menkhan mẽtʼ jolokʼ samaṅre do okoehõ bae teṅgo daṛeakʼa.
5Jãhãe ame dulạṛme ar ona bae sodor,
ona khon bickom jãhãe amakʼ dosko
sodorteye udukʼam onage bhagea.
6Bạirikoakʼ cokʼ do sastagea,
menkhan gate hoteteakʼ ghạlko do bepạtiạrgea.
7Okoeyakʼ lacʼ bigetae uni do dumur rasa hõ bae moneyakʼa,
menkhan okoeyakʼ reṅgecʼ menakʼtae uni ṭhen do haṛhatʼakʼ hõ heṛemgea.
8Tukạ bạgikate uḍạu baṛaekan cẽṛẽ cetʼleka,
onkage oṛakʼ bạgikate dãṛã baṛaekan hoṛ hõ.
9Mahkaokʼ sunum ar dhup do monre rạskạ bujhạukʼa;
onkage gateakʼ solha do
gate ṭhen heṛemgea.
10Apnarren se babaren gate do alom bạgi giḍiyea;
Muhinre boehawakʼ oṛakʼte alom calakʼa;
sạṅgińre tahen boeha khon do aḍepaseren boehageko bhagea.
11E bạbu, ạkilanicʼ hoyokʼme
ar ińakʼ mon rạskạ ocoytińme;
inạ khan okoeko landa dhutʼạńkan
onkoń roṛ ruạṛ daṛeakoa.
12Bujhạntar hoṛ do muhinko ńelle khan asrayko hataoa,
menkhan lelha hoṛ do muhin ńelkatehõ calakʼtegeko tahena
ar ona iạte kosṭoko ńama.
13Okoe ạ̃nạ̃ri hoṛren jạmine teṅgokʼ uni do uniyakʼ kicricʼe hataotaema;
ar bidisiạ hoṛ ńutumte jạmine teṅgokʼicʼ do
unige bandhoke dohoyema.
14Okoe hoṛ ạḍi setakʼre beretʼkate ãṭ aṛaṅte acʼren gate peṛakoe bhorako
ona do sarap mentege lekhakʼtaea.
15Cumḍiń ạimại ar tatle tal jorokʼkan sate dakʼ
unkin banarge kin somangea.
16Hoe cetʼleka baṅ okokʼ
ar jojomtite muṭ akatʼ mahkao sunum reakʼ so
cetʼleka baṅ okokʼ,
onkage jhogṛakʼkan maejiu hõ bae oko daṛeakʼa.
17Mẽṛhẽtʼ do cetʼleka mẽṛhẽtʼe laseretʼa,
onkage mitʼṭen hoṛ do acʼren gateakʼ
bude laseretʼtaea.
18Loa dareye jotonetʼkan hoṛ do ona reakʼ jogeye joma;
ar okoe acʼren kisạ̃ṛe sapʼsoraekan uni doe manot ocokʼa.
19Dakʼ do cetʼleka mẽtʼãhãe ạrsi udukʼetʼ,
onkage manwawakʼ mon do uniye ạrsi udukʼedea.
20Sheol ar Norok cetʼleka tishõ bakin tirpitokʼ,
onkage manwawakʼ mẽtʼ hõ baṅ tirpitokʼa.
21Rupạ biḍạu aṭkar lạgitʼ do galao reakʼ jinis menakʼa,
ar sona lạgitʼ do culhạ,
menkhan manwa do acʼakʼ sarhaoakʼreye biḍạu oromokʼa.
22Bebuj hoṛ do anaj sãote
ukhuṛre toktem huṛuṅ gunḍạlere hõ,
enhõ uniyakʼ lelhatetʼ do bae aṛagea.
23Amren merom ar bhiḍi palrenkoakʼ dosa do
amge mońjte baḍaekakʼme,
ar amren palrenko secʼ hõ moneyakʼme;
24ente dhon do jaejug baṅ tahena,
raj mukuṭ hõ piṛhike piṛhi do baṅ tahena.
25Khet khon tinre ghãs samṭaokʼa ar nãwã ghãs janamokʼa
ar buru khon ghãs samṭao aderokʼa,
26unre bhiḍi hoponko do amakʼ kicricʼko jogaoa,
ar merom do nãwã jumi reakʼ damko emama;
27Ona chaḍa am ar amakʼ gharońj lạgitʼ
do aema toam ńama;
ar amren juạn kạ̃ṛmĩko hõ ona ńũteko moṭakʼa.
Santali Bible © Bangladesh Bible Society, 2021.